مصنوعی ذہانت اچ پیشرفت دیاں کوششاں اجارہ داری یا رسائی اچ رکاوٹ نی بݨݨیاں چاہیدیاں، نائب وزیرِاعظم محمد اسحاق ڈار

نیویارک۔24 ستمبر (اے پی پی) نائب وزیراعظم و وزیرِ خارجہ محمد اسحاق ڈار مصنوعی ذہانت دے ڈیزائن، ترقی تے انضمام دے سارے مرحلے اچ انسانی صوابدید تے کنٹرول برقرار رکھݨ دی اہمیت تے زور ݙیندے آکھیے جو ایں شعبے اچ پیش رفت دیاں کوششاں نویں قسم دی اجارہ داری یا رسائی اچ رکاوٹ نی بݨݨیاں چاہیدیاں۔ دفترِ خارجہ توں جاری بیان موجب نائب وزیراعظم اقوام متحدہ دی سلامتی کونسل دی طرفوں ’’مصنوعی ذہانت تے بین الاقوامی سلامتی‘‘ دے موضوع تے منعقدہ بریفنگ اچ پاکستان دی نمائندگی کریندے خطاب کیتا۔ اے اجلاس فرانس دی طرفوں ستمبر کیتے اقوام متحدہ دی سلامتی کونسل دی صدارت دے تحت منعقد کیتا ڳیا۔ اجلاس دی صدارت فرانس دے وزیرِ خارجہ کیتی جݙاں جو سلامتی کونسل دے رکن ملکاں دیاں اعلیٰ شخصیات شرکت کیتی جنہاں اچ برطانیہ، ڈنمارک تے جمہوریہ کانگو دے وزرائے خارجہ، دولتِ مشترکہ و ترقیاتی امور، تے امریکہ دے صدر دے معاون تے وائٹ ہاؤس آفس آف سائنس اینڈ ٹیکنالوجی پالیسی دے ڈائریکٹر شامل ہن۔ پانامہ، یونان، صومالیہ، بحرین، لٹویا، کولمبیا، چین، روسی فیڈریشن تے لائبیریا دے سینئر نمائندیں وی اجلاس اچ شرکت کیتی۔کونسل کوں اقوام متحدہ دے مصنوعی ذہانت متعلق بین الاقوامی آزاد پینل دے شریک چیئرمین پروفیسر یوشوا بینجیو، اوپن اے آئی دے چیف ایگزیکٹو افسر سیم آلٹ مین، اینتھروپک دے چیف ایگزیکٹو افسر ڈاریو اموڈی تے ہیگنگ فیس دے چیف ایگزیکٹو افسر کلیمنٹ ڈیلانگ بریفنگ ݙتی۔نائب وزیراعظم مصنوعی ذہانت دے ڈیزائن، ترقی تے انضمام دے سارے مرحلے اچ انسانی صوابدید تے کنٹرول برقرار رکھݨ دی اہمیت تے زور ݙتا۔ انہاں مصنوعی ذہانت کوں اسلحے دی دوڑ دا ھک ٻیا پہلو بݨݨ توں روکݨ تے فوجی شعبے اچ غلط اندازیں تے فیصلے کرݨ کیتے محدود تھیندے ویلھے توں پیدا تھیوݨ آلے خطرات نال نبڑݨ کیتے تحمل تے اعتماد سازی دے اقدامات تے زور ݙتا۔نائب وزیراعظم و وزیرِ خارجہ چتاوݨی ݙتی جو مصنوعی ذہانت دے شعبے اچ پیش رفت دی رفتار دے نال ہم آہنگ تھیوݨ دیاں کوششاں نویں قسم دی اجارہ داری یا رسائی اچ رکاوٹ دا نی بݨݨیاں چاہیدیاں تے اے جو سلامتی دے ناں تے کیتے ونڄݨ آلے اقدامات کوں ٹیکنالوجی توں محروم رکھݨ دے ذرائع اچ تبدیل نی ہووݨا چاہیدا۔ انہاں مصنوعی ذہانت دی حکمرانی دے معاملے کوں اقوام متحدہ دی سرپرستی اچ نمائندہ تے جامع فورمز تے عالمی سطح تے سارے ملکاں دی شرکت دے نال زیرِ غور گھن آوݨ تے زور ݙتا۔انہاں جنیوا اچ مصنوعی ذہانت دی حکمرانی دے حوالے نال اقوام متحدہ دے پہلے عالمی مکالمے دا خیرمقدم کیتا تے ورلڈ آرٹیفیشل انٹیلی جنس کوآپریشن آرگنائزیشن دی بانی رکن دی حیثیت نال پاکستان دے کردار کوں اجاگر کریندے ایں کوں مصنوعی ذہانت کوں ساریں کیتے تے بھلائی کیتے ترقی ݙیوݨ دے پاسے ٹھوس قدم قرار ݙتا۔ نائب وزیراعظم مصنوعی ذہانت دے حوالے نال بین الاقوامی تعاون کوں ودھارا ݙیوݨ، عالمی مصنوعی ذہانت دے فرق کوں گھٹ کرݨ تے ساریں کیتے امن و ترقی دی خاطر مصنوعی ذہانت تئیں مساوی رسائی کوں ودھارا ݙیوݨ دے پاکستان دے عزم دا اعادہ کیتا۔