پولی کلینک ٹو ہک سال اچ بݨ ویسے ، وفاقی وزیرِ صحت مصطفیٰ کمال

اسلام آباد۔13 اکتوبر (اے پی پی) وفاقی وزیرِ صحت مصطفیٰ کمال آکھیے جو پولی کلینک ٹو ہک سال اچ مکمل تھی ویسے، ایں منصوبے اچ فائر سیفٹی سودھے ٻئے سارے ضروری اقدامات وی کیتے ویسن۔ پمز اچ میڈیا نال ڳالھ کریندے وفاقی وزیرِ صحت آکھیا جو خیبرپختونخوا اچ جیہڑا کجھ تھئے، ایں دے ذمہ وار وزیراعلیٰ خیبرپختونخوا ہن۔ پاکستان تحریکِ انصاف دے دوستاں کوں ہݨ وی آہداں جو ریاست مخالف رویہ اختیار نہ کرو۔ اعتراضات تے اختلافات ضرور ہوندن، لیکن ریاست کوں تباہ نی کیتا ویندا۔وسائل دی ونڈ متعلق ڳالھ کریندے وفاقی وزیرِ صحت آکھیا جو قابلِ تقسیم محاصل اچوں 57.5 فیصد صوبیں کوں ݙتا ویندے۔ اڄوکے سال صوبیں کوں 8 ہزار 884 ارب روپے ݙتے ڳئن، جݙاں جو سندھ کوں گزریل 17 سالاں توں 22 ہزار ارب روپے ملیےِ۔ سوال اے ہے جو اتنے وسائل دے باوجود عوام تئیں بنیادی سہولتاں کیوں نی پجدیاں پیاں؟ وفاقی وزیرِ صحت آکھیا جو پاکستان تے سندھ دے مسئلیں دا حل انتظامی یونٹس کوں چھوٹے پیمانے تے منظم کرݨ اچ اے تاں جو عوام کوں بنیادی سہولتاں ݙیوݨ یقینی بݨایا ونڄ سڳے۔وفاقی وزیرِ صحت کراچی دی آبادی دے اعداد و شمار دا حوالہ ݙیندے آکھیا جو 2017ء دی مردم شماری اچ کراچی دی آبادی ہک کروڑ 60 لکھ درج کیتی ڳئی، جݙاں جو 2023ء دی مردم شماری اچ اے تعداد ہک کروڑ 30 لکھ ݙسائی ڳئی۔ وفاقی حکومت ایں معاملے دا نوٹس ڳھدا تے مردم شماری اچ چار واری توسیع کیتی۔ انہاں آکھیا جو کراچی اچ چھوٹے انتظامی یونٹس بݨائے ونڄن، کیوں جو موجودہ نظام اچ وسائل عوام تئیں نئیں پڄدے پئے۔