ٻاہرلے ملک رہݨ آلے باصلاحیت پاکستانی نینگر پوری قوم دا ماݨ ہن ، وزیرِاعظم شہباز شریف دی امریکہ اچ پاکستانی نینگراں دے وفد نال ڳالھ مہاڑ

نیویارک۔24 ستمبر (اے پی پی) وزیراعظم محمد شہباز شریف آکھیے جو ٻاہرلے ملک رہݨ آلے باصلاحیت پاکستانی نینگر میں سودھے پوری قوم دا ماݨ ہن ، پختہ یقین اے جو پاکستان دی قسمت صرف نوجوان ہی بدل سڳدن، پاکستان دے نوجواناں کوں بااختیار بݨاوݨ کیتے آئی ٹی، مصنوعی ذہانت تے جدید ہنر سکھاوݨ کیتے اقدامات کریندے پیوں۔وزیراعظم دفتر دے میڈیا ونگ توں جاری بیان موجب وزیرِاعظم شہباز شریف نال امریکہ اچ رہݨ آلے پاکستانی نوجواناں دے وفد ملاقات کیتی، جیندے اچ شعبہ صحت، انفارمیشن ٹیکنالوجی، مصنوعی ذہانت تے سماجی انٹرپرینیورز دے نال نال مختلف یوتھ این جی اوز دے سربراہان تے پروفیشنلز شامل ہن۔ وزیرِاعظم وفد دا خیرمقدم کیتا تے نوجواناں کوں مختلف شعبہ جات اچ بہتری کیتے تجاویز ݙیوݨ تے پاکستان کیتے اپݨا بھرپور کردار ادا کرݨ دی دعوت ݙتی۔وزیراعظم آکھیا جو ٻاہرلے ملکاں اچ رہݨ آلے باصلاحیت پاکستانی نوجوان میں سودھے پوری قوم دا ماݨ ہن، پختہ یقین اے جو پاکستان دی قسمت صرف نوجوان ہی بدل سڳدن۔ وزیرِاعظم آکھیا جو پاکستان دے نوجواناں کوں بااختیار بݨاوݨ کیتے آئی ٹی، مصنوعی ذہانت تے جدید ہنر سکھاوݨ کیتے اقدامات کریندے پئن، خادمِ پنجاب دے دور توں باصلاحیت نوجواناں کوں لیپ ٹاپ، وظائف تے معاشی طور تے کمزور طلباء و طالبات کوں دانش سکولز دے ذریعے تعلیم دے یکساں موقع ݙیوݨ دا جیڑھا سلسلہ شروع کیتا ہئی، او بطور خادمِ پاکستان وی جاری اے۔وزیرِاعظم آکھیا جو معاشی طور تے کمزور ٻالاں کوں دانش سکولز دے ذریعے بین الاقوامی معیار دی تعلیم ݙیوݨ دے نال نال ہݨ عالمی معیار دی دانش یونیورسٹی دا قیام عمل اچ لاتا ویندا پئے، پاکستان دے نوجواناں دی ترقی کیتے آپ دی تجویز دا خیرمقدم کریندوں۔ نوجواناں دی ترقی بالخصوص آئی ٹی، انفارمیشن ٹیکنالوجی تے کاروبار اچ سوکھ کیتے کیتے اقدامات تے وزیراعظم محمد شہباز شریف کوں خراجِ تحسین پیش کیتا۔ملاقاتاں اچ رانا مشہود احمد خان چیئرمین وزیرِاعظم یوتھ پروگرام، معاونِ خصوصی بلال بن ثاقب، پاکستان دے اقوام متحدہ اچ مستقل مندوب عاصم افتخار، پاکستان دے امریکہ اچ سفیر رضوان احمد شیخ، وزیرِاعظم دے غیر ملکی ذرائع ابلاغ دے ترجمان مشرف زیدی، سید قمررضا چیئرمین اوورسیز فاؤنڈیشن، مینیجنگ ڈائریکٹر اوورسیز فاؤنڈیشن افضال بھٹی تے متعلقہ اعلیٰ حکام شرکت کیتی