چیئرمین سینیٹ ݙو ملازمین کیتے مفت حج دی قرعہ اندازی دا افتتاح کیتا

اسلام آباد۔ 16 ستمبر(اے پی پی) چیئرمین سینیٹ سید یوسف رضا گیلانی سینیٹر عامر ولی الدین چشتی دی طرفوں سینیٹ سیکرٹریٹ دے گریڈ بی پی ایس-1 توں بی پی ایس-7 تئیں دے ݙو ملازمین کیتے ݙتی ونڄݨ آلی مفت حج سہولت دے سلسلے اچ قرعہ اندازی دا افتتاح کیتا۔ قرعہ اندازی سینیٹر سروس سینٹر، پارلیمنٹ ہاؤس، اسلام آباد اچ منعقد تھئی جیندے اچ سینیٹر سید مسرور احسن، سینیٹر راحت جمالی، سینیٹر عامر ولی الدین چشتی، سیکرٹری سینیٹ سید حسنین حیدر تے سینیٹ دے اعلیٰ حکام تے ملازمین دی وݙی تعداد شرکت کیتی۔ ایں موقع تے چیئرمین سینیٹ سید یوسف رضا گیلانی آکھیا جو حج دینِ اسلام دا ھک اہم رکن تے عظیم عبادت اے، ہر مسلمان دی دلی خواہش ہوندی اے جو ایں کوں اللہ تعالیٰ دے مقدس گھر دی زیارت تے فریضہ حج دی ادائیگی دی سعادت نصیب ہووے۔ انہاں آکھیا جو حج اللہ تعالیٰ دی خوشنودی تے قرب حاصل کرݨ دا ذریعہ اے تے ایں عظیم عبادت دی سعادت حاصل کرݨ ہر مسلمان کیتے ماݨ دی ڳالھ اے۔انہاں قرعہ اندازی اچ منتخب تھیوݨ آلے ݙوہیں خوش نصیب ملازمین تے انہاں دے اہلخانہ کوں دلی مبارخ ݙیندے انہاں کیتے نیک خواہشات دا اظہار کیتا۔ چیئرمین سینیٹ سینیٹر عامر ولی الدین چشتی دا خصوصی شکریہ ادا کیتا تے آکھیا جو انہاں دی طرفوں سینیٹ سیکرٹریٹ دے ملازمین کیتے مفت حج دی سہولت ݙیوݨ ھک قابلِ تحسین، فلاحی تے احسن اقدام اے۔ انہاں آکھیا جو ایجھے اقدامات نہ صرف ملازمین دی حوصلہ افزائی دا باعث بݨدن بلکہ انہاں کیتے دینی فریضہ ادا کرݨ دے موقع وی پیدا کریندن۔ سینیٹر عامر ولی الدین چشتی سینیٹ ایمپلائز ویلفیئر فنڈ کیتے ݙاہ لکھ روپے دا عطیہ وی ݙتا۔