پانڈا بانڈ پاکستان تے چین دے پراݨے تزویراتی تعلقات دے مالیاتی پہلو کوں تکڑا بݨاوݨ دا باعث بݨسی،سینیٹر محمد اورنگزیب

اسلام آباد۔ 16 ستمبر(اے پی پی) وفاقی وزیر خزانہ و محصولات سینیٹر محمد اورنگزیب آکھیہے جو پاکستان دا پہلا پائیدار ساورن پانڈا بانڈ چین دی دنیا دی ݙوجھی وݙی گہری کیپٹل مارکیٹ تئیں رسائی دے نال نال پاکستان تے چین دے پراݨے تزویراتی تعلقات دے مالیاتی پہلو کوں مزید تکرا بݨاوݨ دا باعث بݨسی۔ پاکستان کیتے 2026 ایشیا پیسیفک کلائمیٹ بانڈز ایوارڈ دے موقع تے ڳالھ کریندے وزیرِ خزانہ کلائمیٹ بانڈز انیشی ایٹو دے اہم اعزاز تے اظہار تشکر کیتا۔ وزیرِ خزانہ آکھیا جو پہلا پائیدار پانڈا بانڈ کئی حوالیں نال اہمیت دا حامل اے، پاکستان پہلی واری دنیا دی ݙوجھی ساریں توں وݙی ݙوجھی گہری کیپٹل مارکیٹ نال رجوع کیتے جیندے نال پاکستان کیتے سرمائے دے نویں تے وسیع و متنوع ذرائع دے دروازے کھلئن، ایں توں چین تے پاکستان دے پراݨے تزویراتی تعلقات دے مالیاتی پہلو کوں مزید تقویت ملسی۔ وزیرِ خزانہ آکھیا جو پانڈا بانڈ کوں مارکیٹ دی طرفوں انتہائی مثبت ردِ عمل ملیا، ترائے سالہ بانڈ 2.5 فیصد دی انتہائی مسابقتی شرح تے جاری کیتا ڳیا جݙاں جو ایں کیتے ملݨ آلے آرڈرز جاری کیتے ڳئے بانڈ دے حجم توں ترائے گنا زیادہ ہن، اے پاکستان دے بہتر تھیندے معاشی بنیادی اشاریں، اصلاحات دی سمت تے خودمختار مالیاتی ساکھ تے مارکیٹ دے اعتماد دا واضح اظہار اے۔ انہاں آکھیا جو ایں بانڈ دی پائیدار نوعیت ایں دی ایک ٻئی اہم خصوصیت اے کیوں جو بانڈ توں حاصل تھیوݨ آلے فنڈز ماحول دوست تے سماجی شمولیت تے مبنی سرمایہ کاری دے منصوبیں تے خرچ کیتے ویسن جنہاں اچ پاݨی، توانائی تے صحت دے شعبے شامل ہن۔ انہاں آکھیا جو اے بانڈ پاکستان دے پائیدار فنانسنگ فریم ورک دے عین موجب تے سٹیٹ بینک دی گرین ٹیکسونومی تے کلائمیٹ پراسپیریٹی پلان نال وی ہم آہنگ اے۔ وزیرِ خزانہ آکھیا جو پاکستان چین دی کیپٹل مارکیٹ اچ صرف ھک واری بانڈ جاری کرݨ تئیں محدود نہ رہسی، ابتدائی تے پہلے پانڈا بانڈ دا حجم 1.75 ارب چینی یوآن ہئی جݙاں جو نیشنل ایسوسی ایشن آف فنانشل مارکیٹ انسٹی ٹیوشنل انویسٹرز مجموعی طور تے 7.2 ارب چینی یوآن دے پانڈا بانڈ پروگرام دی منظوری ݙتی اے، پاکستان اڳوں وی چینی کیپٹل مارکیٹ نال رجوع کریسی تے لوڑھ موجب مزید بانڈز جاری کریسی۔ وزیرِ خزانہ ایوارڈ دے منتظمین دا شکریہ ادا کریندے چین دی حکومت، چینی ریگولیٹرز بالخصوص پیپلز بینک آف چائنا تے این اے ایف ایم آئی آئی، کریڈٹ انہانسمنٹ ݙیوݨ آلے اداریں اے آئی آئی بی تے ایشیائی ترقیاتی بینک، سرمایہ کاراں، انڈر رائٹرز، مشیران تے وزارتِ خزانہ دی اپݨی ٹیم دا وی شکریہ ادا کیتا جنہاں دیاں کوششاں نال اے اہم تے اولین لین دین کامیابی نال مکمل تھیا۔ انہاں آکھیا جو پاکستان کیتے اے اعزاز حاصل کرݨ ماݨ دی ڳالھ اے تے حکومت ایں اعتراف تے منتظمین دی شکر گزار اے۔