نائب وزیرِ اعظم اسحاق ڈار دی کرغز وزیرِ خارجہ نال ملاقات، ݙوپاسہ تعلقات کوں ٻیا مضبوط بݨاوݨ دا عزم

بشکیک۔2ستمبر (اے پی پی) نائب وزیرِ اعظم اتے وزیرِ خارجہ سینیٹر محمد اسحاق ڈار بدھ کوں بشکیک اچ وزیرِ اعظم محمد شہباز شریف دی کرغزستان دے صدر صادر ژاپاروف نال ملاقات توں پہلے کرغز وزیرِ خارجہ ژین بیک کلوبایف نال ملاقات کیتی۔ دفترِ خارجہ دے مطابق نائب وزیرِ اعظم کرغزستان ولوں شنگھائی تعاون تنظیم دی کامیاب قیادت، ایس سی او سربراہی اجلاس دی مؤثر میزبانی تے چھینویں عالمی نومیڈ گیمز دی افتتاحی تقریب دے کامیاب انعقاد تے وزیرِ خارجہ کلوبایف کوں مبارکباد ݙتی۔ انہاں ایس سی او دے ایجنڈے کوں اڳوں ودھاوݨ اچ کرغزستان دی قیادت کوں سراہیا۔ نائب وزیرِ اعظم تجارت، سرمایہ کاری، توانائی، رابطہ، علاقائی سلامتی تے عوامی سطح تے رابطیاں دے فروغ تے توجہ مرکوز کریندے ہوئیں ݙوپاسہ تعلقات کوں ٻیا مضبوط بݨاوݨ دے پاکستان دے عزم دا اعادہ کیتا۔ کرغزستان دے وزیرِ خارجہ کلوبایف پاکستان کوں 2026-27 کیتے ایس سی او کونسل آف ہیڈز آف سٹیٹ دی صدارت سنبھالݨ تے مبارکباد ݙیندیں ہوئیں ایں اعتماد دا اظہار کیتا جو پاکستان تنظیم دے ایجنڈے کوں اڳوں ودھاوݨ اچ مؤثر قیادت فراہم کریسی۔ انہاں کرغزستان دے پاکستان دے نال قریبی تے دوستانہ تعلقات دا ذکر کریندیں ہوئیں آپسی دلچسپی دے شعبیاں اچ ݙوپاسہ تعاون کوں ٻیا وسعت ݙیوݨ کیتے آمادگی دا اظہار کیتا۔ ݙوہیں پاسوں علاقائی تے بین الاقوامی صورتحال تے وی ڳالھ مہاڑ کیتی ڳئی اتے امن، استحکام تے مشترکہ خوشحالی دے فروغ کیتے ایس سی او تے ٻئے کثیرالجہتی فورمز اچ قریبی رابطہ جاری رکھݨ تے اتفاق کیتا ڳیا۔ نائب وزیرِ اعظم دے نال وفاقی وزیرِ مواصلات عبدالعلیم خان، وفاقی وزیرِ تجارت جام کمال خان، وزیرِ اعظم دے معاونِ خصوصی برائے امورِ خارجہ طارق فاطمی تے سیکرٹری خارجہ آمنہ بلوچ وی ہن۔