وزیرِ اعظم شہباز شریف کرغزستان دے دارالحکومت بشکیک پڄ ڳئن

بشکیک۔31اگست (اے پی پی) وزیرِ اعظم محمد شہباز شریف کرغزستان دے ترائے ݙینہوار دورے تے بشکیک پڄ ڳئن۔ سنوار کوں وزیرِ اعظم آفس دے میڈیا ونگ توں جاری بیان دے مطابق وزیرِ اعظم شنگھائی تعاون تنظیم دے سربراہ اجلاس اچ شرکت کریسن۔ بشکیک پڄݨ تے کرغزستان دی کابینہ دے چیئرمین عادلبیک قاسمالیف وزیرِ اعظم محمد شہباز شریف دا استقبال کیتا۔ وزیرِ اعظم محمد شہباز شریف شنگھائی تعاون تنظیم دے سربراہی اجلاس توں خطاب کریسن اتے علاقائی تے عالمی امور تے پاکستان دا موقف پیش کریسن۔ وزیرِ اعظم محمد شہباز شریف ایس سی او پلس سربراہی اجلاس اچ وی شرکت کریسن۔ وزیرِ اعظم ورلڈ نومیڈ گیمز دی افتتاحی تقریب اچ بطورِ مہمانِ خصوصی وی شرکت کریسن۔ دورے دے دوران وزیرِ اعظم محمد شہباز شریف شنگھائی تعاون تنظیم دے اجلاس اچ شرکت کرݨ آلے مختلف ملکاں دے رہنماواں نال ݙو پاسہ ملاقاتاں وی کریسن۔ ملاقاتاں اچ آپسی تعلقات، تجارت تے سرمایہ کاری، علاقائی تعاون تے آپسی دلچسپی دے ٻئے معاملیاں تے ڳالھ مہاڑ کیتی ویسی۔ وزیرِ اعظم محمد شہباز شریف کرغزستان دے صدر صادر ژاپاروف نال ݙو طرفہ ملاقات کریسن، ملاقات اچ پاکستان تے کرغزستان دے درمیان ݙوپاسہ تعلقات دا جائزہ گھدا ویسی۔ وزیرِ اعظم دے دورہِ کرغزستان دے دوران تجارت تے سرمایہ کاری، توانائی، علاقائی روابط، تعلیم، سیاحت تے عوامی روابط دے ودھارے تے ڳالھ مہاڑ تھیسی۔ نائب وزیرِ اعظم تے وزیرِ خارجہ محمد اسحاق ڈار تے وفاقی وزراء جام کمال خان، علیم خان تے عطااللہ تارڑ پاکستانی وفد اچ شامل ہن۔