پاکستان تے کرغزستان ݙوپاسے تجارت دا حجم 2 سال اچ 200 ملین ڈالر تئیں پڄاوݨ دے معاہدے تے دستخط کر ݙتن

بشکیک۔2ستمبر(اے پی پی) پاکستان تے کرغزستان ݙوپاسے تجارت دا حجم 2 سال اچ 200 ملین ڈالر تئیں پڄاوݨ دے معاہدے تے دستخط کر ݙتن جݙاں جو وزیراعظم محمد شہباز شریف آکھیے جو پاکستان تے کرغزستان وچال سالانہ 16 ملین ڈالر دی ݙوپاسے تجارت ٻہوں گھٹ اے، ݙو سال اچ ݙوپاسے تجارتی حجم 200 ملین ڈالر تئیں ودھاوݨ کیتے مفاہمت دی یادداشت کوں معاہدے اچ تبدیل کرݨ تے صدر صادر ژاپاروف دے شکر گزار ہیسے۔ وزیراعظم محمد شہباز شریف دی وطن واپسی توں پہلے ایئرپورٹ تے ݙوہیں ملکاں وچال ݙوپاسے تجارتی حجم 200 ملین ڈالر تئیں ودھاوݨ دے معاہدے تے نائب وزیراعظم و وزیرخارجہ محمد اسحاق ڈار تے کرغزستان دے وزیر خارجہ ژین بیک کولوبایف دستخط کیتے تے دستاویز دا تبادلہ کیتا۔ ایں موقع تے کرغزستان دے صدر صادر ژاپاروف تے وزیراعظم محمد شہباز شریف وی موجود ہن۔ایئر پورٹ تے میڈیا نال ڳالھ مہاڑ کریندے وزیراعظم محمد شہباز شریف آکھیے جو اساݙیاں مثبت ملاقاتاں تھئن، ٻئے معاملیں تے ڳالھ مہاڑ دے نال نال پاکستان تے کرغزستان وچال تجارت ودھاوݨ تے اتفاق تھیا۔ انہاں آکھیا جو پاکستان تے کرغزستان وچال چنڳے تے برادرانہ تعلقات ہن۔ کرغزستان تے پاکستان دی سالانہ تجارت صرف 16 ملین ڈالر اے جیڑھی ݙوپاسے گھاٹے تعلقات دے مقابلے اچ ٻہوں گھٹ اے۔ وزیراعظم آکھیا جوانہاں کرغزستان دے صدر کوں تجویز پیش کیتی جو ݙو سال اچ ݙوپاسے تجارت 200 ملین ڈالر تئیں ودھاوݨ کیتے مفاہمت دی یادداشت دی بجائے معاہدے تے دستخط کیتے ونڄن جیڑھے ݙوپاسے تجارتی حجم دا ہدف حاصل کرݨ دی طرف ہک اہم قدم ہوسی۔ کرغزستان دے صدر میݙی تجویز نال اتفاق کیتا تے ایئرپورٹ ایں سلسلے اچ معاہدے تے دستخط کیتے ڳئن۔ انہاں آکھیا ݙوپاسے تجارت کوں ݙو سال اچ 200 ملین ڈالر تئیں گھن ونڄݨ دے معاہدے تے صدرکرغزستان دا شکر گزارہاں۔