دہشت گردی دے خلاف ہک ملک اچ ݙو مختلف پالیسیاں نی تھی سڳدیاں، وفاقی حکومت دہشت گردی دے خلاف متفقہ حکمتِ عملی کیتے ٻہوں کوششاں کیتیاں، وفاقی وزیرِ اطلاعات عطا اللہ تارڑ دی غیر ملکی میڈیا نمائندیں کوں بریفنگ

اسلام آباد۔13 اکتوبر (اے پی پی) وفاقی وزیرِ اطلاعات و نشریات عطا اللہ تارڑ آکھیے جو دہشت گردی دے خلاف ہک ملک اچ ݙو مختلف پالیسیاں نی تھی سڳدیاں، وفاقی حکومت خیبر پختونخوا اچ دہشت گردی مکاوݨ کیتے پاکستان تحریکِ انصاف (پی ٹی آئی) تے صوبائی حکومت دے نال کئی واری مذاکرات دے ذریعے متفقہ حکمتِ عملی اختیار کرݨ دی کوشش کیتی تاں جو وزیراعلیٰ ایں تے نہ منیندے ہن ۔ گزریل چھی سالاں اچ دہشت گردی دے واقعات اچ تقریباً 11 گنا ودھارا تھیا، 2025ء اچ دہشت گردی دے 3,774 واقعات رپورٹ تھئے جݙاں جو ستمبر 2026ء تئیں اڄوکے سال دے دوران 2,857 واقعات پیش آچکئن۔انہاں سوال چاتا جو قومی مالیاتی کمیشن (این ایف سی) دے تحت خیبر پختونخوا حکومت کوں ݙتے گئے تقریباً 800 ارب روپے کتھاں خرچ تھئے؟ اے وسائل انسدادِ دہشت گردی دے محکمے، سیف سٹی کیمریں، فرانزک لیبارٹریاں تے پولیس کوں جدید آلات ݙیوݨ تے کیوں خرچ نی کیتے ڳئے؟ خیبر پختونخوا اچ دہشت گردی پاروں عوام، بالخصوص پولیس کوں بارا جانی ضیان چاوݨا پئے جݙاں جو صوبے اچ حکمرانی تے بنیادی عوامی خدمات ݙیوݨ دا نظام ٻہوں متاثر تھئے۔ خیبر پختونخوا دی نویں مشاورتی کونسل اچ دہشت گردی دا کوئی ہمدرد کائنی، ایں دے ارکان تعلیمی قابلیت، پیشہ ورانہ اہلیت تے عوامی خدمات دے تجربے دے اعتبار نال قابل تے تجربہ کار ہن۔وفاقی وزیرِ قانون اعظم نذیر تارڑ رلے غیر ملکی میڈیا نمائندیں کوں بریفنگ ݙیندے وفاقی وزیرِ اطلاعات عطا اللہ تارڑ آکھیا جو وفاقی حکومت پی ٹی آئی تے خیبر پختونخوا حکومت دے نال دہشت گردی دے خلاف اقدامات تے اتفاقِ رائے پیدا کرݨ کیتے کئی واری مذاکرات دی کوشش کیتی، اساݙا صرف ہک غیر سیاسی ایجنڈا ہئی جو دہشت گردی دے خلاف متحدہ تے متفقہ پالیسی اختیار کیتی ونڄے۔ پی ٹی آئی اپݨا مارچ جاری رکھ سڳدی ہئی تے اپݨے ٻئے سیاسی مطالبات وی پیش کرسڳدی ہئی تاں جو وفاقی حکومت چاہندی ہئی جو دہشت گردی دے خلاف پوری قوم تے ساری متعلقہ حکومتاں ہک مشترکہ حکمتِ عملی اختیار کرن۔انہاں آکھیا جو ملک اچ ایجھی حکومت نی تھی سڳدی جیڑھی دہشت گرداں نال ہمدردی تے انہاں دی حمایت کرے تے ایجھیاں پالیسیاں اپناوے جیندے نال دہشت گرداں کوں اپݨی کارروائیاں تے سرگرمیاں جاری رکھݨ دا موقع ملے۔ وفاقی وزیرِ اطلاعات آکھیا جو ہک ملک دیاں ݙو خارجہ پالیسیاں نی تھی سڳدیاں، ہک پاسے پاکستان افغانستان دے حوالے نال مذاکرات تے سفارتی کوششاں کریندا پئے تے مطالبہ کریندے جو اتھاں دہشت گرداں دی محفوظ پناہ گاہواں ختم کیتیاں ونڄن تے عبوری افغان حکومت قابلِ اعتبار اقدامات کرے تاں جو افغان سرزمین پاکستان دے اندر دہشت گردانہ حملیں کیتے استعمال نہ تھیوے جݙاں جو ݙوجھے پاسے صوبائی حکومت دی عبوری افغان حکومت دے بارے انڄ پالیسی اے۔ انہاں سوال کیتا جو دہشت گردی دے خلاف ہک ہی ملک اچ ݙو مختلف پالیسیاں کیویں تھی سڳدن؟انہاں آکھیا جو آئین سازاں آئین اچ متعلقہ دفعات ایجھے حالات نال نبڑݨ کیتے شامل کیتن لہٰذا چاتے ڳئے اقدامات 1973ء دے آئین دے تحت قانونی طور تے درست ہن۔ عطا اللہ تارڑ آکھیا جو خیبر پختونخوا اچ حکمرانی دا نظام مفلوج تھی چکیا ہئی تے امن و امان دی صورتحال ٻہوں خراب ہئی، جیں علاقیں اچ دہشت گرد سرگرم ہن اتھاں ٻیاں سیاسی جماعتاں کوں محفوظ گزرݨ دی اجازت نہ ہئی، لیکن پی ٹی آئی دے مارچ کوں دہشت گرداں دے نال مبینہ رابطہ کاری دے بعد محفوظ رستہ ݙتا ڳیا۔ انہاں سوال چاتا جو وفاق توں سی ٹی ڈی تے پولیس کوں جدید بݨاوݨ کیتے ݙتے ڳئے 800 ارب روپے کتھاں خرچ کیتے ڳئے؟انہاں آکھیا جو صوبے اچ سیاست، دہشت گردی تے جرائم دا گٹھ جوڑ قائم ہئی تے سرحد پار سمگلنگ کوں حکومتی سرپرستی حاصل رہی۔ پی ٹی آئی دی 13 سالہ حکومت تعلیم، صحت تے بنیادی خدمات ݙیوݨ اچ مکمل ناکام رہی تے جنوبی اضلاع اچ دہشت گرد غیر رسمی انتظامی ڈھانچہ بݨ چکئن۔ جݙݨ گورنر راج یا ایمرجنسی دیاں ڳالھیں کیتیاں ڳئن تاں عوام ایں کوں خوش آئند قرار ݙتا تے پی ٹی آئی سڑکاں تے ہک درجن لوکاں کوں وی نہ گھن آسڳی۔وفاقی وزیر نویں تشکیل شدہ کابینہ دے ارکان تے مشیران ، بشمول کفایت اللہ خان، طارق محمود پاشا، لیفٹیننٹ جنرل (ر) نگار جوہر، ثمر ہارون بلور تے چیف خطیب طیب قریشی  دی قابلیت دی تعریف کریندے آکھیے جو نویں کابینہ تے پچھلی کابینہ اچ زمین آسمان دا فرق اے تے ایں اچ دہشت گرداں دا کوئی ہمدرد شامل کائنی ۔ انہاں ݙسایا جو گزریل کجھ سالاں اچ دہشت گردی دے واقعات اچ 11 گنا ودھارا تھئے ، جیندے اچ ہزاراں لوک تے 1500 توں ودھ پولیس اہلکار شہید تھئے، مگر صوبائی حکومت پولیس کوں دہشت گرداں دے رحم و کرم تے چھوڑ ݙتا ہئی۔ امور کوں بہتر بݨاوݨ کیتے خیبر پختونخوا دے 12 اضلاع کیتے علاقائی نمائندہ و ترقیاتی کونسل قائم کیتی ویندی پئی اے جیندے تحت امن و امان تے ترقیاتی کماں کوں سنبھالیا ویسے۔عطا اللہ تارڑ آکھیا جو پاک فوج تے سکیورٹی فورسز دیاں قربانیاں لائقِ تحسین ہن، جݙاں جو پی ٹی آئی دا بیانیہ ہمیشہ دہشت گرداں دے حق اچ تے اداریں دے خلاف ریہے جیندے شواہد وقتی سامݨے گھن آئے ویسن۔ انہاں آکھیا جو پی ٹی آئی حکومت دے مبینہ جرائم دی فہرست طویل اے تاں جو احتساب دا طریقۂ کار کیا ہوسی تے ایں دا دائرہ کار کیڑھے شعبیں توں کھنڈایا ویسے، ایں دا فیصلہ کرݨ نویں مشاورتی کونسل دا اختیار اے۔