مہمان نوازی دی گرم جوشی پاکستان دا ہک انمول جوہر اے: فلپائنی سفیر

اسلام آباد، 11 اکتوبر (اے پی پی) پاکستان اچ فلپائن دے سفیر ڈاکٹر ایمانوئل آر فرنانڈیز مہمان نوازی دی گرم جوشی کوں “پاکستان دا ہک انمول جوہر” قرار ݙتے۔انہاں اج اتھاں اے پی پی (APP) ولوں تھیوݨ آلی ہک ویڈیو ٹاک شو اچ ڳالھ مہاڑ کیتی۔ پاکستان اچ رہائش تے کم کرݨ دے حوالے نال آپݨے ذاتی تاثرات دے بارے اچ پچیھے ڳئے ہک سوال دے جواب اچ، انہاں آکھیا جو جݙݨ توں انہاں ایں ملک اچ قدم رکھیے، او اتھاں دی منفرد گرم جوشی تے مہمان نوازی کوں محسوس کریندے پئن۔ “پاکستان بارے اچ آپݨے شاندار تجربے دے حوالے نال، میں اے آکھساں جو پاکستانی عوام دی گرم جوشی تے مہمان نوازی او شے اے جیندے دی میں بہوں تعریف کرینداں۔ جݙݨ میں پہلی وار پاکستان اچ قدم رکھیا، اوں ویلھے توں میں ایں گرم جوشی کوں محسوس کیتا۔ انہاں ہک یاد تازہ کریندے ہوئیں ݙسایا، “میݙے یاد اے جو میں تے میݙی اہلیہ ہک مقامی مال (mall) اچ گھمدے پئے ہاسے۔ اچانک ٻالاں دا ہک گروہ اساݙے پاسے آیا۔ او بالکل وی نہ شرمیندے پئے ہن۔ انہاں شائستگی نال اساݙے ناں پچھیے اتے اساݙے نال تصویر بݨواوݨ چاہی۔ بعد اچ، اساں نیشنل مونومنٹ (قومی یادگار) ڳئے اتے بالکل او کجھ اتھاں وی تھیا! لوکاں کھلے دل نال اساݙا استقبال کیتا۔ آپ کوں ٻیاں ملکاں اچ ایجھا ݙیکھݨ کوں نئی ملدا۔ اے صرف پاکستان اچ ہی نظر آندے۔ میݙا پختہ یقین اے جو اے پاکستان دا ہک انمول جوہر اے،آپ دی مہمان نوازی دی گرم جوشی۔ انہاں ڳالھ جاری رکھیندے ہوئیں آکھیا، تے یقیناً، ٻیا جوہر خود پاکستان دی خوبصورتی اے۔ جیویں جو میں ہمیشہ آہداں، پاکستان ہک بہوں وسیع تے خوبصورت ملک اے۔ اتھاں ہر شے موجود اے۔ اتھاں برف نال ڈھکے پہاڑ ہن، صحرا ہن، میدان ہن، گہما گہمی آلے شہر ہن تے پرسکون دیہی علاقے ہن۔ اے ہک خوبصورت ملک اے، تے ایہ تنوع محض جغرافیے تئیں ہی محدود نہیں اے۔ ڈاکٹر فرنانڈیز جیڑھے اسلام آباد اچ آسیان (ASEAN) کمیٹی دے چیئرمین وی ہن، زور ݙیندے ہوئیں آکھیا “ثقافتی تے لسانی اعتبار نال، نیز ٻیاں کئی پہلوؤاں توں، پاکستان غیر معمولی تنوع دا حامل ملک اے۔ انہاں آکھیا: “میݙا منݨ اے جو اے ہک ایجھا تجربہ اے جیڑھا ٻیاں ملکاں کوں وی حاصل کرݨا چاہیدے۔ تے اے ہک ایجھی شے اے جینکوں خاص طور تے آسیان کوں نہ صرف بطورِ تجربہ اپناوݨا چاہیدے، بلکہ ایں کوں ہک محرک قوت دے طور تے استعمال کریندے ہوئیں پاکستان دے نال زیادہ وسیع تے ݙونگھے تعاون آلے پاسے پیش قدمی کرݨی چاہیدی اے۔ انہاں ایں یقین دا اظہار کیتا جو پاکستان تے آسیان ملکاں دے درمیان حقیقی پل (bridge) پہلے ہی ہک انتہائی مضبوط بنیاد تے استوار اے، جیندے اچ آپسی احترام، دلکش قدرتی مناظر تے ناقابلِ فراموش تے لازوال مہمان نوازی شامل ہن۔