عالمی چیلنجز دے باوجود پاکستان معاشی محاذ تے پیشرفت کریندا پئے، وزیرِ خزانہ دی پینل مباحثے اچ ڳالھ مہاڑ

اسلام آباد۔14 اکتوبر (اے پی پی) وفاقی وزیرِ خزانہ و محصولات سینیٹر محمد اورنگزیب آکھیے جو عالمی چیلنجز دے باوجود پاکستان معاشی محاذ تے پیشرفت کریندا پئے، گزریل ݙو سالاں دے دوران ٹیکس محصولات اچ 40 فیصد ودھارا تھئے، سرکاری قرضیں دا حجم مجموعی قومی پیداوار دے 75 فیصد توں گھٹ تھی تے 68 فیصد رہ ڳئے۔اے ڳالھ انہاں بینکاک اچ عالمی بینک تے آئی ایم ایف دے سالانہ اجلاس 2026ء دے موقع تے مارکیٹ تئیں رسائی رکھݨ آلے ملکاں کوں خودمختار مالیاتی خطرات توں محفوظ بݨاوݨ دے موضوع تے پینل مباحثے دے دوران آکھی۔ وزیرِ خزانہ عالمی معاشی چیلنجز دے باوجود پاکستان دی معاشی پیشرفت تے اصلاحات دے حوالے نال چاتے ونڄݨ آلے اقدامات تے روشنی پاتی۔ انہاں ݙسایا جو پاکستان دا مالیاتی خسارہ مجموعی قومی پیداوار دے 2.6 فیصد تئیں ڈھے ڳئے جیڑھا جو 22 سال دی گھٹ ترین سطح اے جݙاں جو ملک مسلسل ترائے سال بنیادی مالیاتی سرپلس حاصل کرݨ اچ کامیاب ریہے۔وزیرِ خزانہ ݙسایا جو گزریل ݙو سالاں دے دوران ٹیکس محصولات اچ 40 فیصد ودھارا تھئے جݙاں جو سرکاری قرضیں دا حجم مجموعی قومی پیداوار دے 75 فیصد توں گھٹ تھی تے 68 فیصد رہ ڳئے، پاکستان چار سال دے وقفے دے بعد عالمی کیپٹل مارکیٹس اچ واپس آیا تے ترائے ارب ڈالر حاصل کیتے۔ وزیرِ خزانہ ایں عزم دا اظہار کیتا جو پاکستان دا اصلاحات دا پروگرام قومی ترجیحات دے موجب اڳوں ودھایا ویندا پئے تے آئی ایم ایف ایں عمل اچ معاونت ݙیندا پئے۔ انہاں زور ݙتا جو معاشی استحکام دے حصول دے بعد پاکستان دا اگلا ہدف پائیدار اقتصادی ترقی کوں یقینی بݨاوݨا اے۔