وزیرِ اعظم دا خصوصی پٹرول ریلیف پیکیج، موٹر سائیکل، رکشہ تے 800 سی سی تائیں گاݙیاں کیتے فی لیٹر 100 روپے رعایت

لاہور۔ 13 ستمبر (اے پی پی) وزیرِ اعظم محمد شہباز شریف مشرقِ وسطیٰ اچ جاری کشیدگی پاروں عالمی منڈی اچ تیل دیاں قیمتاں اچ وادھے دے عوام تے پووݨ آلے اثرات گھٹ کرݨ کیتے خصوصی پٹرول ریلیف سکیم دا اعلان کر ݙتے، ڄیندے تحت موٹر سائیکل، رکشہ، چنگچی تے 800 سی سی تئیں دی گاݙی استعمال کرݨ آلیاں کوں پٹرول تے فی لیٹر 100 روپے دا ریلیف فراہم کیتا ویسی۔ اسلام آباد دی حدود اچ ایں دا اطلاق آندے سوار تے منگل دی درمیانی رات ڄݙاں جو پورے پاکستان بشمول کشمیر تے گلگت بلتستان اچ ایں دا اطلاق بدھ تے خمیس دی درمیانی رات توں کیتا ویسی۔ وزیرِ اعظم آفس دے میڈیا ونگ توں اتوار کوں جاری بیان دے مطابق وزیرِ اعظم محمد شہباز شریف آکھیا جو تیل دیاں قیمتاں اچ وادھے پاروں عوام تے پووݨ آلے بوجھ دا حکومت کوں مکمل احساس اے، اوکھ دی ایں گھڑی اچ عوام کوں کلھا کائناں چھوڑیسوں۔ وزیرِ اعظم آکھیا جو موٹر سائیکل، رکشہ، چنگچی تے چھوٹیاں گاݙیاں استعمال کرݨ آلیاں تے تیل دیاں قیمتاں اچ وادھے توں پووݨ آلے بوجھ کوں گھٹ کرݨ کیتے خصوصی سکیم دا آغاز کیتا ویندا پئے۔ وزیرِ اعظم آکھیا جو خصوصی ریلیف سکیم دے تحت موٹر سائیکل، رکشہ تے چنگچی سمیت ݙو تے ترائے پہیاں آلی سواریاں تے ماہانہ 20 لیٹر پٹرول کیتے فی لیٹر 100 روپے دا ریلیف ݙتا ویسی ڄݙاں جو 800 سی سی تائیں دی چھوٹیاں گاݙیاں دے مالکان کوں ماہانہ 30 لیٹر پٹرول تے فی لیٹر 100 روپے رعایت فراہم کیتی ویسی۔ انہاں آکھیا جو اسلام آباد دی حدود اچ ریلیف سکیم دا اطلاق آندے سنوار اتے منگل دی درمیانی رات توں تھیسی ڄݙاں جو ملک بھر، بشمول آزاد کشمیر تے گلگت بلتستان اچ ایں دا اطلاق بدھ تے خمیس دی درمیانی رات توں کیتا ویسی۔ وزیرِ اعظم آکھیا جو خصوصی ریلیف سکیم کیتے رجسٹریشن دا عمل اڄ توں شروع کر ݙتا ڳئے ڄݙاں جو رجسٹریشن دے طریقہ کار توں عوام کوں آگاہی مہم دے ذریعے ݙسایا ویسی۔ انہاں موٹر سائیکل، رکشہ تے چھوٹیاں گاݙیاں بارے معلومات دی فراہمی تے سکیم دی تیاری اچ تعاون تے صوبائی حکومتاں دا شکریہ وی ادا کیتا۔