وزیرِاعظم نال امریکہ اچ رہݨ آلے آئی ٹی، اے آئی، آٹوموبائل، توانائی،تعمیرات تے ٻئے شعبیں دی کاروباری شخصیات و پروفیشنلز دے وفد دیاں ملاقاتاں

نیویارک۔24 ستمبر (اے پی پی) وزیراعظم محمد شہباز شریف آکھیے جو حکومت ملک اچ سرمایہ کاری تے کاروباری سرگرمیاں اچ ودھارے کیتے سازگار ماحول ݙیندی پئی اے، کاروباری شخصیات تے پروفیشنلز پاکستان دے سفیر ہن ڄہڑے دنیا اچ اپݨے مثبت کردار نال ملک دا نام روشن کریندن، انہاں کوں پاکستان اچ سرمایہ کاری دی دعوت ݙیندوں۔وزیراعظم دفتر دے میڈیا ونگ توں جاری بیان موجب وزیرِاعظم نال امریکہ اچ رہݨ آلے انفارمیشن ٹیکنالوجی، مصنوعی ذہانت، آٹو موبائل، توانائی، تعمیرات تے مختلف شعبیں نال تعلق رکھݨ آلی کاروباری شخصیات و پروفیشنلز دے وفد ملاقاتاں کیتیاں۔ وزیرِ اعظم وفد کوں خوش آمدید آکھیا تے پاکستان اچ سرمایہ کاری دی دعوت ݙتی۔ وزیراعظم ایں موقع تے آکھیا جو کاروباری شخصیات تے پروفیشنلز پاکستان دے سفیر ہن ڄہڑے دنیا اچ اپݨے مثبت کردار نال ملک دا نام روشن کریندن۔ حکومت ملک اچ سرمایہ کاری تے کاروباری سرگرمیاں اچ ودھارے کیتے سازگار ݙیندی پئی اے، ایف بی آر اچ اصلاحات نال کاروباری برادری دے مسئلیں کوں حل کیتا ڳیا۔ انہاں آکھیا جو حکومت ملکی زرعی شعبے دی ترقی کیتے شعبے اچ جدت دے حوالے نال ترجیحی بنیاداں تے اقدامات کریندی پئی اے۔ کاروباری شخصیات دے وفد وزیرِاعظم دی قیادت اچ زراعت، صنعت، برآمدات بالخصوص ایف بی آر اچ اصلاحات دی تعریف کیتی۔ملاقاتاں اچ رانا مشہود احمد خان چیئرمین وزیرِاعظم یوتھ پروگرام، معاونِ خصوصی بلال بن ثاقب، اقوام متحدہ اچ پاکستان دے مستقل مندوب عاصم افتخار، امریکہ اچ پاکستان دے سفیر رضوان احمد شیخ، وزیرِ اعظم دے ترجمان غیر ملکی میڈیا مشرف زیدی، سید قمر رضا چیئرمین اوورسیز فاؤنڈیشن، منیجنگ ڈائریکٹر اوورسیز فاؤنڈیشن افضال بھٹی تے متعلقہ اعلیٰ حکام شرکت کیتی۔