وزیراعظم شہباز شریف اسلام آباد اچ دانش سکول دا افتتاح کر ݙتا، کلاس رومز، سائنس، آئی ٹی اینڈ روبوٹکس لیبز تے آرٹ روم دا دورہ کیتا

اسلام آباد۔18 اکتوبر (اے پی پی) وزیراعظم محمد شہباز شریف اسلام آباد اچ دانش سکول دا افتتاح کر ݙتے۔ وزیراعظم شہباز شریف اتوار کوں دانش سکول دی افتتاحی تقریب اچ شرکت کیتی، ایں موقع تے انہاں کلاس رومز، سائنس، آئی ٹی اینڈ روبوٹکس لیبز تے آرٹ روم دا دورہ کیتا جتھاں انہاں طلبہ کوں فراہم کیتیاں ون٘ڄݨ آلی تعلیمی سہولتاں تے اطمینان دا اظہار کیتا۔ وزیراعظم دانش سکول اچ زیرِ تعلیم ٻالاں تے ٻالڑیاں نال ملاقات کیتی اتے طلبہ نال شفقت بھری ڳالھ مہاڑ کیتی۔ وزیراعظم مشکل حالات دے باوجود تعلیم حاصل کرݨ آلے ٻالاں دے جذبے کوں سراہیا۔ ایں موقع تے ٻالاں وزیراعظم کوں آپݨے درمیان پا تے خوشی دا اظہار کیتا۔ ایں توں علاوہ وزیراعظم کوں دانش سکول بارے بریفنگ ݙتی ڳئی۔ بریفنگ اچ ݙسایا ڳیا جو دانش سکول اسلام آباد 30 ایکڑ رقبے تے قائم کیتا ڳئے، طلبہ تے طالبات کیتے انڄ اناڄ اکیڈمک بلاکس بݨائے ڳئن، ہر بلاک اچ 24 کلاس رومز، آئی ٹی، سائنس تے روبوٹکس لیبز بݨائی ڳئن۔ ای-لائبریری تے آرٹ روم وی بݨائے ڳئن، سکول اچ کلاسز ششم، ہفتم تے ہشتم توں شروع کیتیاں ڳئیاں ہن اتے ہر کلاس اچ 120 ٻال تے ٻالڑیاں تعلیم حاصل کریندے پئن۔ بریفنگ اچ ݙسایا ڳیا جو ملک دے مختلف علاقیاں توں 360 ہونہار ٻالاں کوں سو فیصد میرٹ تے داخل کیتا ڳئے، 38 استاداں کوں بھرتی کیتا ڳئے اتے ضرورت دے مطابق تدریسی سٹاف اچ اضافہ کیتا ویسے۔ ایں موقع تے وفاقی وزیرِ تعلیم ڈاکٹر خالد مقبول صدیقی، وفاقی وزیر برائے اطلاعات تے نشریات عطاء اللہ تارڑ تے چیئرمین وزیراعظم یوتھ پروگرام رانا مشہود احمد خان وی وزیراعظم دے نال ہن۔