عدالتاں دی مؤثر کارکردگی تے انصاف ݙیوݨ کیتے مناسب انفراسٹرکچر تے وقتی مالی معاونت ناگزیر اے، چیف جسٹس یحییٰ آفریدی

اسلام آباد۔2ستمبر (اے پی پی) چیف جسٹس پاکستان جسٹس یحییٰ آفریدی آکھیے جو عدالتاں دی مؤثر کارکردگی تے انصاف ݙیوݨ کیتے مناسب عدالتی انفراسٹرکچر تے وقتی مالی معاونت ناگزیر اے، عدالتی اصلاحات دے اہداف کوں عملی شکل ݙیوݨ کیتے عدلیہ تے صوبائی حکومت وچال مسلسل ادارہ جاتی رابطہ ضروری اے۔ سپریم کورٹ دے شعبہ تعلقات عامہ دے جاری اعلامیے موجب سپریم کورٹ کراچی رجسٹری اچ چیف جسٹس پاکستان جسٹس یحییٰ آفریدی دی زیر صدارت سندھ اچ عدالتی شعبے دے ترقیاتی منصوبیں متعلق اجلاس تھیا جیندے اچ سندھ ہائی کورٹ دے چیف جسٹس جسٹس ظفر احمد راجپوت، سندھ دے وزیر قانون، چیف سیکرٹری سندھ تے سیکرٹری خزانہ سندھ شرکت کیتی۔اجلاس اچ تریمتاں کیتے سہولت مراکزی دی تعمیر، صوبائی و وفاقی عدالتاں کوں موزوں عمارتاں اچ منتقل کرݨ، جاری عدالتی انفراسٹرکچر منصوبیں دی بلا تعطل تکمیل تے وقتی فنڈز ݙیوݨ متعلق امور دا جائزہ ڳھدا ڳئے۔ اجلاس اچ کورنگی ڈسٹرکٹ کورٹس کمپلیکس متعلق معاملے وی زیر بحث آئے، زیر التوا امور حل کرݨ تے منصوبے تے پیش رفت تکھے کرݨ تے زور ݙتا ڳئے۔ چیف جسٹس پاکستان آکھیا جو عدالتی اصلاحات دے اہداف کوں عدالتاں دے انفراسٹرکچر، عوامی سہولت تے سروس ڈیلیوری اچ عملی بہتری اچ تبدیل کرݨ کیتے عدلیہ تے صوبائی حکومت وچال مسلسل رابطہ ناگزیر اے۔سندھ حکومت دے نمائندیں عدالتی شعبے کیتے تعاون جاری رکھݨ تے نظامِ انصاف کوں تکڑا بݨاوݨ آلے منصوبیں کوں ترجیح ݙیوݨ دے عزم دا اظہار کیتا۔ انہاں یقین ݙیوائے جو متعلقہ محکمے عدلیہ دے نال نیڑے رابطہ برقرار رکھیندے زیرالتوا معاملات حل کرݨ تے منصوبیں دی وقتی تکمیل اچ معاونت کریسن۔ چیف جسٹس پاکستان آکھیا جو سارے سٹیک ہولڈرز بالخصوص سندھ ہائی کورٹ، بار تے سندھ حکومت دے وچال مسلسل مشاورت تے نیڑے رابطے دے ذریعے آپت دے اتفاق نال قابلِ عمل حل کڈھیا ویسے۔ انہاں آکھیا جو اے اقدامات وسیع ترعدالتی اصلاحاتی ایجنڈے دا حصہ ہن جنہاں دا مقصد بہتر انفراسٹرکچر، ٹیکنالوجی توں فیدہ چاوݨ آلی سہولتاں تے مضبوط عوامی سہولت کاری دے ذریعے انصاف دے اداریں کوں ٻیا قابلِ رسائی، مؤثر، عوام مرکز تے عوامی ضرورتاں کیتے جوابدہ بݨاوݨ اے۔