این ڈی ایم اے دے نیشنل ایمرجنسیز آپریشن سینٹر ممکنہ چھل دی صورت حال پاروں الرٹ جاری کرݙتا

اسلام آباد۔31اگست (اے پی پی) نیشنل ڈیزاسٹر مینجمنٹ اتھارٹی (این ڈی ایم اے) دے نیشنل ایمرجنسیز آپریشن سینٹر ملک دے اتلے علاقیں اچ ممکنہ چھل دی صورتحال پاروں الرٹ جاری کر ݙتے، اُتلے علاقیں اچ آںدے مینھ پاروں دریاواں دے وہݨ اچ ودھارے دا ݙر اے۔این ڈی ایم اے توں جاری بیان موجب گلگت بلتستان، خیبر پختونخوا، آزاد کشمیر، پنجاب تے خطہ پوٹھوہار اچ آندے 48 گھنٹے دے دوران ممکنہ مینھ دے نتیجے اچ اچانک چھل دی صورت حال متوقع ہے۔ گلگت بلتستان اچ گلگت، دیامر، غذر، ہنزہ، سکردو، استور تے شگر سودھے مختلف علاقیں اچ اچانک چھل دی صورتحال پیدا تھیوݨ دا ݙر اے۔ خیبر پختونخوا اچ چترال، دیر، سوات، باجوڑ، شانگلہ، بٹگرام، کوہستان، مانسہرہ، ایبٹ آباد، نوشہرہ، صوابی تے مردان سودھے مختلف علاقیں اچ چھل دی صورتحال متوقع اے۔ آزاد کشمیر دے باغ، پونچھ، مظفرآباد، حویلی، بھمبر، سدھنوتی، میرپور تے کوٹلی اچ وی چھل دی صورتحال متوقع اے۔ اسلام آباد، راولپنڈی، اٹک، چکوال تے جہلم سودھے خطہ پوٹھوہار دے مختلف علاقیں اچ چھل دی صورتحال جݙاں جو ندی نالیں اچ طغیانی دا ݙر اے۔ لاہور، گوجرانوالہ، سیالکوٹ، گجرات، شیخوپورہ،نارووال، قصور،اوکاڑہ، منڈی بہاؤالدین، وزیرآباد، حافظ آباد تے سرگودھا دے علاقیں اچ چھل دی صورتحال متوقع اے۔ نوشہرہ، صوابی، مردان تے ٻئے نشیبی تے شہری علاقیں اچ وی چھل دی صورت حال دا ݙر اے۔ این ڈی ایم اے مقامی انتظامیہ کوں حساس علاقیں اچ ضروری وسائل پیشگی منتقل کرݨ تے محفوظ انخلاء دے انتظامات مکمل رکھݨ دی ہدایت کیتی اے تے آکھیے جو عوام چھل دے نالیں ،سڑکاں، پُلاں تے تکھے وہندے پاݨی کوں پار کرݨ توں گریز کرن جاری ٹریفک ہدایات تے عمل کرن ساوݨ دے دوران پہاڑی علاقیں اچ لینڈ سلائیڈنگ، ملبے دے ریلیں تے اچانک آوݨ آلی چھل دا خطرہ ودھ ویندے ۔ سفر توں پہلے موسم دی تازہ ترین پیش گوئی تے سڑکاں دی صورتحال ضرور معلوم کرن، عوام این ڈی ایم اے دی آفیشل ایپ “پاک این ڈی ایم اے ڈیزاسٹر الرٹ” توں وقتی معلومات حاصل کرن، کہیں وی ممکنہ چھل دی صورتحال اچ مدد کیتے 911 ڈائل کرن