وزیرِاعظم شہباز شریف دی ایس سی او سربراہانِ مملکت دے اجلاس دے موقع تے ایران دے صدر ڈاکٹر مسعود پزشکیان نال ملاقات، پاکستان تے ایران وچال نیڑے تے پراݨے تعلقات دا اعادہ

بشکیک ۔31اگست (اے پی پی) وزیرِاعظم محمد شہباز شریف تے ایران دے صدر ڈاکٹر مسعود پزشکیان پاکستان تے ایران وچال نیڑے تعلقات دا اعادہ کریندے سانجھے تعاون دے سارے شعبیں اچ ݙوپاسے تعلقات کوں مزید مستحکم بݨاوݨ دی اہمیت تے زور ݙتے۔ وزیرِاعظم دفتر دے میڈیا ونگ توں جاری بیان موجب وزیرِاعظم محمد شہباز شریف جمہوریہ کرغزستان دے دارالحکومت بشکیک اچ شنگھائی تعاون تنظیم دے سربراہانِ مملکت دے اجلاس دے موقع تے اسلامی جمہوریہ ایران دے صدر ڈاکٹر مسعود پزشکیان نال ملاقات کیتی۔ پرتپاک تے دوستانہ ماحول اچ تھیوݨ آلی ملاقات دے دوران ݙوہیں رہنماواں پاکستان تے ایران وچال نیڑے تے پراݨے تعلقات دا اعادہ کیتا تے سانجھے تعاون دے سارے شعبیں اچ ݙوطرفہ تعلقات کوں مزید مستحکم بݨاوݨ دی اہمیت دا ذکر کیتا۔ ݙوہیں رہنماواں ایں حوالے نال اڄوکے سال جون اچ صدرپزشکیان دے دورہِ پاکستان دے دوران کیتے ڳئے فیصلیں تے عملدرآمد دی اہمیت تے وی زور ݙتا۔ ݙوہیں رہنماواں علاقائی رابطے دے ودھارے تے عوامی سطح تے رابطے مزید ودھاوݨ کیتے جاری کوششاں دا وی جائزہ ڳھدا۔ ملاقات دے دوران علاقائی صورتحال اچ تھیوݨ آلی تازہ پیش رفت تے وی ڳالھ کیتی۔ وزیرِاعظم ایں عزم دا اعادہ کیتا جو پاکستان خطے اچ امن دے قیام کیتے آپݨیاں مخلصانہ کوششاں جاری رکھیسی۔ انہاں آکھیا جو فیلڈ مارشل سید عاصم منیر دا اڄوکا دورہِ تہران تے انھاں دے تعمیری رابطے نال چنڳے نتیجے دی امید اے۔ وزیرِاعظم خطے اچ پائیدار امن تے استحکام کیتے تحمل، ضبط و برداشت تے مسلسل سفارتی رابطیں دی اہمیت تے زور ݙتا۔ انہاں اسلام آباد مفاہمتی یادداشت دے تحت طے پاوݨ آلی مفاہمت کوں اڳوں ودھاوݨ دی لوڑھ تے وی زور ݙتا تے آکھیا جو خطے اچ دیرتئیں  امن دے قیام کیتے اے واحد قابلِ عمل رستہ اے۔ صدر ڈاکٹر مسعود پزشکیان علاقائی امن و سلامتی کیتے پاکستان دی مسلسل سفارتی کوششاں دی تعریف کیتی۔ ایرانی صدر پاکستان تے ایران دے تعلقات دی پائیدار مضبوطی کوں اجاگر کریندے آکھیا جو ݙوہیں ملکاں دے تعلقات صدیاں تے محیط مشترکہ تاریخ، ثقافت تے مذہب دیاں مضبوط بنیاداں تے استوار ہن۔ انہاں مختلف شعبیں اچ تعاون کوں مزید وسعت ݙیوݨ کیتے تہران دی بھرپورخواہش دا اعادہ کیتا۔ صدرپزشکیان عصرِ حاضر دے چیلنجز نال نبڑݨ کیتے امتِ مسلمہ وچال اتحاد و یکجہتی ودھاوݨ دی لوڑھ تے اہمیت دا ذکر کیتا۔ وزیرِ اعظم محمد شہباز شریف صدر ڈاکٹر مسعود پزشکیان کوں انھاں دی سہولت موجب تکھے توں تکھے پاکستان دے سرکاری دورے دی دعوت ݙتی۔ ایرانی صدر وی وزیرِاعظم محمد شہباز شریف کوں دسمبر 2026ء اچ تہران اچ منعقد تھیوݨ آلے آئندہ اقتصادی تعاون تنظیم (ای سی او) سربراہی اجلاس اچ شرکت دی دعوت ݙتی۔ ملاقات اچ وفاقی وزیرِ اطلاعات و نشریات عطاء اللہ تارڑ، معاونِ خصوصی وزیرِاعظم سید طارق فاطمی تے سیکرٹری خارجہ آمنہ بلوچ، ایرانی وزیرِ خارجہ عباس عراقچی تے ٻئے اعلیٰ حکام وی موجود ہن۔