صدرِ مملکت نال پولینڈ دے وزیر تے خصوصی خدمات دے کوآرڈینیٹر دی ملاقات

اسلام آباد۔6 اکتوبر(اے پی پی)صدرِ مملکت آصف علی زرداری نال پولینڈ دے وزیر، کونسل آف منسٹرز دے رکن تے خصوصی خدمات دے کوآرڈینیٹر توماش سیئمونیئک ایوانِ صدر اسلام آباد اچ ملین۔ صدرِ مملکت ݙوہاں وچال تعاون دی نوعیت تے اطمینان کریندے ہوئیں امید کیتی جو اے ڳانݙھا ٻیا تکڑا تھیسی۔ انہاں ایں تاریخی دوستی کوں ٻیا مضبوط بݨاوݨ کیتے کاروباری برادریاں وچال روابط، عوامی سطح تے تبادلیاں اتے اعلیٰ قیادت دے باقاعدہ روابط ودھاوݨ دی اہمیت تے زور ݙتا۔ صدرِ مملکت یورپی یونین دے جی ایس پی پلس پروگرام دے حوالے نال پاکستان کیتے پولینڈ دی حمایت کوں سراہیا۔ توماش سیئمونیئک آکھیا جو پولینڈ، پاکستان نال سکیورٹی، امیگریشن تے انسدادِ دہشت گردی سودھا مختلف شعبیاں اچ تعاون دے امکانات دا جائزہ ڳھندا پئے اتے پاکستان نال دفاعی اتے اقتصادی تعلقات ؤدھاوݨ چاہندے۔ صدرِ مملکت کوں ݙسایا ڳیا جو اسلام آباد دی ہک شاہراہ دا ناں ایئر کموڈور ولادیسلاو یوزف ماریان تورووچ دے ناں تے رکھیا ویندا پئے، جنہاں ݙوجھی جنگِ عظیم ویلھے پولینڈ دی فضائیہ اتے بعد اچ رائل ایئر فورس اچ خدمات انجام ݙتیاں۔ او 1948ء اچ پاکستانی حکام دی دعوت تے پولینڈ دے تقریباً 30 ٻئے پائلٹاں، انجینئراں اتے تکنیکی ماہرین نال پاکستان آئے ہن اتے پاکستان ایئر فورس دی ترقی اچ اہم کردار ادا کیتا۔ ملاقات اچ پولینڈ ولوں پاکستان اچ پولینڈ دے سفیر میکائیل پیسارسکی، ملٹری کاؤنٹر انٹیلی جنس سروس دے سربراہ جنرل یاروسواف ستروژک، فارن انٹیلی جنس ایجنسی دے ڈپٹی سربراہ کرنل والڈیمار مولارچک تے وزیراعظم دے دفتر دے نیشنل سکیورٹی ڈیپارٹمنٹ دے ڈائریکٹر کرنل میچیسواف ماتیسیاک شریک ہن۔ پاکستان ولوں وفاقی وزیرِ داخلہ محسن نقوی، سینیٹر شیری رحمان، سینیٹر سلیم مانڈوی والا تے سابق وفاقی وزیر سید نوید قمر ملاقات اچ موجود ہن۔