دہشت گردی تے خاموشی ملک دشمنی دے مترادف، پاکستان کوں ولا تباہی آلے پاسے نہ ونجݨ ݙتا ویسے، سعودی عرب دے خلاف جارحیت برداشت کائنی، وزیراعظم محمد شہباز شریف

اسلام آباد۔11 اکتوبر (اے پی پی) وزیراعظم محمد شہباز شریف دہشت گردی دے خاتمے کیتے غیر متزلزل عزم دا اعادہ کریندیں ہوئیں آکھیا جو دہشت گردی تے خاموشی ملک دشمنی دے مترادف اے، دہشت گرداں دا مقابلہ کرݨ وفاق دے نال خیبر پختونخوا حکومت دی وی ذمہ داری اے، صوبائی حکومت دی عدم توجہ دی وجہ نال دہشت گردی دے واقعیاں اچ اضافہ تھیا، خیبر پختونخوا حکومت دہشت گرداں دا مقابلہ کرݨ دی بجائے خاموش تماشائی بݨ ڳئی اے، 10 سال اچ خیبر پختونخوا حکومت کوں دہشت گردی دے خاتمے کیتے 800 ارب روپے ݙتے ڳئے لیکن پولیس، سی ٹی ڈی دی استعدادِ کار اچ اضافے تے کوئی توجہ نئی ݙتی، پیپلز پارٹی تے مسلم لیگ (ن) دی قیادت معاملیاں کوں ڳالھ مہاڑ نال حل کرݨ کوں ترجیح ݙتی، حکومتی ٹیم معاملہ فہمی کیتے خلوصِ نیت نال کوشش کیتی، وزیراعلیٰ خیبر پختونخوا مذاکرات اچ طے تھیوݨ آلے مسودے توں پچھوں ہٹ ڳئے، دہشت گردی دے واقعیاں کوں پچھوں سٹیندے ہوئیں اسلام آباد تے چڑھائی دا ناپاک منصوبہ بݨایا ڳیا، ملک کوں ولا تباہی آلے پاسے نہ ون٘ڄݨ ݙتا ویسے، قانون آپݨا راستہ آپ بݨیسی، افغانستان اغیار دے ہتھوں اچ کھیڈدا پئے، افغان سرزمین دا پاکستان دے خلاف دہشت گردی کیتے استعمال ہرگز قبول نئی، پاکستان کوں نقصان پہنچاوݨ دی ہر کوشش کوں ناکام بݨیسوں، آئی ایم ایف دے نال سٹاف لیول معاہدہ طے تھی ڳئے، چیلنجز تے قابو پاوݨ کیتے ݙینھ رات کوشاں ہیں، عالمی سطح تے پاکستان دی سفارتی کوشساں کوں قدر دی نگاہ نال ݙٹھا ڳئے، سعودی عرب تے تھیوݨ آلے حملیاں دی شدید مذمت کریندوں، سعودی عرب دے نال ݙوپاسہ تے سہ فریقی دفاعی معاہدہ اے، حرمین شریفین دے تقدس تے تحفظ کیتے پوری مسلم اُمہ متحد اے، سعودی عرب دے خلاف کہیں جارحیت کوں برداشت نہ کریسوں۔ اے ڳالھیں انہاں اتوار کوں اتھاں وفاقی کابینہ دے اجلاس توں خطاب کریندیں ہوئیں کیتا۔ وزیراعظم وفاقی کابینہ دے ارکان کوں ݙسایا جو آئی ایم ایف نال سٹاف لیول معاہدہ تھی ڳئے امید اے جو ایں سال 1.2 ارب ڈالر دی قسط مل ویسے، نیویارک اچ آئی ایم ایف دی مینیجنگ ڈائریکٹر ملاقات اچ پاکستان دی معاشی کامیابیاں تے ٹیم ورک کوں سراہیا تے پاکستان کوں ہک بدلیا ہوا پاکستان قرار ݙتا، اساں سارے رَل تے سیاسی تے فوجی قیادت رل تے ݙینھ رات کم کیتے تے ملک اچ مالیاتی نظم و نسق جیندے دی وݙے عرصے توں ضرورت ہئی دے نال نال ڈھانچہ جاتی اصلاحات کیتیاں ڳئن، اے ہک لمبا سفر اے لیکن اگر ݙینھ رات محنت کریسوں تاں آپݨی منزل تے پڄ ویسوں۔ انہاں لندن سٹاک ایکسچینج دے دورے تے غیر ملکی کاروباری شخصیات تے کمپنیاں دے نمائندیاں نال آپݨی ملاقاتاں دا وی ذکر کیتا جنہاں پاکستان اچ تھیوݨ آلی معاشی اصلاحات کوں بھرپور انداز اچ سراہیا تے ایں امید دا اظہار کیتا جو اگر ایں طرح اے سفر جاری رہیا تاں پاکستان غیر ملکی سرماے کاری کیتے ہک پرکشش ملک بݨ ویسے۔ وزیراعظم آکھیا جو انہاں وفاقی حکومت ولوں بݨائے ڳئے ٹیکنالوجی پارک دا افتتاح کیتے تے ایں دا ناں دانش ٹیکنالوجی پارک رکھیا ڳئے، پچھلی حکومت دے زمانے اچ ایں دا آغاز کیتا ڳیا، کوریا دی حکومت ایں کیتے آسان شرائط تے قرضہ ݙتا لیکن ایں دا جیہڑا حشر کیتا ڳیا اغیار وی ایں طرح دا تصور نئی کر سڳدے اتے اے بربادی دی داستان بݨ ڳیا لیکن اساݙے وزراء تے افسراں ہک ٹیم دی طرح کم کر تے ایں منصوبے کوں پاۓ تکمیل تے پڄایا، الحمدللہ ہݨ اے مکمل تھی ڳئے، ایں طرح دے منصوبے کراچی، لاہور، کوئٹہ، پشاور تے ٻیاں شہراں اچ وی بݨیسوں جتھاں ہزاراں نویں لکھاں، کروڑاں نوجواناں کیتے سٹارٹ اپس دے نال نال ایس ایم ایز کوں پھلݨ پھولݨ دا موقع ملسی، انکیوبیشن سینٹرز بݨسن تے جدت کوں فروغ ملسی تے غیر ملکی کمپنیاں آسن۔ وزیراعظم آکھیا جو سعودی عرب چین دی طرح پاکستان دا انتہائی برادر تے بااعتماد دوست ملک اے، مختلف وقتاں اچ سعودی شاہی خاندان تے سعودی حکومت تے عوام پاکستان دی ہمیشہ مدد کیتی، ایران وی پاکستان دا برادر تے ہمساے ملک اے، موجودہ حکومت دے دور اچ ݙوہیں ملکاں دے تعلقات مضبوط تھئن، اساݙا ہک ہی مقصد اے جو خطے اچ امن قائم ہووے، ہرمز دے بعد ہݨ باب المندب اچ جیہڑا خونی کھیݙ کھیݙیا ویندا پئے او انتہائی افسوسناک اے، سعودی عرب دے نال اساݙے 80 سال نویں سینکڑاں سالاں تے محیط اخوت تے ایمان دے رشتے ہن، دفاع دے حآلے نال اساݙا ݙوپاسہ تے سہ فریقی معاہدہ اے، حوثی جیہڑا کجھ کریندے پئن انہاں دی جتنی وی مذمت کیتی ون٘ڄے گھٹ اے، دہشت گردی دے حوالے نال وزیراعظم آکھیا جو صوبہ خیبر پختونخوا تے بلوچستان اچ جیہڑا کجھ پچھلے ݙو ݙھائی سال اچ تھیندا پئے تے جئیں طریقے نال عام شہریاں تے سکیورٹی اہلکاراں کوں دہشت گرد شہید کریندے پئن اتے نشانہ بݨیندے پئن اے انتہائی تکلیف دہ واقعات ہن، افواجِ پاکستان دہشت گرداں دا قلع قمع کریندیاں پئن تے انہاں کوں چݨ چݨ تے جہنم رسید کیتا ویند پئے۔ وزیراعظم آکھیا جو افغانستان کوں ولا ولا باور کرایا ڳئے جو اساں ہمساے ملک ہیسے اتے اساں ہمسائے رہوݨا اے مگر انہاں کوں اے ڳالھ ہݨ تئیں سمجھ نئی آندی پئی تے او اغیار دے ہتھاں اچ کھیڈدے پئن، پاکستان دے خلاف دہشت گردی کیتے افغانستان دی سرزمین دا استعمال قبول نئی، ہر ݙینھ دہشت گردی دے ودهے انداوناک واقعات تھیندن، خیبر پختونخوا حکومت بجائے انہاں دہشت گرداں کوں للکارݨ تے انہاں دے خلاف کارروائی کرݨ دے خاموش تماشائی بݨ ڳئی اے، پولیس تے سی ٹی ڈی دی استعدادِ کار ودھاوݨ کیتے کجھ نئی کیتا، خیبر پختونخوا اچ دہشت گردی دے واقعیاں اچ عام شہری، سیاستدان، ڈاکٹرز، انجینئرز، دکاندار سارے شہید تھئن، انسدادِ دہشت گردی کیتے 2010ء توں 2026ء تئیں خیبر پختونخوا حکومت کوں 800 ارب روپے ݙتے ڳئن لیکن نہ تاں پولیس تے سی ٹی ڈی کوں مضبوط کیتا ڳیا، نہ انہاں دی تربیت دی طرف توجہ ݙتی ڳئی تے نہ انٹیلی جنس کوں بہتر بݨایا ڳیا، ٹانک، ڈیرہ اسماعیل خان تے ٻیاں مقاماں تے دہشت گردی دے آئے روز واقعات تھیندن، 13 سال توں خیبر پختونخوا اچ اے حکومت کریندے پئن عوام کوں انہاں کیا ݙتے، میں سمجھدا ہاں ایں توں ودھ ملک دشمنی دی ٻئی کوئی حرکت تھی نئی سڳدی، اے چاہندن جو مزدور کارخانے نہ ون٘ڄن، دکاندار دکاناں تے نہ ونڄ سکن، ٻال سکولاں اچ نہ ونڄ سڳن اتے پاکستان اچ کوئی سرمایہ کاری نہ کرے تے ملک ولا تباہی آلے پاسے ونڄے، اے پاکستان کوں بالکل لاچار کرݨ چاہندن اے نہ تھیسی، وزیراعظم آکھیا جو جمیعت علمائے اسلام (ف) دے امیر مولانا فضل الرحمان نال وی ملاقات تھئی، انہاں وی مذاکرات اچ کردار ادا کرݨ دی ہامی بھری، انہاں کوں ولا وی غیر رسمی طور تے آکھیا ڳیا جو لانگ مارچ ختم کر ݙیو ہݨ وی اساں ڳالھ مہاڑ کر سڳدوں لیکن انہاں ایں دا کوئی مثبت جواب نئی ݙتا۔ وزیراعظم آکھیا جو دہشت گردی دے واقعیاں اچ عام شہری تے سکیورٹی اہلکار شہید تھیندے پئن لیکن خیبر پختونخوا حکومت تے وزیراعلیٰ کوں تاں توفیق نئی ہوندی جو انہاں واقعیاں دی مذمت کرن، پانی ہݨ سر توں گزردا پئے، اساکوں فیصلہ کرݨا اے، ہݨ یا کݙاہیں نئی تاریخ اساکوں انہاں فیصلیاں نال یاد رکھسی۔