وزیرِمملکت صحت دی زیرِ صدارت اجلاس، گلوبل مینٹل ہیلتھ کانفرنس دیاں تیاریاں دا جائزہ

اسلام آباد۔20 ستمبر (اے پی پی) وزیرِمملکت صحت ڈاکٹر مختار احمد بھرتھ دی زیرِصدارت اجلاس اچ یکم تے ݙو اکتوبر 2026ء کوں تھیوݨ آلی ’گلوبل مینٹل ہیلتھ سمٹ‘ دیاں تیاریاں دا جائزہ ڳھدا ڳیا۔ اجلاس دے دوران وزیرِ مملکت ݙسایا جو پاکستان اچ نفسیاتی، اعصابی تے منشیات دے استعمال متعلق بیماریاں تکھے ودھدیاں پئن، جتھاں 10 توں 16 فیصد بالغ لوک نفسیاتی مسئلیں دا شکار ہن تے سالانہ 80 فیصد توں ودھ مریض علاج توں محروم رہندن۔ ملک دی 24 کروڑ توں ودھ آبادی کیتے صرف 500 ماہرِ نفسیات تے 200 کلینیکل سائیکالوجسٹس دستیاب ہن، جݙاں جو 2020ء اچ ذہنی بیماریاں دی وجہ توں معیشت کوں 617 ارب روپے دے ضیان دا تخمینہ لاتا ڳیا ہئی۔ انہاں مزید ݙسایا جو موسمیاتی تبدیلیاں تے 2022ء دے چھل جیھے قدرتی آفتاں ذہنی صحت دے مسئلیں اچ مزید ودھارا کیتے، جیندے توں متاثرہ 38 فیصد لوکاں اچ ڈپریشن تے 20 فیصد اچ اضطراب دیاں علامات ݙٹھیاں ڳئن۔ ایں صورتِ حال نال نبڑݨ کیتے وزارتِ صحت صوبیں دی مشاورت نال ’قومی ذہنی صحت پالیسی 2026-35‘ تیار کریندی پئی اے۔ اے گلوبل سمٹ ایں پالیسی کوں اڳوں ودھاوݨ کیتے اہم پلیٹ فارم ثابت تھیسی، جیندے اچ اقوامِ متحدہ، ڈبلیو ایچ او، تے یونیسف دے نمائندے شریک ہوسن۔ سمٹ دے اختتام تے ’اسلام آباد ڈیکلریشن‘ اپنایا ویسے تاں جو ذہنی صحت دیاں سہولتاں کوں بنیادی صحت، اسکولاں تے قدرتی آفتاں نال نبڑݨ دے نظام دا حصہ بݨایا ونڄ سڳے۔