پاک بحریہ دے بہادر سپوتاں کوں سلام، 8 ستمبر انہاں دی عظیم قربانیاں، شجاعت تے بے مثال کارنامیاں دی یاد ݙویندے، محسن نقوی

اسلام آباد۔ 08 ستمبر (اے پی پی) وفاقی وزیرِ داخلہ محسن نقوی نیوی ڈے دے موقع تے پاک بحریہ دے افسراں تے جواناں کوں شاندار خراجِ تحسین پیش کریندیں ہوئیں آکھیا جو 8 ستمبر پاک بحریہ دے بہادر سپوتاں دیاں عظیم قربانیاں، شجاعت تے بے مثال کارنامیاں دی یاد ݙویندے۔ وزیرِ داخلہ آپݨے خصوصی سنیھے اچ آکھیا جو پاک بحریہ دے جانبازاں دیاں پیشہ ورانہ صلاحیتاں، بہادری تے قربانیاں قوم کیتے باعثِ فخر ہن اتے پوری قوم آپݨے غازیاں تے شہداء کوں سلام پیش کریندی اے۔ انہاں آکھیا جو 8 ستمبر 1965ء دا ڈینہہ پاک بحریہ دیاں تاریخ ساز کامیابیاں دا درخشاں باب اے ڄݙاں بحریہ دے شیر دل جواناں آپݨی سمندری سرحداں دا ناقابلِ تسخیر دفاع کر تے تاریخ رقم کیتی۔ محسن نقوی آپریشن دوارکا دا ذکر کریندیں ہوئیں آکھیا جو ایں تاریخی معرکے اچ پاک بحریہ دشمن دے غرور کوں مٹی اچ ملا ݙتا اتے 1965ء دی جنگ اچ مخالف کوں دندان شکن جواب ݙتا۔ انہاں آکھیا جو معرکہ حق اچ پاک بحریہ دی چوکسی تے چاق و چوبند تیاری پاروں دشمن کراچی تے حملہ کرݨ دی جرأت نہ کر سڳیا۔ وفاقی وزیرِ داخلہ آکھیا جو پاک بحریہ ملکی سمندری حدود دی اصل محافظ اے اتے ایں دے جواناں ہر آزمائش تے چیلنج اچ ملکی دفاع کوں مضبوط ترین بݨایا۔ انہاں آکھیا جو پاک بحریہ دیاں جدید جنگی صلاحیتاں تے اعلیٰ پیشہ ورانہ معیار نہ صرف قابلِ تحسین ہن ٻلکہ شہدائے پاک بحریہ دیاں عظیم قربانیاں پوری قوم دا بیش قیمت اثاثہ ہن ڄنہاں کوں کݙاہیں فراموش نہیں کیتا ونڄ سڳدا۔