وزیرِ خزانہ محمد اورنگزیب دی بین الاقوامی شراکت داراں نال ڈیجیٹلائزیشن، ایوی ایشن، ریفائنری دی جدید کاری، ریکو ڈک منصوبے بارے اہم امور تے ڳالھ مہاڑ

اسلام آباد۔24 ستمبر(اے پی پی) وفاقی وزیرِ خزانہ ومحصولات، سینیٹرمحمد اورنگزیب اقوام متحدہ دی جنرل اسمبلی دے 81 ویں سالانہ اجلاس دے موقع تے نیویارک اچ ڈیجیٹلائزیشن، ایوی ایشن، ریفائنری دی جدید کاری تے ریکو ڈک منصوبے دے حوالے نال بین الاقوامی شراکت داراں نال اہم امور تے ڳالھ کیتی۔وزارتِ خزانہ موجب وزیرِ خزانہ پورا ݙینھ جاری رہݨ آلی ملاقاتاں دے سلسلے اچ ڈیجیٹل کوآپریشن آرگنائزیشن دے اعلیٰ سطحی وزارتی مکالمے اچ شرکت کیتی جتھاں انہاں ڈیجیٹلائزیشن کوں پاکستان دی معاشی استحکام توں پائیدار اقتصادی ترقی دی طرف منتقلی دا ھک اہم حصہ قرار ݙتا۔ انہاں ڈیجیٹل پبلک انفراسٹرکچر تے کیش لیس ادائیگیاں دے ودھارے تے روشنی پیندے زور ݙتا جو رابطہ کاری دے نال ہنر اچ بہتری تے نویں مہارتاں دے حصول تے وی توجہ ݙیوݨ ضروری اے تاں جو فری لانسرز تے ڈیجیٹل شعبے نال وابستہ لوک اعلیٰ مہارت دی حامل خدمات دی طرف منتقل تھی سڳن۔ورچوئل اثاثہ جات دے وسیع پیمانے تے استعمال دا حوالہ ݙیندے سینیٹر محمد اورنگزیب قانون سازی، نگرانی تے لائسنسنگ دے حوالے نال پاکستان دی جاری کوششاں تے روشنی پاتی تے کرپٹو کرنسی توں اڳوں انہاں دے عملی استعمالات تے زور ݙتا، جنہاں اچ گھٹ لاڳت تے سوکھی ترسیلاتِ زر دے نال نال سرکاری قرض تے رئیل اسٹیٹ دی ممکنہ ٹوکنائزیشن شامل اے۔ انہاں ڈیجیٹل معیشت اچ کامیاب تجربیں دے تبادلے تے سرمایہ کاری دے ودھارے کیتے ڈی سی او دے رکن ملکاں وچال نیڑے تعاون دی لوڑھ تے زور ݙتا۔وزیرِ خزانہ امریکی ایکسپورٹ امپورٹ بینک دے چیئرمین جان جوانووچ نال وی ملاقات کیتی، جیندے اچ پاکستان انٹرنیشنل ایئرلائنز (پی آئی اے) کیتے طیاریں دی خریداری، ریفائنریز دی جدید کاری تے ریکو ڈک کان کنی دے منصوبے کیتے مالی معاونت ݙیوݨ تے ڳالھ کیتی۔ وزیرِ خزانہ بوئنگ دے طیاریں، بالخصوص 787 ڈریم لائنرز، اچ پی آئی اے دی دلچسپی دا ݙسیندے طیاریں تے انجݨاں دی خریداری کیتے مالی معاونت دے پیکیج اچ تعاون تے زور ݙتا۔ انہاں گراؤنڈ کیتے ڳئے بوئنگ 777 طیاریں کوں ول سروس اچ گھن آوݨ کیتے سپیئر پارٹس دی لوڑھ تے وی روشنی پاتی، فریقین وسیع تر تعاون دے فریم ورک تے کم جاری رکھݨ تے ایں دوران ترجیحی بنیاداں تے معاملات اڳوں ودھاوݨ تے اتفاق کیتا جنہاں اچ طیاریں دی پری ڈیلیوری ادائیگیاں کیتے ممکنہ مالی معاونت وی شامل اے۔ریفائنری اپ گریڈز کوں وی امریکی ایکسپورٹ امپورٹ بینک دی معاونت دے ھک ممکنہ شعبے دے طور تے زیرِ غور گھن آیا ڳیا۔ وزیرِ خزانہ ریکوڈک دے حوالے نال پاکستان دے عزم دا اعادہ کریندے مستقبل دیاں برآمدات کیتے منصوبے دی اہمیت تے تاخیر دی لاڳت تے روشنی پاتی، انہاں منصوبے کیتے امریکی ایکسپورٹ امپورٹ بینک دے مسلسل عزم دا خیرمقدم کیتا۔ وزیرِ خزانہ دیاں ملاقاتاں اچ پاکستان اچ ڈیجیٹلائزیشن کوں اڳوں ودھاوݨ، بین الاقوامی اقتصادی تعاون کوں تکڑا بݨاوݨ تے ایوی ایشن، ریفائننگ تے کان کنی سودھے اہم شعبیں کیتے مالی معاونت متحرک کرݨ تے توجہ مرکوز رہی جݙاں جو تعاون تے سرمایہ کاری دے عملی موقع دے حصول دا سلسلہ وی جاری رکھیا ڳیا۔