وزیراعظم نال انٹرنیشنل لیبر آرگنائزیشن دے ڈائریکٹر جنرل گلبرٹ ایف ہونگبو دی وفد نال ملاقات

اسلام آباد۔6 اکتوبر(اے پی پی)انٹرنیشنل لیبر آرگنائزیشن دے ڈائریکٹر جنرل گلبرٹ ایف ہونگبو اپݨے وفد نال وزیراعظم محمد شہباز شریف نال ملاقات کیتی۔ وزیراعظم ڈائریکٹر جنرل انٹرنیشنل لیبر آرگنائزیشن دا خیرمقدم کریندے پاکستان اتے آئی ایل او وچال مضبوط تعاون کوں سراہیا۔ وزیراعظم آکھیا جو پاکستان انٹرنیشنل لیبر آرگنائزیشن نال اپݨی مثبت شراکت داری بالخصوص ہنرمند افرادی قوت تے نوجواناں کیتے پیداواری روزگار دے مواقع پیدا کرݨ کیتے تعاون کوں قدر نال ݙیہدے۔ وزیراعظم بالخصوص آکھیا جو پاکستان دی ہنرمند افرادی قوت دی بین الاقوامی سرٹیفکیشن تے پیشہ ورانہ تربیت سانڳے عالمی لیبر مارکیٹ دے معیارات نال ہم آہنگ کرݨ کیتے انٹرنیشنل لیبر آرگنائزیشن ولوں ودھ سہولت معاون ثابت تھیسی، بین الاقوامی معاہدیاں دے تقاضیاں دے مطابق حکومت قومی افرادی قوت دی فلاح و بہبود، تحفظ اتے پیشہ ورانہ ترقی کیتے موثر اقدامات کریندی پئی اے، صنعتی ترقی، پیداواری استعداد اتے اساݙی لیبر مارکیٹ دی مسابقتی صلاحیت اچ وادھے کیتے حکومت سمال اینڈ میڈیم انٹرپرائزز ڈویلپمنٹ اتھارٹی (سمیڈا) کوں نویں سرو فعال کیتے۔ انٹرنیشنل لیبر آرگنائزیشن دے ڈائریکٹر جنرل گلبرٹ ایف ہونگبو ملاقات تے وزیراعظم دا شکریہ ادا کریندے پاکستان نال مل تے ملک دی افرادی قوت دے تحفظ، پیشہ ورانہ ترقی اتے خوشحالی کیتے مشترکہ کوششاں اڳو تے ودھاوݨ دا آکھیے۔ ملاقات اچ انٹرنیشنل لیبر آرگنائزیشن دے ڈائریکٹر جنرل نال سینئر مشیر ہیتومی ناکاگومے اتے پاکستان اچ آئی ایل او دے کنٹری آفس دے ڈائریکٹر گیر تھامس ٹونسل وی موجود ہن۔ وفاقی وزیر برائے سمندر پار پاکستانی و انسانی وسائل دی ترقی چوہدری سالک حسین، وزیراعظم دے معاونِ خصوصی سید طارق فاطمی، قائم مقام سیکرٹری خارجہ نبیل منیر، ایمپلائرز فیڈریشن آف پاکستان دے صدر مجید عزیز، آئی ایل او دی گورننگ باڈی دے ڈپٹی ممبر (ورکرز) محمد سعد تے اعلیٰ حکومتی حکام ملاقات اچ شریک ہن۔