سانحہ پمز دے تمام متاثرہ خانداناں کیتے 50، 50 لکھ روپے مالی امداد دا اعلان کیتا ڳئے، ڈاکٹر طارق فضل چوہدری

اسلام آباد۔31اگست (اے پی پی) وفاقی وزیرِ پارلیمانی امور ڈاکٹر طارق فضل چوہدری آکھیا جو وزیرِ اعظم دی ہدایت تے سانحہ پمز اچ اللہ کوں پیارے تھیوݨ آلے تمام متاثرین دے خانداناں کیتے 50، 50 لکھ روپے مالی امداد دا اعلان کیتا ڳئے، 13 متاثرہ ماواں کوں چیک ݙتے ڳئن۔ پمز ہسپتال اچ میڈیا نال ڳالھ مہاڑ کریندیں ہوئیں انہاں آکھیا جو مالی امداد متاثرہ خانداناں دے ݙکھ تے نقصان دا مداوا نئی جڈانجو جو کچھ حکومت دے وس اچ اے ایں دے تحت متاثرہ خانداناں دی معاونت کیتے اے امداد فراہم کیتی ویندی پئی اے۔ انہاں آکھیا جو 13 متاثرہ خانداناں کوں امدادی چیک ݙتے ڳئن جڈانجو ہک خاندان ٻاقی اے جینکوں وی جلدی امدادی چیک فراہم کر ݙتا ویسی۔ ڈاکٹر طارق فضل چوہدری آکھیا جو پمز ہسپتال اچ علاج کیتے آوݨ آلے مریض تے انھاں دے لواحقین ملک دے مختلف علاقیاں، پشاور توں کشمیر تئیں توں آندن، پمز ہسپتال 1985ء اچ قائم تھیا ہا تاہم ایں نوعیت دا افسوسناک واقعہ ایں توں پہلے کݙاہیں پیش نئی آیا۔ انہاں اکھیا جو پمز دے ڈاکٹرز، نرسز تے ٻیا طبی عملہ متاثرین کوں علاج تے طبی سہولیات دی فراہمی کیتے بھرپور خدمات انجام ݙیندا پئے۔ انہاں آکھیا جو وزیرِ اعظم دی ہدایت تے واقعے دی تحقیقات کیتے تشکیل ݙتی ڳئی کمیٹی دی ابتدائی رپورٹ دی روشنی اچ ذمہ دار ڈاکٹرز تے انتظامی افسراں دے خلاف کارروائی دا آغاز کر ݙتا ڳئے۔