پاکستان اتے کرغزستان دا اہم شعبیاں اچ تعلقات کوں ودھارا ݙیوݨ، اقتصادی شراکت داری کوں نویاں بلندیاں تے گھن ونڄݨ کیتے عملی اقدامات تے اتفاق، ݙوپاسہ تجارتی حجم کوں 200 ملین ڈالر توڑیں ودھاوݨ دا عزم رکھیندوں، وزیراعظم شہباز شریف

بشکیک۔2ستمبر (اے پی پی) پاکستان تے کرغزستان تعلیم، صحت، تجارت، ماحولیاتی تبدیلی، سائنس تے ٹیکنالوجی تے ثقافت سمیت مختلف شعبیاں اچ تعلقات کوں ودھارا ݙیوݨ تے اقتصادی شراکت داری کوں نویاں بلندیاں تے گھن ونڄݨ کیتے عملی تے نتیجہ خیز اقدامات تے اتفاق کیتے جݙاں جو وزیراعظم محمد شہباز شریف آکھیا جو کرغزستان وسطی ایشیا اچ پاکستان دا اہم شراکت دار اے، ݙوہیں ملکاں وچال راہداری تجارت معاہدہ خوش آئند پیشرفت اے، معاہدیاں تے مفاہمت دیاں یادداشتاں تے دستخط ݙوپاسہ تعاون دے فروغ دے نویں دور دا آغاز اے، موجودہ ݙوپاسہ تجارت دے حجم کوں آندے ݙو سال اچ 16 ملین ڈالر توں 200 ملین ڈالر توڑیں ودھاوݨ دا عزم اے، کاسا1000 منصوبے دی بروقت تکمیل ضروری اے، دہشت گردی، انتہا پسندی تے ٻئے عصری خطراں نال نبڑݨ کیتے تعاون ودھیسوں۔ کرغزستان دے صدر صادر ژاپاروف ݙوہیں ملکاں وچال اعلیٰ سطحی رابطیاں تے آپسی تعلقات کوں نویں سطح تے گھن ونڄݨ دے سانجھے عزم دا اظہار کریندیں ہوئیں آکھیا جو ݙوہیں ملکاں وچال سرمایہ کاری دے وسیع موقع موجود ہن، پاکستان دے نال ادویہ سازی، زراعت، توانائی، ہلکی مشینری، سیاحت، ڈیجیٹل معیشت، ورچوئل اثاثیاں تے ٻئے شعبیاں اچ مشترکہ منصوبیاں تے عملدرآمد کیتے تیار ہیسے۔ اے ڳالھیں انہاں بدھ کوں اتھاں پاکستان تے کرغزستان وچال مختلف شعبیاں اچ تعاون دے فروغ کیتے معاہدیاں دیاں دستاویزاں دے تبادلیاں دی تقریب دے موقعے تے مشترکہ نیوز کانفرنس نال خطاب کریندیں ہوئیں کیتا۔ وزیراعظم محمد شہباز شریف آکھیا جو پہاڑاں اچ گھریئے خوبصورت شہر بشکیک اچ موجودگی تے خوشی اے، پرخلوص تے فراخدلانہ میزبانی تے کرغزستان دے صدر صادر ژاپاروف تے کرغز عوام دے شکر گزار ہیسے، کرغزستان دے عوام کوں پاکستان دے عوام ولوں یومِ آزادی تے نومیڈ گیمز دی میزبانی تے دلی مبارکباد پیش کریندوں، میکوں وی افتتاحی تقریب اچ شرکت دا موقع ملیا، پاکستان وی اِنہاں کھیڈاں اچ حصہ گھندا پئے۔ وزیراعظم کرغزستان کوں اقوامِ متحدہ دی سلامتی کونسل دا 2027-28 کیتے غیر مستقل رکن منتخب تھیوݨ تے شنگھائی تعاون تنظیم دی کامیاب چیئرمین شپ تے وی مبارکباد ݙتی۔ وزیراعظم آکھیا جو نائب وزیراعظم تے وزیرِ خارجہ اسحاق ڈار تے انہاں دی ٹیم کرغزستان دے اقوامِ متحدہ دی سلامتی کونسل دے غیر مستقل رکن دے انتخاب کیتے انتھک کوششاں کیتیاں، کرغزستان دے صدر دی قیادت اچ ملک دی شاندار ترقی توں بہت متاثر تھیوں اتے کرغزستان متاثر کن اقتصادی اہداف حاصل کیتے ہن تے ایں ترقی کوں عوامی خدمت دا دائرہ وسیع کرݨ تے کمزور طبقات کیتے سہولتاں دی فراہمی دے ذریعے بہتر معیارِ زندگی اچ تبدیل کرݨ کیتے بامقصد اقدامات چاتن۔ وزیراعظم آکھیا جو پاکستان کرغزستان دے نال ݙوہیں ملکاں وچال تعاون دے فروغ تے ݙوہیں ملکاں وچال دوستی کوں مضبوط بݨاوݨ دا خواہاں اے جو قوماں وچال امن تے تعاون دے حوالے نال اساݙا مشترکہ مقصد اے، ایں سلسلے اچ اڄ اساݙی انتہائی تعمیری تے مفید ڳالھ مہاڑ تھئی اے جیندے اچ تجارتی تعلقات دے فروغ تے توجہ مرکوز کیتی ڳئی، جیندے بعد ݙوپاسہ تعاون تے ݙوہیں ملکاں وچال اقتصادی روابط دے فروغ کیتے مختلف ایم او یوز تے دستخط کیتے ڳئن۔ وزیراعظم آکھیا جو اقتصادی شعبے اچ تعاون اساݙی ڳالھ مہاڑ دا محور ہئی، پاکستان کرغزستان دے نال برادرانہ تعلقات کوں ٻیا وسعت ݙیوݨ چاہندے، اساں ایں گالھ تے اتفاق کیتے جو اقتصادی شراکت داری کوں ٻیا عملی تے نتیجہ خیز مرحلے آلے پاسے گھن ونڄݨا چاہیدے، ایں سلسلے اچ عملی اقدامات دے جامع منصوبے تے عمل کیتا ویسے جیندے مقصد ݙوپاسہ تجارت دا حجم بتدریج 200 ملین ڈالر توڑیں ودھاوݨ، تجارتی طریقہ کار کوں بہتر بݨاوݨ، مشترکہ سرمایہ کاری دے منصوبیاں کوں ودھارا ݙیوݨ، صنعتی تعاون کوں مضبوط بݨاوݨ تے براہ راست کاروباری روابط کوں وسعت ݙیوݨ اے۔ انہاں آکھیا جو ݙوہیں ملکاں دے وچال معاہدیاں تے مفاہمت دیاں یادداشتاں تے دستخط ݙوپاسہ تعاون دے فروغ دے نویں دور دا آغاز اے۔ وزیراعظم آکھیا جو ایں ویلھے پاکستان تے کرغزستان وچال ݙوپاسہ تجارت دا حجم صرف 16 ملین ڈالر اے جو اساݙی دوستی، بھراپے تے مضبوط تعلقات نال کہیں صورت مطابقت نئی رکھدا، اساکوں ایں گالھ کوں یقینی بݨاوݨا پوسی جو آندے ݙو سال اچ ݙوپاسہ تجارت دا حجم 16 ملین ڈالر توں ودھا تے 200 ملین ڈالر توڑیں گھن ونڄوں، اے کوئی مشکل ڳھٹ کائنی۔ وزیراعظم آکھیا جو پاکستان دے کاروباری تے مالیاتی اداریاں دی کرغزستان دے کاروباری تے مالیاتی اداریاں دے ذمہ واراں نال وسیع تر رابطیاں دا خیرمقدم کریندوں تانجو ݙوپاسہ اقتصادی تعاون دے مشترکہ وژن کوں اڳوں ودھایا ونڄ سڳے۔ پاکستان تے کرغزستان دی الحکومتاں اتے نجی شعبے وچال تجارتی تعلقات کوں ودھیسوں۔ رابطہ کاری جنوبی ایشیا تے وسطی ایشیا وچال اقتصادی تعلقات کیتے اساݙے مشترکہ وژن دا محور اے۔ اساں راہداری تجارت دے معاہدے دا خیرمقدم کریندوں جیندے نال ݙوپاسہ تجارت کوں فروغ ملسی، سفری سہولتاں بہتر تھیسن تے علاقائی سطح تے رابطے کیتے نویں موقع پیدا تھیسن۔ وزیر اعظم 4 ملکی راہداری معاہدے تے عملدرآمد دے عزم دا اعادہ کیتا اتے آکھیا جو ٹرانسپورٹ، کسٹمز تے انتظامی طریقہ کار کوں آسان بݨاوݨ تے اتفاق کیتا ڳئے۔ توانائی دے شعبے اچ تعاون اساݙی شراکت داری دا اہم ستون اے۔ اساں کاسا1000 منصوبے دی بروقت تکمیل دا اعادہ کریندوں اتے بجلی، پن بجلی، متبادل توانائی، توانائی دے بنیادی ڈھانچے تے جدید ٹیکنالوجی بارے عملی تعاون کیتے مشترکہ ورکنگ گروپ دا قیام خوش آئند اے۔ وزیراعظم آکھیا جو ݙوہیں برادر ملکاں وچال سکیورٹی تے دفاع دے شعبیاں اچ تعاون تے وی ڳالھ تھئی اے، اساں دہشت گردی، انتہا پسندی تے ٻئے عصری خطراں نال نبڑݨ کیتے تعاون ودھاوݨ کیتے آپݨے عزم دا اعادہ کریندوں۔ ایں موقعے تے کرغزستان دے صدر صادر ژاپاروف آکھیا جو وزیراعظم محمد شہباز شریف اتے انہاں دے وفد کوں کرغزستان اچ خوش آمدید آکھدوں ۔ پاکستان دے میݙے دورے دے بعد صدر آصف علی زرداری وی ایں سال جولائی اچ کرغزستان دا دورہ کیتا ہئی۔ مختصر عرصے اچ ݙوہیں ملکاں وچال اعلیٰ سطحی رابطے مضبوط آپسی اعتماد تے کرغزستان پاکستان تعلقات کوں نویں سطح تے گھن ونڄݨ دے سانجھے عزم دا عکاس ہن ۔ پاکستان دے نال اساݙے برادرانہ تعلقات ہن ۔ پاکستان دے نال ݙوپاسہ تعاون ودھاوݨ چاہندوں۔ انہاں آکھیا جو ݙوہیں ملکاں وچال سرمایہ کاری دے وسیع موقع موجود ہن۔ ݙوہیں ملکاں وچال اعلیٰ سطح دے رابطیاں کوں ٻیا فروغ ݙتا ویسے۔ پاکستان دے نال تعلقات کوں نویاں بلندیاں توڑیں گھن ونڄݨ چاہندوں ۔ کرغز صدر آکھیا جو معیشت دا شعبہ کرغزستان تے پاکستان دی شراکت داری دا وݙا ستون اے۔ اساں ݙوپاسہ تجارت کوں فروغ ݙیوݨ تے سرمایہ کاری ودھاوݨ کیتے منظم اقدامات تے اتفاق کیتے۔ انہاں آکھیا جو اساں توانائی دے شعبے اچ تعاون جاری رکھیسوں۔ کاسا1000 منصوبہ جنوبی ایشیا دی ودھدی ہوئی ضروریات پورا کرݨ کیتے انتہائی اہمیت دا حامل اے، عوام دی سطح تے رابطے ݙوہیں ملکاں وچال دوستی دی مضبوط بنیاد ہن، ہزاراں پاکستانی طالب علم کرغزستان اچ بالخصوص میڈیکل دی تعلیم حاصل کریندے پئن جو اڳوں ونڄ تے ݙوہیں ملکاں وچال تعلقات کوں مضبوط بݨاوݨ دا ذریعہ بݨسن، سائنس، ثقافت، سیاحت، نوجواناں دے دوریاں تے کھیڈاں دا شعبہ وی ݙوپاسہ تعلقات اچ اہمیت دا حامل اے۔ پاکستان دا کھیڈاں دا ہک وݙا دستہ چھینویں عالمی نومیڈ گیمز اچ حصہ گھندا پئے۔ اج دی ڳالھ مہاڑ توں پاکستان تے کرغزستان وچال تعاون کوں ٻیا مضبوط بݨاوݨ تے ݙوہیں ملکاں وچال دوستی کیتے مضبوط بنیاد رکھی ڳئی اے۔ ایں توں پہلے ݙوہیں ملکاں وچال مختلف شعبیاں اچ تعاون دے فروغ کیتے معاہدیاں تے مفاہمت دیاں یادداشتاں دا وی تبادلہ کیتا ڳیا جݙاں جو وزیراعظم محمد شہباز شریف تے کرغزستان دے صدر صادر ژاپاروف مشترکہ اعلامیہ تے دستخط تے دستاویز دا تبادلہ کیتا۔