اقوامِ متحدہ دے سیکرٹری جنرل انتونیو گوتریس دی امریکہ-ایران جھیڑے اچ پاکستان دے کردار دی تعریف، پاکستان کثیر الجہتی نظام دا مضبوط حامی، عالمی امن و سلامتی اتے تنازعات دے حل کیتے کردار ادا کریندا رہسی: نائب وزیراعظم اسحاق ڈار

اسلام آباد۔6 اکتوبر(اے پی پی)اقوام متحدہ دے سیکرٹری جنرل انتونیو گوئترس اتے نائب وزیراعظم و وزیرِ خارجہ سینیٹر محمد اسحاق ڈار مشترکہ پریس کانفرنس اچ اعادہ کیتے جو خطے اتے علاقائی امن و سلامتی، جھیڑیاں دے حل کیتے کٹھیاں کوششاں جاری رکھیاں ویسن، باہمی مسلیاں دا حل سفارتکاری، مذاکرات اتے عالمی قوانین دے مطابق کݙھݨ کیتے اقدامات یقینی ٻݨائے ویسن۔ نائب وزیر اعظم و وزیر خارجہ محمد اسحاق ڈار اقوامِ متحدہ دے سیکرٹری جنرل انتونیو گوتریس دے دورۂ پاکستان دا خیرمقدم کریندے آکھیے جو اے ساݙے اقوام متحدہ نال تکڑے ڳانݙھے، کثیر الجہتی نظام کیتے مشترکہ عزم اتے عالمی چیلنجاں نال نمٹݨ کیتے باہمی تعاون دا عکاس اے اتے پاکستان کثیر الجہتی نظام دا مضبوط حامی اے۔ انہاں آکھیا جو اساں اقوامِ متحدہ دے چارٹر کوں برقرار رکھݨ، ایںدے تے عملدرآمد، عالمی امن و سلامتی اتے امن دے قیام کیتے تعاون اتے عالمی چیلنجاں نال نمٹݨ کیتے کثیر الجہتی نظام کوں مضبوط بݨاوݨ کیتے مسلسل کوشاں ہیں۔ پاکستان اقوامِ متحدہ دے سیکرٹری جنرل دی قیادت اتے کثیر الجہتی نظام، بین الاقوامی قانون، ڳالھ مہاڑ اتے تنازعات دے پرامن حل کیتے انہاں دے اصولی عزم کوں سراہندے ہیں، اقوامِ متحدہ دے سیکرٹری جنرل نال پاکستان اتے اقوامِ متحدہ دے تعاون، موجودہ بین الاقوامی چیلنجاں اتے عالمی و علاقائی امور تے تفصیلی ڳالھ کیتی اے جیندے اچ عالمی و علاقائی سکیورٹی صورتحال، مغربی ایشیا، مشرقِ وسطیٰ و فلسطین، جنوبی ایشیا، جموں و کشمیر، افغانستان، دہشت گردی، امن مشناں دے مستقبل، عالمی ترقی، موسمیاتی تبدیلی اتے کثیر الجہتی نظام دا مستقبل شامل ہن۔ انہاں آکھیا جو پاکستان سلامتی کونسل دا منتخب رکن اے، پاکستان بالخصوص ڳالھ مہاڑ، سفارتکاری، تنازعات دے پرامن حل اتے عالمی امن و سلامتی کیتے ودھ کردار ادا کیتے۔ انہاں آکھیا جو سلامتی کونسل دی قرارداد 2788 مذاکرات، ثالثی اتے تنازعات دے پرامن حل دی اہمیت کوں اڳونہا کریندی اے، اساں قرارداد تے عملدرآمد کیتے سیکرٹری جنرل دیاں کوششاں کوں سراہندے ہیں، اقوامِ متحدہ کوں عالمی تنازعات اتے بحراناں نال نمٹݨ کیتے مرکزی کردار ادا کرݨا چاہیدے اتے سفارت کاری کوں کامیاب تھیووݨ دا موقع ݙیوݨا چاہیدے، پاکستان خلیجی خطے اچ مذاکرات اتے کشیدگی اچ کمی کیتے فعال اتے تعمیری کردار ادا کیتاے، تصادم دی بجائے تعاون، تنازعے دی بجائے مذاکرات تے طاقت دے استعمال دی بجائے پرامن حل کوں فروغ ݙتے،پاکستان اقوامِ متحدہ دے سیکرٹری جنرل دے یو این 80 اقدام دی حمایت کریندے، ترقی پذیر ملکاں دیاں ترجیحات اتے خدشات اقوامِ متحدہ دے ایجنڈے اچ مرکزی حیثیت رکھدن، اقوامِ متحدہ کوں مزید مضبوط بݨاوݨ کیتے کوششاں ودھایاں ویسن۔ انہاں آکھیا جو اساں تنازعہ جموں و کشمیر تے اقوامِ متحدہ دی سلامتی کونسل دیاں قرارداداں دے مطابق ایں تنازعے دے حل کیتے اقوامِ متحدہ دے مسلسل موقف کوں سراہندے ہیں۔ اسحاق ڈار آکھیا جو انہاں اقوامِ متحدہ دے سیکرٹری جنرل کوں بھارت دی طرفوں سندھ طاس معاہدے کوں یکطرفہ طور تے معطل رکھݨ دے معاملے دا وی ݙسائے جیڑھا بین الاقوامی قانون دی کھلی خلاف ورزی اے، بھارت پاݨی کوں ہتھیار دے طور تے استعمال کرݨ توں باز رہوے اتے سندھ طاس معاہدے دے مطابق اپݨیاں ذمہ داریاں پوریاں کرے۔ نائب وزیراعظم و وزیرِ خارجہ آکھیا جو انہاں پاکستان اچ دہشت گردی دے حملیاں کیتے افغان سرزمین دے مسلسل استعمال دا معاملہ وی چاتے، امید اے جو اقوامِ متحدہ دے سیکرٹری جنرل اتے عالمی برادری انہاں چیلنجاں نال نمٹݨ کیتے ساݙا ہتھ ونݙیسن۔ اقوامِ متحدہ دے سیکرٹری جنرل انتونیو گوتریس آکھیا جو اقوامِ متحدہ پاکستان کوں یکجہتی تے حل دا ذریعہ سمجھدے، پاکستان مشکل حالات اچ وی ہمدردی تے ذمہ داری ݙکھائی، پاکستان لکھاں افغان پناہ گزیناں دی میزبانی کیتی، ݙھاکیاں تئیں تنازعات توں متاثرہ لکھاں افغاناں کیتے دروازے کھلے رکھین، اقوامِ متحدہ افغاناں دی رضاکارانہ، باوقار اتے محفوظ واپسی دی حمایت کریندے، پاکستان عالمی سطح تے مباحثیاں اچ اپݨا اہم تے ضروری نقطۂ نظر پیش کریندے۔ انہاں آکھیا جو امریکہ تے ایران وچال ڳالھ مہاڑ کیتے کردار ادا کرݨ تے پاکستان دی قیادت کوں سلام پیش کرینداں، انہاں کوششاں نال 17 جون دی اسلام آباد مفاہمتی یادداشت تے دستخط تھئے، جنگ بندی تھئی تے مستقبل اچ مذاکرات کیتے فریم ورک تیار کیتا ڳیا، ہر پاکستانی کوں ایں اہم کردار تے ماݨ ھووݨا چاہیدے۔ انہاں آکھیا جو سارے فریق تنازعات ختم کرن، سفارت کاری دو واپس آون اتے عالمی قانون دے مطابق بحری آمد و رفت دے حقوق تے آزادیاں کوں مکمل بحال کرن۔ انہاں آکھیا جو فلسطینی عوام کوں حقِ خودارادیت ݙتے بغیر خطے اچ پائیدار امن قائم نئیں تھی سڳدا، ایں خطے اچ وی امن تے سلامتی مذاکرات اتے تعاون نال ہی ممکن اے، پاکستان اقوامِ متحدہ دی سلامتی کونسل اچ ݙو سال اچ اپݨا بھرپور کردار ادا کیتے تے کثیر الجہتی نظام کوں مضبوط بݨاوݨ، مذاکرات تے ثالثی دی اہمیت ودھائی اے، پاکستان اقوامِ متحدہ دے امن دستیاں اچ طویل عرصے توں نمایاں کردار ادا کریندا پئے اتے پاکستان دے بہادر اہلکاراں دنیا اچ امن کیتے اپݨیاں جاناں دا نذرانہ وی پیش کیتے، اساں انہاں دیاں قربانیاں کوں خراجِ عقیدت پیش کریندے ہیں، اساں اقوامِ متحدہ دی قرارداد 2823 دی تیاری کیتے پاکستان تے ڈنمارک دا قابلِ قدر کردار اے۔ انہاں آکھیا جو 156 ملکاں قرارداد دی سرپرستی کیتی جو سلامتی کونسل دی تاریخ اچ تعداد اچ سب توں زیادہ اے— انہاں آکھیا جو پاکستان دہشت گردی دی وجہ توں بھاری جانی نقصان برداشت کیتے، اقوامِ متحدہ پاکستان نال کھڑے، 2022ء اچ پاکستان کوں سیلاب توں شدید نقصان تھیا اینجھی تباہی ایں توں پہلے میں نئیں ݙٹھی ٻھل پاکستان دے عوام صورتحال نال نمٹݨ کیتے بھرپور یکجہتی اتے عزم ݙکھائے۔