افغان سرزمین توں ڈرونز دی شکل اچ مداخلت پاکستان دی خودمختاری تے علاقائی سالمیت دی صریحاً خلاف ورزی اے، عطاء اللہ تارڑ

اسلام آباد۔24 ستمبر(اے پی پی) وفاقی وزیر اطلاعات و نشریات عطاء اللہ تارڑ آکھیے جو پاکستان 23 ستمبر 2026 کوں افغان سرزمین توں پاکستان دی طرف چلائے ڳئن ڈرونز دی شکل اچ غیر قانونی تے جاݨ ٻُجھ تے کیتی ونڄݨ آلی مداخلت دی سخت ترین الفاظ اچ مذمت کریندے۔ اے اقدام پاکستان دی خودمختاری تے علاقائی سالمیت دی صریحاً خلاف ورزی اے تے جارحیت دا ھک سنگین تے ناقابلِ قبول عمل اے۔ سماجی رابطے دے پلیٹ فارم “ایکس” تے اپݨے بیان اچ وفاقی وزیر اطلاعات آکھیا جو پاکستان سالاں افغان طالبان حکومت تے ایں دے رابطہ کاراں دے سامݨے افغان سرزمین تے دہشت گرد پناہ گاہواں تے انہاں دے معاون نیٹ ورکس دی مسلسل موجودگی تے شدید تحفظات دا اظہار کریندا ریہے۔ انہاں نیٹ ورکس دے خاتمے تے پاکستان دے خلاف دہشت گردی کیتے افغان سرزمین استعمال کرݨ آلیں دے خلاف قابلِ اعتماد تے قابلِ تصدیق کارروائی کرݨ دے بجائے، افغان طالبان حکومت پاکستان دے خلاف ڈرون کارروائیاں دے ذریعے صورتحال کوں مزید وڳاڑݨ دا رستہ اختیار کیتا۔ انہاں آکھیا جو پاکستان دے فضائی دفاعی نظام سارے ڈرونز کوں انہاں دے مطلوبہ اہداف تئیں پُڄݨ توں پہلے ہی شناخت، ٹریک تے غیر موثر کر ݙتا، جیندے نال مجوزہ حملے کوں مکمل طور تے ناکام بݨا ݙتا ڳئے۔ اپݨی خودمختاری دے دفاع دا حق استعمال کریندے ، پاکستان افغانستان اچ انہاں ڈرونز کوں لانچ تے ذخیرہ کرݨ کیتے استعمال تھیوݨ آلے 10 جہیں دی مکمل نشاندہی دے بعد فضائی تے ڈرون حملے کیتے۔ اے حملے سوچے سمجھے، درست، متوازن تے مناسب ہن تے صرف انہاں عسکری اہداف تئیں محدود ہن جہڑے پاکستان دے خلاف حملیں نال براہِ راست جڑئے ہوئن۔وفاقی وزیر اطلاعات آکھیا جو پاکستان افغان سرزمین توں کیتے ونڄݨ آلے حملیں کوں ہرگز قبول یا برداشت نہ کریسی، بھاویں اے دہشت گرد گروپاں دی طرفوں ہووݨ یا خود افغان طالبان حکومت دی طرفوں پاکستان دی خودمختاری دی کہیں وی خلاف ورزی دا وقتی تے فیصلہ کن جواب ݙتا ویسے۔ افغان طالبان دی طرفوں تڑیاں، تردید یا ذمہ واری توں فرار دی کوششاں نہ تاں حقائق کوں بدل سڳدن تے نہ ہی پاکستان دے اپݨی سرزمین، عوام تے قومی سلامتی دے دفاع دے بنیادی حق کوں محدود کرسڳدن۔ انہاں آکھیا جو پاکستان افغان طالبان حکومت توں مطالبہ کریندے جو او پاکستان دے خلاف سارے مکروہ سرگرمیاں وقتی بند کرے تے افغان سرزمین توں کارروائیاں کرݨ آلے دہشت گرد عناصر دے خلاف موثر، ٹھوس، قابلِ تصدیق تے مسلسل کارروائی کریندے اپݨی بین الاقوامی ذمہ واریاں پوریاں کرے۔ افغان سرزمین کوں پاکستان دے خلاف حملے شروع کرݨ یا ایہو جیھی دشمنی تے مبنی کارروائیاں کیتے استعمال نی کیتا ونڄݨا چاہیدا۔ عطاء اللہ تارڑ آکھیا جو پاکستان کشیدگی اچ ودھارا نی چاہندا تے علاقائی امن، مکالمے تے تعمیری رابطے کیتے پرعزم اے۔ ایں عزم کوں کمزوری یا اے مطلب نہ ڳھدا ونڄے جو اساں جارحانہ کارروائیاں برداشت کریندے رہسوں۔ پاکستان اپݨی خودمختاری، علاقائی سالمیت تے اپݨے شہریاں دی زندگیاں دا دفاع مکمل عزم دے نال کریسی تے انہاں دے تحفظ کیتے سارے ضروری اقدامات کریسی۔ افغان طالبان دی طرفوں کہیں وی مزید اشتعال انگیز اقدام دا جواب مضبوط تے فیصلہ کن انداز اچ ݙتا ویسے