وزیراعظم محمد شہباز شریف دی عوام کیتے سبسڈی دے سوکھے حصول کیتے انتظامیہ، رضاکاراں تے پٹرول پمپ دے عملے تے مشتمل سہولت ڈیسک قائم کرݨ دی ہدایت

اسلام آباد۔ 16 ستمبر (اے پی پی) وزیراعظم محمد شہباز شریف عوام کیتے سبسڈی دے سوکھے حصول کیتے انتظامیہ، رضاکاراں تے پٹرول پمپ دے عملے تے مشتمل سہولت ڈیسک قائم کرݨ دی ہدایت کریندے آکھیے جو عوام کوں رجسٹریشن تے ٻئے ضروری مرحلے اچ ہر ممکن رہنمائی ݙتی ونڄے۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف دی زیرِ صدارت خلیج دی صورتحال دے پیشِ نظر پٹرولیم مصنوعات دیاں قیمتاں اچ ودھارے توں گھٹ آمدݨ تے متوسط طبقے کوں ریلیف ݙیوݨ کیتے پی ایم سپیشل ریلیف سکیم تے پیش رفت دے حوالے نال جائزہ اجلاس منعقد تھیا۔ پی ایم سپیشل ریلیف سکیم دے تحت موٹر سائیکل، رکشہ تے 800 سی سی تئیں دیاں گاݙیاں دے مالکان کوں فیول سبسڈی ݙتی ویندی پئی اے۔ وزیراعظم عوام کیتے سبسڈی دے سوکھے حصول کیتے انتظامیہ، رضاکاراں تے پٹرول پمپ دے عملے تے مشتمل سہولت ڈیسک قائم کرݨ دی ہدایت کیتی اے۔ انہاں آکھیا جو ریلیف ݙیوݨ کیتے سہولت ڈیسک تے موجود افراد سکیم دے مستحق شہریاں دی رہنمائی کرن، عوام کوں رجسٹریشن تے ٻئے ضروری مرحلے اچ ہر ممکن رہنمائی ݙتی ونڄے۔ وزیراعظم متعلقہ حکام کوں عوام اچ سکیم متعلق کہیں وی قسم دی آگاہی کیتے متحرک رہݨ دی ہدایت کیتی۔ اجلاس اچ وزیراعظم کوں فیول سبسڈی سکیم دی پیشرفت دے حوالے نال ݙسایا ڳیا۔ بریفنگ دے دوران ݙسایا ڳیا جو اسلام آباد اچ سکیم دے پائلٹ دے افتتاح دے بعد ہݨ پورے ملک بشمول آزاد جموں و کشمیر تے گلگت بلتستان اچ سکیم دا افتتاح کیتا ونڄ چکیے، ایں سکیم کوں عوام کیتے سوکھا بݨایا ڳئے۔ فیول سبسڈی سکیم دی رجسٹریشن کیتے صرف چار معلومات درکار ہن، شناختی کارڈ نمبر، گاݙی دی نمبر پلیٹ، رجسٹریشن دا صوبہ تے ڳاݙی دی رجسٹریشن دی تاریخ ایں سکیم اچ رجسٹریشن کیتے درکار چار بنیادی معلومات ہن۔ بریفنگ اچ اے وی ݙسایا ڳیا جو فیول سبسڈی سکیم دی مکمل تفصیلات اردو ویب سائٹ www.pmfuelrelief.pk⁠ تے دستیاب ہن، کامیاب رجسٹریشنز دی تعداد اچ بتدریج ودھارا تھیندا پئے، سکیم کوں ملک گیر سطح تے نافذ کرݨ کیتے صوبائی حکومتاں بھرپور تعاون کریندیاں پئن۔ اجلاس اچ نائب وزیراعظم و وزیرِ خارجہ محمد اسحاق ڈار، وفاقی وزراء احد خان چیمہ، عطاء اللہ تارڑ، شزا فاطمہ خواجہ، علی پرویز ملک، وزیرِ مملکت خزانہ بلال اظہر کیانی، معاونِ خصوصی طارق باجوہ تے متعلقہ اداریں دے اعلیٰ افسران شریک تھئے۔