نویں نظام دے تحت بجلی پیدا کرݨ آلے تے استعمال کرݨ آلے آپت اچ براہِ راست خرید و فروخت کر سڳسن، وفاقی وزیر توانائی سردار اویس لغاری

اسلام آباد۔20 ستمبر(اے پی پی) وفاقی وزیر توانائی سردار اویس احمد خان لغاری آکھیے جو حکومت بجلی دی خرید و فروخت دے موجودہ نظام اچ بنیادی تبدیلی گھن آوݨ دے اپݨے پراݨے عزم کوں عملی جامہ پواوݨ دا آغاز کر ݙتے جیندے تحت بجلی پیدا کرݨ آلے تے استعمال کرݨ آلے صارفین ھک شفاف طریقہ کار دے ذریعے براہِ راست بجلی دی خرید و فروخت کرسڳسن۔ اتوار کوں میڈیا نال ڳالھ کریندے انہاں آکھیا جو ایں ویلھے پاکستان اچ بجلی حکومت مل گھندی اے تے اپݨے ترسیلی نظام دے ذریعے صارفین تئیں پڄیندی اے، تاں جو بجلی دی قیمت، آئی پی پیز تے واپڈا سودھے مختلف معاملیں تے گزریل 25، 30 سالاں توں سوال چاتے ویندے ریہن۔ وفاقی وزیر آکھیا جو وزیراعظم محمد شہباز شریف دی حکومت گزریل 25، 30 سالاں توں زیرِ غور ایں ارادے کوں عملی شکل ݙیوݨ دا آغاز کر ݙتے۔ نویں نظام دے تحت حکومت کیتے بجلی دی خریداری لازم نہ ہوسی تے بجلی پیدا کرݨ آلے تے استعمال کرݨ آلے آپت اچ براہِ راست خرید و فروخت کرسڳسن۔ انہاں آکھیا جو ایں نظام دا پہلا مرحلہ صنعتی تے وݙے بجلی صارفین کیتے شروع کیتا ویندا پئے، جیندے اچ ھک میگاواٹ یا ایں توں ودھ بجلی استعمال کرݨ آلے صارفین فیدہ چیسن ۔ شفاف میکنزم دے تحت صارفین اپݨی لوڑھ موجب سستی بجلی مل گھن سڳسن ۔ اویس لغاری آکھیا جو اے نظام بتدریج وسعت اختیار کریسی تے آندے کجھ سالاں اچ عام صارفین، جنہاں اچ 200 تے 400 یونٹ بجلی استعمال کرݨ آلے صارفین وی شامل ہن، تئیں ایں دے فیدے پڄسن۔ ایں دے نتیجے اچ بجلی دی ھک منڈی وجود اچ آسی جتھاں صارفین اپݨی مرضی نال سستی ترین بجلی مل گھن سڳسن۔ انہاں آکھیا جو سستی بجلی نال صنعت کوں وی فیدہ تھیسی تے صنعتی شعبہ عالمی منڈی اچ اپݨی مصنوعات کوں زیادہ مسابقتی نرخاں تے پیش کر سڳسی۔ بجلی دے اخراجات اچ کمی نال پاکستانی مصنوعات دیاں برآمدات اچ وی مدد ملسی۔ وفاقی وزیر آکھیا جو گزریل ݙو سالاں دے دوران حکومت ایں مقصد کیتے جیڑھیاں کوششاں کیتیاں، اڄ انہاں کوں عملی جامہ پوایا ویندا پئے۔ انہاں آکھیا جو حکومت قوم نال کیتے ڳئے وعدیں کوں پورا کرݨ دا آغاز کر ݙتے۔