نائب وزیرِ اعظم تے وزیرِ خارجہ اسحاق ڈار دی صدارت اجلاس، ای سی او کونسل آف منسٹرز دے اجلاس دیاں تیاریاں دا جائزہ گھدا ڳیا

اسلام آباد۔ 11 ستمبر (اے پی پی) نائب وزیرِ اعظم و وزیرِ خارجہ سینیٹر محمد اسحاق ڈار دی صدارت اجلاس اچ پاکستان اچ 15 تے 16 نومبر 2026ء کوں تھیوݨ آلے اقتصادی تعاون تنظیم (ای سی او) کونسل آف منسٹرز دے اجلاس دیاں تیاریاں دا جائزہ گھدا ڳیا۔ جمعے کوں ترجمان دفترِ خارجہ دے جاری بیان دے مطابق نائب وزیرِ اعظم تے وزیرِ خارجہ کوں ای سی او کونسل آف منسٹرز اجلاس دیاں تیاریاں، مجوزہ پروگرام تے ایجنڈے، شرکاء دی شرکت، لاجسٹکس تے ٻئے انتظاماں دے حوالے نال بریفنگ ݙتی ڳئی۔ نائب وزیرِ اعظم و وزیرِ خارجہ سینیٹر اسحاق ڈار آئندہ کونسل آف منسٹرز اجلاس دیاں تیاریاں دا تفصیلی جائزہ گھدا اتے اہم معاملیاں تے ضروری ہدایات ݙتی۔ انہاں اقتصادی تعاون تنظیم تے علاقائی تجارت، روابط تے اقتصادی تعاون دے فروغ اچ ایں دے کردار کوں پاکستان ولون ݙتی ونڄݨ آلی اہمیت تے زور ݙتا۔ انہاں متعلقہ حکام کوں ہدایت کیتی جو پاکستان اچ تھیوݨ آلے کونسل آف منسٹرز دے اجلاس کوں نتیجہ خیز تے کامیاب بݨاوݨ کیتے تمام انتظامات جامع انداز اچ مکمل کیتے ونڄن۔ اجلاس اچ سیکرٹری خارجہ آمنہ بلوچ تے وزارتِ خارجہ دے تمام متعلقہ افسراں شرکت کیتی۔