موسمیاتی تبدیلیاں نال نبڑݨ دیاں پالیسیاں اچ جمہوری اداریں دی نگرانی ناگزیر اے، سپیکر قومی اسمبلی سردار ایاز صادق

کیپ ٹاؤن۔ 16 ستمبر(اے پی پی) سپیکر قومی اسمبلی سردار ایاز صادق آکھیے جو موسمیاتی تبدیلیاں نال نبڑݨ دیاں پالیسیاں اچ جمہوری اداریں دی نگرانی ناگزیراے، موسمیاتی تبدیلی نال خوراک، پاݨی، صحت سودھے زندگی دے مختلف شعبے متاثر تھیندے پئن، پاکستان موسمیاتی تبدیلیاں نال ساریں توں ودھ متاثر تھیوݨ آلے ملکاں دی فہرست اچ شامل اے۔ قومی اسمبلی سیکرٹریٹ موجب اے ڳالھ سپیکر بدھ کوں اتھاں 69 ویں کامن ویلتھ پارلیمانی کانفرنس اچ موسمیاتی تبدیلیاں نال نبڑݨ اچ پارلیمانی قیادت دے کردار دے حوالے نال اپݨے خطاب اچ آکھی۔ سپیکر کہیں ملک دا ناں ڳھدے بغیر دریاواں اچ اچانک پاݨی آوݨ تے پاݨی روکݨ جیھے مسئلے چاتے تے 6 نکاتی تجویزاں پیش کیتیاں۔ بھارتی مندوبین ایں خطاب اچ خلل پاوݨ دی کوشش کیتی جئیں پاروں جمیکا دی سپیکر و میزبان انہاں کوں چُپ رہݨ یا ہال توں ٻاہر نکل ونڄݨ دا آکھیا۔ ایں موقع تے کانفرنس دے ٻئے شرکاء دی طرفوں بھارتی مندوبین کوں سپیکر سردار ایاز صادق دا خطاب تحمل نال سݨݨ دی تلقین وی کیتی ڳئی۔ سپیکر سردار ایاز صادق دا آکھݨ ہئی جو موسمیاتی موافقت دیاں پالیسیاں عوام دی موثر شمولیت دے نال تشکیل ݙتیاں ونڄݨیاں چاہیدن۔ موسمیاتی تبدیلیاں نال نبڑݨ کیتے موسمیاتی انصاف تے جمہوری اداریں دی شمولیت ضروری اے۔ موسمیاتی تبدیلی جیھے عالمی چیلنجز تے پارلیمانی مکالمہ سنجیدہ، بامقصد تے تعمیری ہووݨا چاہیدے۔ موسمیاتی پالیسیاں دے عملی نفاذ کیتے پارلیماناں دا کردار اہم اے۔ بین الاقوامی موسمیاتی مالی معاونت پارلیمانی نگرانی دے دائرے اچ ہووݨی چاہیدی اے۔ انہاں آکھیا جو پاکستان دی پارلیمان موسمیاتی موافقت کیتے قانون سازی، بجٹ دی نگرانی تے کمیٹیاں دے ذریعے اہم کردار ادا کریندی پئی اے۔ موسمیاتی تبدیلیاں نال نبڑݨ کیتے تریمتاں ، نوجواناں تے معاشرے دے ٻئے طبقیں دی شمولیت ناگزیر اے۔ موسمیاتی خطرات نال نبڑݨ کیتے پارلیماناں کوں سانجھے تجربیں توں فیدہ چاوݨا چاہیدے۔ موسمیاتی تبدیلی دے چیلنجز نال نبڑݨ کیتے پارلیماناں کوں اختلافات دے بجائے تعاون تے بامعنی مکالمے کوں ودھارا ݙیوݨا چاہیدے۔ مضبوط تے متحرک معاشریں کیتے مضبوط جمہوری ادارے ناگزیر ہن۔ موسمیاتی موافقت منصفانہ مالی معاونت تے جمہوری جوابدہی نال ہی موثر بݨ سڳدی اے۔ سپیکر سردار ایاز صادق دے خطاب دے دوران پیدا تھیوݨ آلی صورتحال دے باوجود موسمیاتی موافقت تے موسمیاتی انصاف تے ڳالھ مہاڑ جاری رہی ۔ سپیکر سردار ایاز صادق کہیں ملک یا وفد دا ناں ڳھدے بغیر موسمیاتی تبدیلی نال نبڑݨ کیتے اصولی موقف، عالمی برادری دیاں ذمہ واریاں تے زور ݙتا۔ سپیکر سردار ایاز صادق دے خطاب کوں کانفرنس دے شرکاء دی طرفوں بھرپور پذیرائی ملی تے بین الاقوامی مندوبین انہاں دے خطاب دی تعریف کیتی۔