نارووال اچ ہندو مندر دے حوالے نال بھارتی وزارتِ خارجہ دے دعوے من گھڑت پروپیگنڈا ہن، ترجمان دفترِ خارجہ

اسلام آباد۔ 04 ستمبر (اے پی پی) پاکستان نارووال اچ ہندو مندر دے حوالے نال بھارتی وزارتِ خارجہ دے کوڑے تے سیاسی مقاصداں تے مبنی دعویاں کوں یکسر مسترد کریندے ہوئیں آکھیا جو اے من گھڑت پروپیگنڈا اے۔ ترجمان دفترِ خارجہ سجاد حیدر خان جمعے کوں میڈیا دے سوالاں دے جواب اچ اڈا سراج نارووال اچ ہندو مندر نال متعلق بھارتی وزارتِ خارجہ دے بیان تے سخت ردِعمل دا اظہار کریندیں ہوئیں آکھیا جو اساں مندر دے حوالے نال بھارتی وزارتِ خارجہ ولوں کیتے ڳئے کوڑے تے سیاسی مقاصداں تے مبنی دعویاں کوں مسترد کریندوں۔ ترجمان آکھیا جو بھارت ولوں کھنڈائے ونڄݨ آلے کوڑے پروپیگنڈے دے برعکس مندر دی عمارت کوں 21 جولائی 2026ء کوں شدید بارشاں دی وجہ نال نقصان تھیا ہئی۔ انہاں آکھیا جو مقامی حکام بارش نال تھیوݨ آلے نقصان دا پہلے ای جائزہ گھن ڳھدا ہئی اتے عمارت دی بحالی کیتے اقدامات شروع کر ݙتے ڳئے ہن۔ ترجمان آکھیا جو اے ڳالھ باعثِ شرم اے جو بھارت حقائق کوں توڑ مروڑ تے پیش کریندا پئے اتے سستی چالاں دا سہارا گھندا پئے۔ انہاں آکھیا جو حقائق کوں ایں طرحاں دانستہ مسخ کرݨ بھارت اچ اقلیتاں دے خلاف منظم ظلم و ستم تے انہاں دی عبادت گاہواں تے ریاستی سرپرستی اچ تھیوݨ آلے حملیاں دے انتہائی خراب ریکارڈ توں توجہ نئی ہٹا سڳدا۔ ترجمان آکھیا جو دنیا ہندوتوا نظریے کوں اقلیتاں دے خلاف بطور ہتھیار استعمال کیتے ونڄݨ توں بخوبی آگاہ اے اتے ایں کوں بھارتی قیادت کوں مسلم، سکھ تے مسیحی برادریاں دے خلاف جاری ظلم و ستم دا جواب دہ ٹھہراوݨا چاہیدے۔