وزیرِاعظم شہباز شریف دی ایس سی او سربراہانِ مملکت دے اجلاس دے موقع تے ازبکستان دے صدر نال ملاقات

بشکیک ۔31اگست (اے پی پی) وزیرِ اعظم محمد شہباز شریف بشکیک اچ شنگھائی تعاون تنظیم (ایس سی او) سربراہانِ مملکت دے اجلاس دے موقع تےجمہوریہ ازبکستان دے صدر عزت مآب شوکت مرزیایوف نال ملاقات کیتی۔وزیرِ اعظم صدر شوکت مرزیایوف تے بھرا ملک ازبکستان دے عوام کوں ازبکستان دی آزادی دی 35ویں سالگنڈھ تے دلی مبارخ پیش کیتی۔وزیرِاعظم فروری 2026ء اچ صدر مرزیایوف دے دورہِ پاکستان دا ذکر کریندے آکھیا جو ایں دورے تے اعلیٰ سطحی اسٹریٹجک تعاون کونسل دے پہلے اجلاس پاکستان تے ازبکستان وچال اسٹریٹجک شراکت داری کوں نویں رفتار ݙتی اے۔وزیرِاعظم قیادت دی سطح تے کیتے ڳئے فیصلیں، خصوصاً تجارت، سرمایہ کاری، علاقائی رابطیں تے اقتصادی تعاون متعلق فیصلیں تے وقتی عملدرآمد دی اہمیت تے زور ݙتا۔انہاں 2029ء تئیں ݙوطرفہ تجارت دا حجم 2 ارب امریکی ڈالر تئیں ودھاوݨ دے مشترکہ ہدف دا اعادہ کریندے توسیع شدہ ترجیحی تجارتی معاہدے تے موثر عملدرآمد، کاروباری سطح تے رابطے ودھاوݨ تے سانجھے مفاد تے مبنی مشترکہ منصوبیں دے ودھارے دی اہمیت دا ذکر کیتا۔علاقائی رابطیں کوں مشترکہ اسٹریٹجک ترجیح قرار ݙیندے ہوئیں وزیرِاعظم ازبکستان، افغانستان، پاکستان ریلوے منصوبے دی اہمیت اجاگر کیتی، جیڑھی وسطی تے جنوبی ایشیا کوں باہم منسلک کرݨ تے ازبکستان کوں پاکستان دیاں بندرگاہواں تئیں رسائی ݙیوݨ اچ کلیدی کردار ادا کر سڳدے۔وزیرِ اعظم فضائی رابطیں اچ ودھارے، بالخصوص تاشقند۔کراچی براہِ راست پروازاں دے حوالے نال پیشرفت دی وی حمایت کیتی۔وزیرِ اعظم شنگھائی تعاون تنظیم دی کونسل آف ہیڈز آف اسٹیٹ دی آندے پاکستان دی صدارت کیتے ازبکستان دی حمایت دی تعریف کیتی تے علاقائی سلامتی، رابطیں، تجارت تے پائیدار ترقی کیتے ازبکستان نال نیڑے تعاون جاری رکھݨ دی خواہش دا اظہار کیتا۔وزیرِاعظم ازبکستان دے نال اسٹریٹجک شراکت داری کوں مزید مستحکم کرݨ دے پاکستان دے عزم دا اعادہ کریندے ہوئیں آکھیا جو ݙوہیں ملکاں دے بہترین سیاسی تعلقات کوں عوام کیتے ٹھوس معاشی فائدیں اچ تبدیل کیتا ویسی۔ملاقات اچ وفاقی وزیرِ تجارت جام کمال خان، وفاقی وزیرِ مواصلات عبدالعلیم خان تے وفاقی وزیرِاطلاعات و نشریات عطا اللہ تارڑ وی موجود ہن۔