پاکستان ہیلتھ سیکٹر اچ آپݨی سابقہ کارکردگی دے ریکارڈ ٻھن تے تیزی نال اڳں ودھدا پئے، وفاقی وزیرِ صحت سید مصطفیٰ کمال

اسلام آباد۔ 10 ستمبر (اے پی پی) وفاقی وزیرِ صحت سید مصطفیٰ کمال آکھیا جو پاکستان ہیلتھ سیکٹر اچ آپݨی سابقہ کارکردگی دے ریکارڈ ٻھن تے تیزی نال اڳوں ودھدا پئے، صحت دا شعبہ قومی سلامتی تے قومی معیشت دا اہم مسئلہ اے، حکومت صحت دے شعبے اچ اصلاحات، ڈیجیٹائزیشن، سرمایہ کاری تے برآمدات دے فروغ کیتے بھرپور اقدامات کریندی پئی اے۔ وفاقی وزیرِ صحت اے ڳالھیں 23ویں ہیلتھ ایشیا ایکسپو نال خطاب کریندیں ہوئیں کیتا۔ انہاں آکھیا جو ایکسپو اچ 600 توں ودھ سٹالز قائم ہن، 200 توں زائد ملکی تے غیر ملکی کمپنیاں شریک ہن ڄݙاں جو 30 توں ودھ کانفرنساں تھیسن اتے متعدد مفاہمتی یادداشتاں تے دستخط کیتے ڳئن۔ مصطفیٰ کمال آکھیا جو کڄھ مہینے پہلے اسلام آباد اچ پاکستان تے چین دی کمپنیاں وچال بی ٹو بی کانفرنس دا انعقاد کیتا ڳیا، ڄیندے اچ چین توں صحت دے شعبے دی 180 ڄݙاں جو پاکستان توں 300 توں ودھ کمپنیاں شریک تھئیاں۔ وزیرِ اعظم کانفرنس دا افتتاح کیتا اتے ݙو ݙیہاڑی کانفرنس دے دوران 663 ملین ڈالر دے معاہدے طے تھیے، ڄہڑے آئندہ 12 توں 14 مہینیاں دے دوران پاکستان اچ سرمایہ کاری دی صورت اچ سامھے آوسن۔ انہاں آکھیا جو چینی کمپنیاں دے نال تقریباً 1.2 ارب ڈالر دے ایم او یوز وی طے تھئن، ڄنہاں تے حکومت پیش رفت دا جائزہ گھندی پئی اے اتے سرمایہ کاراں کوں ہر ممکن سہولت فراہم کیتی ویندی پئی اے۔ وفاقی وزیر ہیلتھ ایشیا ایکسپو دے انعقاد تے ای کامرس گیٹ وے تے ایں دی ٹیم کوں مبارکباد ݙیندے ہوئیں آکھیا جو دنیا بھر توں کمپنیاں تے مصنوعات کوں ہک پلیٹ فارم تے گھن آوݨ قابلِ تحسین اے۔ پاکستان ایں ویلھے تقریباً 26 کروڑ آبادی دا ملک اے، ڄہڑا ہک پاسے چیلنج اے تاں ݙوجھے پاسے ہیلتھ کیئر فراہم کرݨ آلیاں کمپنیاں کیتے ہک ٻہوں وݙی مارکیٹ تے موقع وی اے۔ انہاں آکھیا جو پاکستان دی فارماسیوٹیکل انڈسٹری اچ گزشتہ عرصے دے دوران 38 فیصد ودھارا تھیا، ڄیندے دی ہک اہم وجہ لائسنسنگ تے ٻئے انتظامی عمل کوں ڈیجیٹائز کرݨ اے۔ میڈیکل ڈیوائسز دی لائسنسنگ دا عمل وی مکمل طور تے ڈیجیٹائز کیتا ڳئے۔ پہلے ڄنہاں معاملیاں اچ لمبا عرصہ لڳدا ہئی، ہݨ او تقریباً 21 ݙیہاڑیاں اچ مکمل تھیندے پئن اتے ہݨ تائیں 4,700 توں زائد کیسز نبیڑیے ڳئن۔ مصطفیٰ کمال آکھیا جو حکومت پاکستان اچ ویکسین دی مقامی پیداوار کیتے وی کم کریندی پئی اے۔ انہاں یونیورسل میڈیکل ریکارڈ (UMR) دے منصوبے دا وی ذکر کیتا اتے آکھیا جو پاکستان اچ مختلف ہسپتالاں اچ مریضاں دا ریکارڈ انڄ انڄ موجود اے، ڄیندی وجہ توں مریض دے ݙوجھے ہسپتال منتقل تھیوݨ تے طبی ریکارڈ تئیں رسائی مشکل تھیندی اے۔ نادرا دے نال معاہدہ کیتا ڳئے اتے مستقبل اچ شناختی کارڈ نمبر کوں ہر پاکستانی شہری دے یونیورسل میڈیکل ریکارڈ نمبر دے طور تے استعمال کرݨ دا منصوبہ اے۔ ایں منصوبے دا پائلٹ پروجیکٹ اسلام آباد توں شروع کیتا ویسی اتے بعد اچ پورے ملک اچ نافذ کیتا ویسی۔ مصطفیٰ کمال آکھیا جو پاکستان ایں ویلھے 52 ملکاں کوں دوائیاں برآمد کریندا پئے اتے ڈبلیو ایچ او دے ریگولیٹری سسٹم اچ لیول ٹو تے اے۔ اپریل 2027ء اچ پاکستان دی فائنل انسپیکشن متوقع اے۔ اگر پاکستان ڈبلیو ایچ او لیول تھری حاصل کرݨ اچ کامیاب تھی ڳیا تاں پاکستانی دوائیاں کیتے تقریباً 100 ٻیاں ملکاں دیاں مارکیٹاں کھل سڳدن، ڄیندے توں برآمدات اچ نمایاں ودھارا تھیسی۔ وفاقی وزیر ہیلتھ ایشیا ایکسپو اچ شریک ملکی تےغیر ملکی مندوبین، کمپنیاں تے میڈیا دے نمائندیاں دا شکریہ ادا کریندیں ہوئیں آکھیا جو ایہوجھے پلیٹ فارمز پاکستان اچ سرمایہ کاری گھن آوݨ، پاکستانی مصنوعات کوں عالمی سطح تے متعارف کرواوݨ تے ملکی ہیلتھ انڈسٹری کوں ترقی ݙیوݨ اچ اہم کردار ادا کریندے پئن۔