خیبرپختونخوا اچ دہشت گردی دے واقعات اچ 200 فیصد ودھارا تھیا، ایمرجنسی دا فیصلہ آئینی اے، وفاقی وزیرِ قانون اعظم نذیر تارڑ

اسلام آباد۔13 اکتوبر (اے پی پی) وفاقی وزیرِ قانون و انصاف سینیٹر اعظم نذیر تارڑ آکھیے جو خیبرپختونخوا اچ ایمرجنسی دا نفاذ آئین دے آرٹیکل 232 تے 234 دے تحت کیتا ڳئے، دہشت گردی دے ودھدے واقعات ایں فیصلے اچ اہم عنصرہن، ایمرجنسی تے گورنر راج دی مدت دا کوئی حتمی ٹائم فریم نی ݙے سڳدے، لوڑھ پووݨ تے انہاں اچ توسیع کیتی ونڄ سڳدی اے۔غیر ملکی میڈیا دے نمائندیں کوں بریفنگ ݙیندے وفاقی وزیرِ قانون آکھیا جو آئین ریاستی نظامِ حکومت تے مختلف حالات نال نبڑݨ دے طریقۂ کار دا تعین کریندے۔ انہاں آکھیا جے ایمرجنسی دا نفاذ سیاسی مقصد کیتے کرݨا ہوندا تاں اے اقدام پہلے وی کیتا ونڄ سڳدا ہئی۔ اعظم نذیر تارڑ آکھیا جو خیبرپختونخوا دی سابقہ حکومت دا دہشت گردی کے خلاف عدم تعاون تے کردار ریکارڈ اُتے ہے، جے دہشت گردی مکاوݨ کوں ترجیح ݙیوݨ دی بجائے سیاسی مفاد کیتے لوکاں کوں متحرک کیتا ونڄے تے وفاقی اداریں دے نال رل تے دہشت گردی دے خلاف مربوط کوششاں نہ کیتیاں ونڄن تاں اے افسوسناک اے۔انہاں آکھیا جو وزیراعظم معاملہ وفاقی کابینہ دے سامݨے رکھیا جتھاں سارے امور دا جائزہ گھنݨ دے بعد خیبرپختونخوا دے عوام دے تحفظ تے وفاق کوں تکڑا بݨاوݨ کیتے آئینی رستے اختیار کرݨ دا متفقہ فیصلہ کیتا ڳیا۔ وفاقی وزیرِ قانون آکھیا جو پاکستان کئی ݙہاکیں توں دہشت گردی دی وٹھ اچ ہے تے اے کوئی نواں مسئلہ کائنی، افغان جنگ دے بعد خطے اچ دہشت گردی دے اثرات سامݨے آندے ریہن، پاکستانی قوم دہشت گردی دے خلاف جنگ اچ بہادری تے قربانیاں دی مثالاں قائم کیتیاں تے ایں حوالے نال کوششاں اڄ وی جاری ہن۔انہاں آکھیا جو خیبرپختونخوا اچ اڄوکے سالاں اچ دہشت گردی دے واقعات ودھئن، 2021ء توں 2024ء دے دوران صوبے اچ دہشت گردی دے 2,911 واقعات رپورٹ تھئے بعد دے اعداد و شمار اچ اے تعداد ودھ تے تقریباً 8,600 تئیں پڄ ڳئی۔ انہاں موجب خیبرپختونخوا اچ دہشت گردی دے واقعات اچ تقریباً 200 فیصد ودھارا تھئے، دہشت گردی متعلق اے اعداد و شمار مختلف سرکاری اداریں وفاقی حکومت نال شیئر کیتے۔اعظم نذیر تارڑ آکھیا جو پاک فوج قانون دے نفاذ تے داخلی امن و امان دے قیام اچ اپݨا کردار ادا کریندی پئی اے جݙاں جو ملکی سرحداں دا دفاع مسلح افواج دی بنیادی ذمہ واری اے، صوبائی حکومتاں دی لوڑھ تے مسلح افواج داخلی بدامنی تے قابو پاوݨ کیتے معاونت کریندین۔ انہاں آکھیا جو پاک فوج تے سکیورٹی اداریں دہشت گردی دے خلاف جنگ اچ بہادری دا مظاہرہ کیتا تے قیمتی جاناں دیاں قربانیاں ݙتیاں، بے گناہ شہریاں دیاں جاناں دا تحفظ ریاست دی بنیادی ذمہ واری اے۔وفاقی وزیرِ قانون آکھیا جو دہشت گردی دے خلاف کوششاں کوں مؤثر بݨاوݨ کیتے متعلقہ اداریں وچال تکڑا رابطہ تے مربوط حکمتِ عملی ضروری اے، پاکستان اچ وفاقی تے صوبائی حکومتاں دے اختیارات آئین دے تحت تقسیم ہن تے ݙوہیں حکومتاں اپݨے آئینی و قانونی دائرۂ اختیار اچ رہندے کم کریندن۔