وزیراعظم دا صومالیہ اچ جاں بحق تھیوݨ آلے پاکستانیاں دے ٹٻر کوں مالی معاونت، ٻالاں کیتے مفت تعلیم اتے رہائش گاہ دا اعلان

اسلام آباد۔2 اکتوبر(اے پی پی)وزیراعظم محمد شہباز شریف صومالیہ دے ساحل تے بازیابی ویلھے جاں بحق تھیوݨ والے پاکستانی شہریاں دے اہل خانہ کیتے ہک کروڑ 25 لکھ روپے فی خاندان مالی معاونت، انہاں دے ٻالاں کیتے مفت تعلیم اتے رہائش گاہ دا اعلان کیتے۔ انہاں وزارتِ خارجہ اتے پاکستان دے سفارتخانے کوں ہدایت کیتی جو صومالی حکام اتے ٻئے متعلقہ فریقین نال مسلسل رابطے اچ راہندے ہوئیں میتاں دی پاکستان واپسی کوں تیکھا کیتا ونڄے۔ وزیراعظم محمد شہباز شریف صومالیہ اچ جاں بحق تھیوݨ والے پاکستانی کاشف عمر دے پتر اذہان کاشف کوں فون کیتے اتے سید کاشف عمر دے انتقال تے پرچاوݨی ݙیندے آکھیے جو ایں ݙکھ اساں تہاݙے نال ہیں، اللہ تعالیٰ انہاں کوں جنت اچ ڄاہ ݙیوے اتے سوگوار ٹٻر کوں صبر ݙیوے۔ وزیراعظم انہاں دے والد تے باقی ݙو جاں بحق تھیوݨ والے پاکستانیاں دیاں میتاں تیکھے پاکستان گھن آوݨ کیتے حکومت ولوں یقین ݙیوایا۔ انہاں وزارتِ خارجہ اتے ٻئے متعلقہ اداریاں کوں کاشف عمر اتے باقی ݙو جاں بحق تھیوݨ آلیاں دے خانداناں نال ہر مرحلے تے براہِ راست رابطے دی ہدایت کیتی۔ کاشف عمر انہاں ترائے پاکستانیاں اچ ہن جیڑھے صومالیہ اچ ہائی جیک کیتے ڳئے بحری جہاز توں بازیابی ویلھے جاں بحق تھئے۔ وزیراعظم محمد شہباز شریف صومالیہ دے ساحل تے بازیابی دے دوران جاں بحق تھئے تریئے پاکستانیاں سید کاشف عمر، محمود احمد انصاری اتے رفیع اللہ خان دے اہل خانہ کیتے مالی معاونت، انہاں دے ٻالاں کیتے مفت تعلیم اتے رہائش گاہ دا اعلان کیتے۔ انہاں مرݨ آلے پاکستانی شہریاں دے اہل خانہ کیتے ہک کروڑ 25 لکھ روپے فی خاندان مالی معاونت دا اعلان کیتا۔ انہاں کوں ہک ہک گھر وی ݙتا ویسی۔ وزیراعظم زخمی پاکستانیاں کوں بہترین طبی سہولتاں ݙیوݨ اے ٻئے پاکستانی عملے دی بحفاظت واپسی کیتے وی سارے ممکنہ اقدامات جاری رکھݨ دی ہدایت کیتی۔