مکہ معاہدے اچ شامل کہیں وی فریق تے حملے دی صورت اچ رکن ملک سانجھی مشاورت نال لائحہ عمل طے کریسن، ڈی جی آئی ایس پی آر لیفٹیننٹ جنرل احمد شریف چوہدری دا عرب ٹی وی کوں انٹرویو

راولپنڈی۔ 16 ستمبر (اے پی پی) پاک فوج دے شعبہ تعلقات عامہ (آئی ایس پی آر) دے ڈائریکٹر جنرل لیفٹیننٹ جنرل احمد شریف چوہدری آکھیے جو مکہ معاہدے اچ شامل کہیں وی فریق تے حملے دی صورت اچ رکن ملک سانجھی مشاورت نال لائحہ عمل طے کریسن تے ایں موجب عمل درآمد کیتا ویسے۔ عرب ٹی وی کوں انٹرویو ݙیندے ڈی جی آئی ایس پی آر واضح کیتا جو بھارت اپݨی فوجی طاقت ودھاوݨ کیتے بے تحاشا وسائل خرچ کریندا پئے جݙاں جو پاکستان دی دفاعی صلاحیتاں خالصتاً دفاعی نوعیت دیاں ہن تاں جو ایں دا ہرگز اے مطلب نی ۔ جو اساں کہیں اسلحے دی دوڑ اچ شریک ہیسے ۔ انہاں آکھیا جو اساݙے کہیں وی ملک دے خلاف جارحانہ عزائم کائنی۔، اساں کوں اپݨی دفاعی صلاحیتاں تے بھرپور اعتماد اے تے اساں نہ صرف اپݨا دفاع کرݨا ڄاݨدوں بلکہ جارحیت دی سزا ݙیوݨ دی وی مکمل صلاحیت رکھیندوں۔ ھک سوال دے جواب اچ لیفٹیننٹ جنرل احمد شریف چوہدری آکھیا جو سیاسی مقاصد دا تعین ہمیشہ ملک دی سیاسی قیادت کریندی اے، فوج تے ریاست دے اہداف انڄ انڄ نی ہوندے، پاکستان دے سارے مقاصد تے ترجیحات سیاسی قیادت دے دائرہ اختیار اچ ہی آندن۔ افغانستان دی صورتحال تے ڳالھ کریندے انہاں دا آکھݨ ہئی جو اقوامِ متحدہ دیاں رپورٹس اچ افغانستان اچ موجود درجناں دہشت گرد تنظیماں دی نشاندہی کیتی ڳئی اے۔ پاکستان دا اصولی موقف اے جو افغانستان کوں عالمی دہشت گردی دا گڑھ نئیں بݨݨا چاہیدا۔ افغان طالبان حکومت پاکستان اچ دہشت گردی دیاں کارروائیاں کیتے عناصر کوں تربیت ݙیندی پئی اے جݙاں جو اساݙا واحد تے ݙو ٹوک مطالبہ اے جو افغانستان دی سرزمین کوں پاکستان دے خلاف ہرگز استعمال نہ تھیوݨ ݙتا ونڄے۔ مکہ معاہدے دے فریق تے حملے دی صورت اچ پاکستان دے ردِ عمل دے طریقہ کار تے ڳالھ کریندے ڈی جی آئی ایس پی آر آکھیا جو دفاعی وعدیں تے عملدرآمد دا طریقہ کار کݙاہیں عوامی سطح تے ظاہر نئیں کیتا ویندا، حملے دی صورت اچ کیا ردِ عمل ہوسی ایں دا فیصلہ ترائی ملک باہم لائحہ عمل طے کر تے ہی کریسن تے ایں طریقہ کار دے تحت کارروائی ہوسی۔ انہاں آکھیا جو مکہ معاہدے تے کہیں کوں کوئی اعتراض کائنی ، عالمی سطح تے سارے ڄاݨدن جو اے اقدام خالصتاً دفاعی نوعیت دا اے جیندا بنیادی مقصد خطے اچ امن تے استحکام کوں برقرار رکھݨا اے، دنیا اچ ایں نوعیت دے ٻئے دفاعی معاہدے وی موجود ہن جنہاں دے تحت ھک ٻئے کوں مکمل تعاون دا یقین ݙیوایا ویندے ، عسکری تے سکیورٹی کارروائیاں متعلق معلومات حساس تے خفیہ نوعیت دیاں ہوندن لہٰذا معاہدے دے تحت عملی اقدام دا حتمی فیصلہ وی اے ترائی ملک رل تے کریسن۔ ترجمان پاک فوج واضح کیتا جو جیویں جو عنوان توں ہی عیاں اے اے ھک دفاعی نوعیت دا باہمی تعاون اے جیندے اچ کوئی جارحانہ پہلو شامل کائنی ۔، اے معاہدہ ھک ٻئے کوں معاونت ݙیوݨ کیتے ہے جݙاں جو انہاں ملکاں دے ٻئی ریاستاں دے نال اپݨے آزادانہ تے خود مختارانہ تعلقات بدستور قائم ہن۔ لیفٹیننٹ جنرل احمد شریف چوہدری دا آکھݨ ہئی جو پاکستان، سعودی عرب تے ترکیہ دے تعلقات اچانک وجود اچ نئیں آئے، چین سودھے پوری دنیا بخوبی آگاہ اے جو اے برادرانہ تعلقات کتنے دیرینہ تے تاریخی ہن، ہݨ انھاں تاریخی تعلقات کوں باضابطہ تے ھک واضح معاہدے دے فریم ورک اچ ڈھال ݙتا ڳئے۔ انہاں زور ݙے تے آکھیا جو معاہدے اچ شامل ترائی ملکاں دے چین دے نال بہترین مراسم ہن خاص طور تے پاکستان تے چین دے تعلقات انتہائی سٹریٹجک تے غیر معمولی نوعیت دے ہن۔ انہاں آکھیا جو پاکستان خطے اچ پائیدار امن دے قیام کیتے ایران تے امریکا وچال ثالثی دا کردار ادا کرݨ دا فیصلہ کیتے، پاکستان امن و استحکام دا غیر متزلزل حامی اے تے سارے دوست ملکاں دے نال کثیر الجہتی سفارتی تعلقات دی پالیسی پاروں پاکستان کوں دنیا اچ ھک منفرد مقام حاصل اے، ایں غیر جانبدار تے متوازن حیثیت دی بدولت پاکستان امن دے ودھارے کیتے ھک مخلص تے دیانتدار ثالث دا کردار مؤثر طریقے نال ادا کر سڳدے۔