صومالیہ دے ساحل نیڑے ہائی جیک تھیوݨ آلے ایم وی آنر 25 دے پاکستانی عملے دے 4 ارکان کوں بحفاظت بازیاب کرا ڳھدا ڳئے، اسحاق ڈار

اسلام آباد۔ 2 اکتوبر(اے پی پی) صومالیہ دے ساحل دے نیڑے ہائی جیک تھیوݨ آلے ایم وی آنر 25 دے پاکستانی عملے دے 4 ارکان کوں بحفاظت بازیاب کرا ڳھدا ڳئے۔ سماجی رابطے دی ویب سائٹ ایکس تے ہک بیان اچ نائب وزیراعظم و وزیر خارجہ سینیٹر محمد اسحاق ڈار آکھیا جو وزارت خارجہ تے جبوتی اچ پاکستانی سفارتخانے دی مسلسل کوششاں دے نتیجے اچ صومالیہ دے ساحل دے نیڑے ہائی جیک تھیوݨ آلے ایم وی آنر 25 دے متاثرہ ݙاہ پاکستانی عملے دے ارکان اچوں چار یاسر خان، عقیل خان، امین بن شمس تے عثمان غنی کوں بحفاظت بازیاب کرا ڳھدا ڳئے تے انہاں دی 3 اکتوبر کوں کراچی پڄݨ دی توقع اے۔ انہاں آکھیا جو ترائے پاکستانی عملے دے ارکان مرحوم رفیع اللہ خان، مرحوم سید کاشف عمر تے مرحوم محمود احمد انصاری جیڑھے افسوسناک طور تے اپݨی جاناں توں ہتھ دھو ٻیٹھے ہن، دے جسدِ خاکی پاکستان واپس آندے پئن، ایں سلسلے اچ سارے ضروری قانونی تے ٻئے ضابطہ جاتی کارروائیاں کوں تکھی رفتارنال مکمل کیتا ویندا پئے تاں جو ایں عمل کوں وقتی مکمل کیتا ونڄ سڳے، ݙکھی خانداناں نال تعزیت کرینداں جیڑھے ایں ٻہوں تکلیف ݙیوݨ آلے ویلھے توں گزردے پئن ۔ انہاں آکھیا جو باقی پاکستانی عملے دے ترائے ارکان عمران علی، یاسین محمد تے سید یوسف حسین کپتان دے رلے بدستور جہاز تے موجود ہن، اساں انہاں دی بحفاظت بازیابی تے وقتی توں وقتی وطن واپسی کیتے دوست ملکاں نال فعال طور تے رابطہ تے تعاون کریندے پیوں۔ اسحاق ڈار آکھیا جو وزیراعظم شہباز شریف دی قیادت اچ وزارت خارجہ ایں معاملے تے پوری طرح توجہ ݙتی ہوئی اے تے سارے پاکستانی شہریاں بشمول جاں بحق لوکاں دے جسدِ خاکی دی وقتی واپسی یقینی بݨاوݨ کیتے مسلسل ہر ممکن کوشش کریندی پئی اے تے متاثرہ خانداناں کوں ہر ممکن تعاون ݙیندی رہسی۔