سمیڈا چھوٹے تے درمیانے درجے دیاں صنعتاں، کاروباری حضرات دی مالی معاونت کیتے جامع حکمت عملی وضع کرے، وزیراعظم

اسلام آباد۔ 16 ستمبر (اے پی پی) وزیراعظم محمد شہباز شریف ہدایت کیتی جو سمیڈا ملک دے طول و عرض اچ چھوٹے تے درمیانے درجے دیاں صنعتاں تے کاروباری حضرات دی مالی معاونت کیتے جامع حکمت عملی وضع کرے، سمیڈا دی کاروبار دے فروغ دی حکمت عملی اچ ودھ توں ودھ علاقیاں تے شعبہ جات کوں شامل کیتا ونڄے۔ وزیراعظم آفس دے میڈیا ونگ توں جاری بیان موجب بدھ کوں اسلام آباد اچ وزیراعظم دی صدارت اچ چھوٹے تے درمیانے درجے دیاں صنعتاں تے کاروباری افراد دی مالی معاونت تے سہولیات دی فراہمی کیتے سمیڈا دی زیرِ نگرانی جاری اقدامات تے جائزہ اجلاس تھیا۔ وزیراعظم سمیڈا کوں کاروباری حضرات دی مالی امداد، پیشہ ورانہ استعدادِ کار اچ اضافہ تے عالمی منڈیاں تئیں رسائی کیتے جامع حکمت عملی مکمل کرݨ دی ہدایت کیتی۔ اجلاس اچ بریفنگ دے دوران ݙسایا ڳیا جو سمیڈا مختلف متعلقہ اداروں نال آپسی تعاون نال مربوط تے جامع حکمت عملی تے کم کریندی پئی اے۔ اجلاس اچ نائب وزیراعظم تے وزیر خارجہ محمد اسحاق ڈار، وفاقی وزیر برائے قومی غذائی تحفظ رانا تنویر حسین، وزیر قانون اعظم نذیر تارڑ، وفاقی وزیر تجارت جام کمال، وفاقی وزیر برائے اقتصادی امور احد خان چیمہ، وزیر مملکت برائے خزانہ بلال اظہر کیانی، وزیراعظم دے مشیر برائے تجارت ہارون اختر، چیئرمین وزیراعظم یوتھ پروگرام رانا مشہود احمد خان تے متعلقہ سرکاری اداریاں دے عہدے داراں شرکت کیتی۔ ایں موقع تے وزیراعظم ہدایت کیتی جو سمیڈا ملک دے طول و عرض اچ چھوٹے تے درمیانے درجے دی صنعتاں تے کاروباری حضرات دی مالی معاونت کیتے جامع حکمت عملی وضع کرے، سمیڈا دے ادارہ جاتی مقصد اچ ملک دے تمام علاقیاں اچ کاروباری ترغیب تے مساوی سہولیات تے یکساں فنی معاونت سرفہرست ہووݨی چاہیدی اے، چھوٹے تے درمیانے درجے دیاں صنعتاں تے کاروبار اچ تریمتیں دی شمولیت کوں یقینی بݨاوݨ کیتے سمیڈا دے جاری پروگرام کوں ٻئی وسعت ݙتی ونڄے، مقامی کاروباری افراد دی قومی تے عالمی سطح تے تجارتی منڈیاں تئیں رسائی کیتے ڈیجیٹل پلیٹ فارمز کوں موثر طریقے نال استعمال کیتا ونڄے۔ وزیراعظم ہدایت کیتی جو سمیڈا دی کاروبار دے فروغ دی حکمت عملی اچ ودھ توں ودھ علاقیاں تے شعبہ جات کوں شامل کیتا ونڄے، زرعی اجناس دے پیداواری تے تجارتی روابط کوں منظم کرݨ کیتے سمیڈا خصوصی اقدامات تے مشتمل حکمت عملی تیار کرے، کاروباری افراد دی مالی معاونت، فنی استعدادِ کار اچ اضافہ تے سہولیات دی فراہمی تے یکساں توجہ ݙتی ونڄے۔ ایں موقع تے وزیراعظم کوں بریفنگ اچ ݙسایا ڳیا جو چھوٹے تے درمیانے درجے دیاں صنعتاں دی تقویت تے کاروباری افراد دی معاونت کیتے ہر سطح تے اقدامات کیتے ویندے پئن، چھوٹے کاروبار نال منسلک صنعتی پیداوار دی برآمدات اچ اضافے تے عالمی منڈیاں تئیں رسائی کیتے دنیا دے بہترین رائج اطوار تے کم کیتا ویندا پئے۔