وزیراعظم شہباز شریف دی مین لائن ون دی اپ گریڈیشن تے تیزی نال کم کرݨ دی ہدایت

اسلام آباد۔7 اکتوبر (اے پی پی) وزیراعظم محمد شہباز شریف مین لائن ون (ML-1) دی اپ گریڈیشن تے تیزی نال کم کرݨ تے پاکستان ریلوے اچ کارپوریٹ طرز تے اصلاحات دی ہدایت کریندیں ہوئیں آکھیا جو پاکستان ریلوے دی ترقی، مسافراں کوں بہتر سفری سہولتاں دی فراہمی تے فریٹ ٹرانسپورٹ اچ اضافے کیتے مین لائن ون دی جدت کلیدی اہمیت دی حامل اے، ریلوے دی ارباں روپے مالیت دی نشاندہی کیتی ڳئی اراضی کوں استعمال کریندیں ہوئیں کمرشل بنیاداں تے ایم ایل ون دی تعمیر کیتی ونجے۔ وزیراعظم آفس دے میڈیا ونگ توں جاری بیان دے مطابق وزیراعظم محمد شہباز شریف دی صدارت پاکستان ریلوے اچ اصلاحات تے جائزہ اجلاس اسلام آباد اچ تھیا۔ وزیراعظم پاکستان ریلوے دی قبضہ کیتی ڳئی زمیناں دی نشاندہی تے انہاں دی واگزاری دے حوالے نال چیئرمین نیب دی سربراہی اچ نیب تے وزارتِ ریلوے دیاں ٹیماں دیاں کوشساں کوں سراہیا۔ اجلاس توں خطاب کریندے ہوئیں وزیراعظم آکھیا جو ریلوے دی املاک اچ موجود حقیقی تجارتی صلاحیت کوں استعمال کرݨ دی ضرورت اے، ریلوے دی قیمتی اراضی کوں کمرشل مقاصد کیتے موثر انداز اچ استعمال کر تے ملکی معیشت تے ریلوے دی ترقی اچ کردار ادا کیتا ونجے۔ انہاں آکھیا جو ریلوے کوں مضبوط تے معاشی طور تے خود کفیل بݨاوݨ کیتے کارپوریٹ طرز تے اصلاحات حکومت دی ترجیحات اچ شامل ہن، ریلوے کوں منافع بخش بݨاوݨ تے ایں دے آپریشنز کوں بہتر کرݨ کیتے وزیرِ ریلوے بھرپور محنت کریندے پئن۔ وزیراعظم ریلوے دی اراضی تے مختلف کمرشل منصوبیاں دے ذریعے بینکاں دی فنڈنگ حاصل کر تے ایم ایل ون دی تعمیر کیتے بروئے کار گھن آوݨ دی منظوری ݙتی۔ وزیراعظم ریلوے دی اراضی دی حقیقی تجارتی استعداد کوں سامھے رکھیندیں ہوئیں آندے ݙو ہفتیاں اچ جامع منصوبہ پیش کرݨ دی ہدایت وی کیتی۔ اجلاس کوں ݙسایا ڳیا جو 1726 کلومیٹر طویل ایم ایل ون دی اپ گریڈیشن کوں چار وݙے حصیاں اچ تقسیم کیتا ڳئے، جنہاں اچ کراچی-روہڑی، روہڑی-ملتان، ملتان-لاہور تے لاہور-پشاور دے سیکشن شامل ہن۔ اجلاس کوں ݙسایا ڳیا جو کراچی-روہڑی سیکشن دی اپ گریڈیشن کیتے بین الاقوامی فنانسنگ توں استفادہ کیتا ویندا پئے جݙانجو ایم ایل ون دے ٻیاں سیکشناں کیتے مقامی وسائل توں فنڈنگ دا منصوبہ بݨایا ویندا پئے۔ اجلاس کوں ایم ایل ون منصوبے دی تعمیر دے مختلف مرحلیاں، کراچی-روہڑی سیکشن تے پیش رفت تے ریلوے دی ملکیتی اراضی دے حوالے نال بریفنگ ݙتی ڳئی۔ وزیراعظم ہدایت کیتی جو ریلوے دی واگزار کرائی ڳئی اراضی کوں کمرشل بنیاداں تے استعمال کرݨ تے ایم ایل ون دی تعمیر کیتے بینکاں دی فنڈنگ حاصل کرݨ دے حوالے نال جامع لائحہ عمل ݙو ہفتیاں اچ پیش کیتا ونجے۔ اجلاس اچ وفاقی وزراء احسن اقبال، احد خان چیمہ، محمد اورنگزیب، حنیف عباسی، وزیرِ مملکت بلال اظہر کیانی، گورنر اسٹیٹ بینک جمیل احمد، چیئرمین نیب لیفٹیننٹ جنرل (ر) نذیر احمد بٹ تے متعلقہ اعلیٰ حکام شرکت کیتی۔