دانش یونیورسٹی پاکستان دے باصلاحیت تے مستحق نوجواناں کوں عالمی معیار دی تعلیم دے مواقع ݙیسی، طلبہ دا انتخاب میرٹ تے کیتا ویسے، محمد شہباز شریف

اسلام آباد۔ 17 ستمبر (اے پی پی) وزیرِ اعظم محمد شہباز شریف آکھیا جو دانش یونیورسٹی پاکستان دے باصلاحیت تے مستحق نوجواناں کوں عالمی معیار دی تعلیم دے مواقع فراہم کریسی، ایں یونیورسٹی اچ داخلیاں کیتے پورے پاکستان توں باصلاحیت طلبہ دا انتخاب میرٹ تے کیتا ویسے۔ خمیس کوں پی ایم آفس دے میڈیا ونگ دے مطابق وزیراعظم محمد شہباز شریف دی صدارت دانش یونیورسٹی دے حوالے نال جائزہ اجلاس تھیا ڄیندے اچ وفاقی وزراء پروفیسر احسن اقبال، اعظم نذیر تارڑ، احد خان چیمہ، خالد مقبول صدیقی، ڈاکٹر طارق فضل چوہدری، ممبر قومی اسمبلی اسامہ سرور، چیئرمین بورڈ آف ٹرسٹیز دانش یونیورسٹی عارف سعید اتے متعلقہ اعلیٰ سرکاری افسراں شرکت کیتی۔ اجلاس نال خطاب کریندیں ہوئیں وزیراعظم آکھیا جو پاکستان دے ہونہار تے مستحق طلبہ کوں میرٹ تے معیاری تے جدید تعلیم دی فراہمی حکومت دی پہلی ترجیح اے، دانش یونیورسٹی پاکستان دے باصلاحیت تے مستحق نوجواناں کوں عالمی معیار دی تعلیم دے مواقع ݙیسی۔ وزیراعظم آکھیا جو دانش یونیورسٹی بہترین تعلیمی، تحقیقی تے جدید تکنیکی سہولیات پاروں ملک بھر تے پورے خطے اچ ٹیکنالوجی دے شعبے اچ ہک مرکزِ امتیاز دے طور تے ابھرسی، ایں اچ داخلیاں کیتے پورے پاکستان توں باصلاحیت طلبہ دا انتخاب میرٹ تے کیتا ویسے۔ اجلاس کوں دانش یونیورسٹی دے قیام بارے وزیراعظم دی مختلف ہدایات تے پیشرفت دا ݙسیا ڳیا۔ ݙسایا ڳیا جو دانش یونیورسٹی اچ مختلف فیکلٹی اسامیاں کیتے ہݨ تئیں 185 درخواستاں موصول تھین، یونیورسٹی کیتے بہترین تے باصلاحیت فیکلٹی دے انتخاب دا عمل جاری اے، ایف ایس سی تے اے لیول دے ݙوجھے سال اچ زیرِ تعلیم طلبہ کوں دانش یونیورسٹی دے ورچوئل سکول کیتے ٹیلنٹ ہنٹ دا عمل شروع کر ݙتا ڳئے، ورچوئل سکول اچ کامیاب طلبہ کیتے پنج مہینیاں دے دورانیے دی سو فیصد مفت کلاسز دا انعقاد کیتا ویسے، دانش یونیورسٹی ورچوئل کلاسز کیتے ٹیسٹ 40 توں ودھ شہراں اچ 24 اکتوبر 2026ء کوں منعقد کیتا ویسے۔ بریفنگ اچ ݙسایا ڳیا جو دانش یونیورسٹی دی عمارت آندے سال تئیں مکمل تھی ویسے، باقاعدہ تدریسی سرگرمیاں دا آغاز 20 ستمبر 2027ء کوں تھیسی، ایں یونیورسٹی اچ ابتدائی مرحلے اچ بائیو انجینئرنگ، الیکٹریکل انجینئرنگ، مصنوعی ذہانت، کمپیوٹر سائنس اتے ٹیکنالوجی تے سماجیات تے مبنی جدید تعلیمی پروگرام شروع کیتے ویسن۔ بریفنگ اچ ݙسایا ڳیا جو طلبہ کوں یونیورسٹی اچ باقاعدہ تعلیم شروع کرݨ دی ضروری تیاری تے معاونت کیتے برج پروگرام وی شروع کیتا ویسے، دانش یونیورسٹی دا برج پروگرام 10 اگست توں 14 ستمبر 2027ء تئیں جاری رہسی۔