انٹر بورڈز کوآرڈینیشن کمیشن (آئی بی سی سی) دی طرفوں قومی امتحانی معیار اشاریہ (NEQSI) دی اسٹیئرنگ کمیٹی دا پہلا اجلاس

اسلام آباد۔14 اکتوبر (اے پی پی) سیکرٹری، وزارتِ وفاقی تعلیم و پیشہ ورانہ تربیت دی ہدایت دی روشنی اچ انٹر بورڈز کوآرڈینیشن کمیشن (آئی بی سی سی) قومی امتحانی معیار اشاریہ (National Examination Quality Standardized Index — NEQSI) دی اسٹیئرنگ کمیٹی دا پہلا اجلاس آئی بی سی سی سیکریٹریٹ، اسلام آباد اچ تھیا۔اجلاس دی صدارت ڈاکٹر غلام علی ملاح، ایگزیکٹو ڈائریکٹر، آئی بی سی سی کیتی۔ اجلاس اچ پاکستان دے 27 سرکاری تعلیمی بورڈز اچ ھکو سویں تے بین الاقوامی معیار موجب امتحانی معیارات متعارف کراوݨ دے مجوزہ فریم ورک دا جائزہ ڳھدا ڳیا۔ اے اقدام امتحانی نظام دے معیار، شفافیت، غیر جانب داری تے ساکھ کوں بہتر بݨاوݨ کیتے وفاقی حکومت دے عزم دا مظہر اے۔اسٹیئرنگ کمیٹی مجوزہ اشاریں، کارکردگی دے اہداف تے عملدرآمد دے مرحلیں تے غور کیتا۔ مزید بہتری کیتے ہک ذیلی کمیٹی تشکیل ݙتی ڳئی، جیڑھی جو مجوزہ اشاریں تے اہداف کوں حتمی شکل ݙیوݨ کیتے سفارشات بݨا تے آندے اجلاس اچ پیش کریسی۔قومی امتحانی معیار اشاریہ (NEQSI) دا مقصد ملک اچ امتحانی معیار جانچݨ کیتے ہک مؤثر، یکساں تے قابلِ اعتماد نظام قائم کرݨا اے۔ ایں دے ذریعے امتحانی طریقۂ کار اچ بہتری، تعلیمی بورڈ وچال معیار تے نتیجے دا تقابلی جائزہ، عوامی اعتماد اچ ودھارا تے پاکستان دی ثانوی و اعلیٰ ثانوی تعلیمی سنداں دی بین الاقوامی سطح تے قبولیت کوں ودھارا ݙیوݨ اچ مدد ملسی۔ ایں اقدام نال پاکستان تے ٻاہرلے ملک اعلیٰ تعلیم حاصل کرݨ دے خواہش مند طلبہ کیتے وی مزید موقع پیدا تھیوݨ دی توقع اے۔ڈاکٹر غلام علی ملاح، ایگزیکٹو ڈائریکٹر، آئی بی سی سی آکھیا جو NEQSI پاکستان دے امتحانی نظام کوں جدید خطوط تے استوار کرݨ، ھکو سواں معیار متعارف کراوݨ تے مسلسل بہتری دے پاسے اہم قدم اے۔انہاں آکھیا ”NEQSI دے ذریعے ملک بھر اچ امتحانات تے جانچ دے معیار کوں بہتر بݨاوݨ، اپݨے امتحانی نظام کوں بین الاقوامی معیارات نال ہم آہنگ کرݨ تے پاکستانی تعلیمی سنداں دی عالمی سطح تے شناخت و قبولیت کوں تکڑا بݨاوݨ اچ مدد ملسی۔ ہک شفاف تے ھکو سویں معیار دے نظام دے ذریعے اساں امتحانات دی ساکھ اچ ودھارا تے اپݨے طلبہ کیتے تعلیمی موقعیں کوں وسعت ݙیوݨ چاہندوں۔آئی بی سی سی متعلقہ اداریں تے تعلیمی بورڈز نال رل تے ایں قومی اقدام کوں اڳوں ودھاوݨ تے پاکستان اچ ہک شفاف، قابلِ اعتماد تے بین الاقوامی معیارات نال ہم آہنگ امتحانی نظام دے ودھارے کیتے اپݨی کوشساں جاری رکھیسی۔