سکیورٹی فورسز دیاں بلوچستان دے مختلف ضلعیاں اچ کارروائیاں، فتنہ الہندوستان اتے فتنہ الخوارج دے 36 دہشتگرد جہنم واصل

راولپنڈی۔ 04 ستمبر(اے پی پی)سکیورٹی فورسز پچھلے 24 ڳھنٹے اچ بلوچستان دے مختلف ضلعیاں اچ انٹیلی جنس کارروائیاں اچ بھارتی پراکسیز فتنہ الہندوستان اتے فتنہ الخوارج دے 36 دہشتگرد جہنم واصل کر ݙتے ڳئن۔ پاک فوج دے شعبہ تعلقات عامہ (آئی ایس پی آر) موجب سکیورٹی فورسز بلوچستان دے ضلعیاں مستونگ، کوئٹہ، قلات اتے سبی اچ انٹیلی جنس کارروائیاں کیتن جیندے اچ بھارتی پراکسیز فتنہ الہندوستان اتے فتنہ الخوارج دے 36 دہشتگرد جہنم واصل تھئن۔ 4 ستمبر کوں مستونگ اچ آپریشن ویلھے سکیورٹی فورسز بھرپور کارروائی کریندے ہوئے 6 بھارتی سپانسرڈ دہشتگرداں کوں جہنم واصل کیتے، دہشت گرداں دے قبضے توں برآمد گولہ بارود دے ذخیرے اتے دیسی ساختہ دھماکہ خیز آلات کوں موقعے تے ہی تباہ کر ݙتا ڳیا۔ ہک ٻیا انٹیلی جنس بیسڈ آپریشن ضلع کوئٹہ دے علاقے شعبان اچ کیتا ڳیا ڄیندے اچ فتنہ الخوارج دے 4 ٹھکاݨیاں کوں کامیابی نال نشانہ بݨیندے ہوئے 26 خوارجی دہشت گرداں کوں جہنم واصل کیتا ڳیا۔ قلات اچ کیتے ڳئے انٹیلی جنس بیسڈ آپریشن اچ سکیورٹی فورسز دہشت گرداں دے ٹھکاݨے تے چھاپہ ماریا اتے ݙو بھارتی سپانسرڈ دہشتگرداں کوں جہنم واصل کیتا۔ ضلع سبی دے علاقے بھاگ اچ سکیورٹی فورسز بھرپور جوابی کارروائی کریندے ہوئے ݙو بھارتی سپانسرڈ دہشتگرداں کوں جہنم واصل کیتے پچھلے 48 اتے 72 گھنٹیاں اچ بلوچستان اچ بھارتی پراکسیز فتنہ الہندوستان اتے فتنہ الخوارج دے 48 دہشتگرداں کوں جہنم واصل کیتا ڳئے۔ 2026ء اچ آپریشنز دے دوران 1188 توں ودھ دہشت گرداں کوں بلوچستان اچ جہنم واصل کیتا ونڄ چکیے۔