معاشی استحکام کوں برقرار رکھݨ کیتے ٹیکس نظام، توانائی، سرکاری ملکیتی اداریں تے عوامی مالیات دے شعبیں اچ اصلاحات دا تسلسل ضروری اے ،وزیرِ خزانہ محمد اورنگزیب دا جیفریز دے زیرِاہتمام سرمایہ کاراں دے گول میز اجلاس توں خطاب

اسلام آباد۔13 اکتوبر (اے پی پی) وفاقی وزیرِ خزانہ و محصولات سینیٹر محمد اورنگزیب آکھیے جو معاشی استحکام دے تسلسل کوں برقرار رکھݨ تے پائیدار و برآمدات تے مبنی نمو دے  پاسے پیشرفت کیتے ٹیکس نظام، توانائی، سرکاری ملکیتی اداریں تے عوامی مالیات دے شعبیں اچ اصلاحات دا تسلسل ضروری اے۔ انہاں اے ڳالھ بنکاک اچ عالمی بینک تے آئی ایم ایف دے سالانہ اجلاس دے موقع تے جیفریز دے زیرِ اہتمام سرمایہ کاراں دے گول میز اجلاس اچ آکھی۔سیکرٹری خزانہ امداد اللہ بوسال تے گورنر سٹیٹ بینک آف پاکستان جمیل احمد وی گول میز اجلاس اچ شریک ہن۔ وزیرِ خزانہ پاکستان دی بہتر تھیندی مالیاتی تے ٻاہرلی ادائیگیاں دی صورتحال، زرِ مبادلہ دے ذخیرے اچ ودھارے ، کریڈٹ ریٹنگ اچ بہتری تے بین الاقوامی کیپیٹل مارکیٹس تئیں ول رسائی تے روشنی پاتی تے معاشی استحکام کوں مستحکم کرݨ تے پائیدار، برآمدات تے مبنی ترقی و نمو دے پاسے پیشرفت تے زور ݙتا۔ انہاں آکھیا جو ایں پیشرفت کیتے ٹیکس نظام، توانائی، سرکاری ملکیتی اداریں تے عوامی مالیات دے شعبیں اچ اصلاحات دا تسلسل ضروری اے۔اجلاس اچ آئی ایم ایف پروگرام تے پیشرفت، قرضیں دی پائیدار ادائیگی تے مالیاتی ضرورتاں پوری کرݨ دی حکمتِ عملی، نال نال مالی معاونت دے ممکنہ ذرائع بشمول سکوک پانڈا بانڈز دے مزید اجراء تے ٹوکنائزیشن تے ڳالھ کیتی تے اداریں وچال تجارت تے سرمایہ کاری دے ودھارے تے زور ݙتا ڳیا۔ وزیرِ خزانہ ٹیکس نیٹ کوں وسعت ݙیوݨ، زرعی آمدݨ تے ٹیکس دے نفاذ، ڈیجیٹل ذرائع توں ٹیکس قوانین تے عملدرآمد تے مالیاتی اہداف کے حوالے نال وفاقی و صوبائی رابطہ کاری دے امور تے وی روشنی پاتی۔سرمایہ کاراں دے سوالاں دے جواب اچ پاکستانی وفد خطے دی جغرافیائی و سیاسی صورتحال نال جڑئے خطرات، توانائی دے تحفظ، مائع قدرتی گیس متعلق ذمہ واریاں تے امریکہ و سعودی عرب نال معاشی رابطے تے ڳالھ کیتی۔ وزیرِ خزانہ اصلاحات دے عمل جاری رکھݨ تے سرمایہ کاراں دے اعتماد کوں مزید تکڑا بݨاوݨ سانڳے پاکستان دے عزم دا اعادہ کیتا۔