وزیرِ اعظم شہباز شریف ترائے ݙینہوار دورے تے کرغزستان روانہ تھی ڳئن

لاہور۔31اگست (اے پی پی) وزیرِ اعظم محمد شہباز شریف ترائے ݙینہوار دورے تے کرغزستان دے دارالحکومت بشکیک روانہ تھی ڳئن۔ سنوار کوں وزیرِ اعظم آفس دے میڈیا ونگ توں جاری بیان دے مطابق وزیرِ اعظم محمد شہباز شریف شنگھائی تعاون تنظیم دے سربراہی اجلاس توں خطاب کریسن اتے مختلف علاقائی تے عالمی امور تے پاکستان دا موقف پیش کریسن۔ وزیرِ اعظم محمد شہباز شریف ایس سی او پلس سربراہی اجلاس اچ وی شرکت کریسن۔ وزیرِ اعظم ورلڈ نومیڈ گیمز دی افتتاحی تقریب اچ بطورِ مہمانِ خصوصی وی شرکت کریسن۔ دورے دے دوران وزیرِ اعظم محمد شہباز شریف شنگھائی تعاون تنظیم دے اجلاس اچ شرکت کرݨ آلے مختلف ملکاں دے رہنماواں نال ݙو پاسہ ملاقاتاں وی کریسن۔ ملاقاتاں اچ باہمی تعلقات، تجارت تے سرمایہ کاری، علاقائی تعاون تے آپسی دلچسپی دے ٻئے معاملیاں تے ڳالھ مہاڑ کیتی ویسی۔ وزیرِ اعظم محمد شہباز شریف کرغزستان دے صدر صادر ژاپاروف نال ݙو پاسہ ملاقات کریسن۔ ملاقات اچ پاکستان تے کرغزستان وچال ݙو پاسہ تعلقات دے تمام پہلواں دا جائزہ گھدا ویسی۔ وزیرِ اعظم دے دورہِ کرغزستان دے دوران تجارت تے سرمایہ کاری، توانائی، علاقائی روابط، تعلیم، سیاحت تے عوامی روابط دے ودھارے تے ڳالھ مہاڑ تھیسی۔ وفاقی وزراء جام کمال خان، عبدالعلیم خان تے عطااللہ تارڑ وی وزیرِ اعظم دے نال ہن۔