مودی سرکار نہرو دے فلسفے کوں دفن کر ڈتے،ہنڑ ہندوستان دی حکمت عملی اچ مودی، امیت شاہ اتے دیول ترائے نمایاںکردار ہن، بین الاقوامی میڈیا کھل تے حق ،سچ دا ساتھ ڈتے، اساکوں لابنگ کرنڑ کیتے تکھے کوششاں کرنڑ پوسن، بھارت توجہ ہٹاونڑ سانگے کوڑا آپریشن کر سگدے وزیر خارجہ شاہ محمود قریشی دا سانجھی پریس کانفرنس توں خطاب

اسلام آباد ۔ 17 اگست (اے پی پی) وزیر خارجہ شاہ محمود قریشی اعلان کیتے جو وزارت خارجہ اچ ہک کشمیر سیل بنڑایا ویسی،انہاں آکھیا جو اساں فیصلہ کیتے جو دنیا دے اہم دارالحکومتاں اچ پاکستانی سفارت خاناں اندر فوکل پرسن مقرر کیتے ویسن۔وزیر خارجہ آکھیا جو یکجہتی دا جیرھا پیغام اساں مظفرآباد اچ ڈتا اوہو پیغام کشمیر کمیٹی دے اجلاس اچ ڈتا گئے ، گزریل ڈینھ مسئلہ کشمیر کوں سبھ توں وڈے فورم اچ چاتا گیا ،جتھاں کشمیر بارے 11 قراردادں موجود ہن۔انہاں آکھیا جو کمیٹی ایں گالھ تے اتفاق کیتے جو مودی سرکار نہرو دے فلسفے کوں دفن کر ڈتے اتے ہنڑ ہندوستان دی حکمت عملی اچ مودی، امیت شاہ اتے دیول ترائے نمایاںکردار ہن۔وزیر خارجہ آکھیا جو بین الاقوامی میڈیا کھل تے حق اتے سچ دا ساتھ ڈتے۔انہاں آکھیا جوپاکستان کوں کشمیر دے مسئلے تے لابنگ کرنڑ سانگے تکھے کوششاں کرنڑ پوسن۔وزیر خارجہ آکھیا جو بھارت توجہ ہٹاونڑ سانگے کوڑا آپریشن وی کر سگدے۔ وزیرخارجہ شاہ محمود قریشی ایہ گالھ ہفتے کوں وزارت خارجہ اچ سانجھی پریس کانفرنس توں خطاب کریندے کیتی ۔اطلاعات ونشریات سانگے وزیر اعظم دی معاون خصوصی ڈاکٹر فردوس عاشق اعوان، چیئرمین پارلیمانی کمیٹی کشمیرسید فخر امام اتے پاک فوج دے شعبہ تعلقات عامہ ( آئی ایس پی آر) دے ڈائریکٹر جنرل میجر جنرل آصف غفور وی شریک ہن۔ وزیر خارجہ آکھیا جو کشمیر سانگے وزیراعظم دی خصوصی کمیٹی دااجلاس تھیا،جیندے اچ ساریاں جماعتاں دی نمائندگی ہائی اتے ہنڑ ساریاں اتفاق نال ہک مٹھ ہونڑ دا پیغام ڈتے جیرھا جواساں آزاد جموں وکشمیراچ ڈتا ہا۔ انہاں آکھیا جو پارلیمنٹ مقبوضہ جموں و کشمیر تے سانجھی قرارداد دی منظوری دے بعد وزیراعظم ایہ خصوصی کمیٹی بنڑائی،جیندے اچ اپوزیشن دی وی نمائندگی ہے۔وزیر خارجہ آکھیاجو گزریل ڈینھ تھیونڑ آلے سلامتی کونسل دے اجلاس تے ہندوستان حیران تھی گئے۔انہاں آکھیا جو ایہ ہک لمبی لڑائی ہے ،جیندے کیتے اساکوں تیاری کرنڑ پوسی ۔وزیر خارجہ آکھیا جو پاکستان دے خط کوں اہمیت ڈتی گی اتے بھارت دے مطالبے کوں مسترد کیتا گیا اتے سکیورٹی کونسل دا اجلاس تھیا۔وزیر خارجہ آکھیا جوپاکستان اتے کشمیر ی قیادت بھارت دے یکطرفہ اقدام کوں مسترد کر ڈتے۔ وزیر خارجہ سیکرٹری خارجہ، اقوام متحدہ اچ اپنڑیں ٹیم اتے مستقل مندوب ملیحہ لودھی کو ںسفارتی کامیابی تے مبارخباد ڈتی۔انہاں آکھیا جواج ہندوستان دے اندر ڈو سو دے نیڑے نامور لوکیں پٹیشن سپریم کورٹ اچ ڈتی ہے جو ایں فیصلے کوں واپس گھدا ونجے،انہاں آکھیا جو اساں سارے پہلوواں تے غور کیتے ،عالمی عدالت انصاف اچ ونجنڑ بارے وی صلاح کیتی گی ہے ،اٹارنی جنرل اتے وزیر قنون اساکوں ایں بارے مشورے ڈیسن۔وزیر خارجہ آکھیا جو انہاں تجویزاں کوں وزیراعظم اتے کابینہ سامنڑے رکھیا ویسی اتے انہاں دی منظوری گھدی ویسی۔شاہ محمود قریشی آکھیا جو جڈاں کوئی کملا تھی ویندے تاں بھارتی وزیر دفاع ورگے بیان ڈیندے ،زمینی حقائق کوں دنیا تشویش نال ڈیکھدی پی ہے، انسانی حقوق دی تنظیماں اتے او آئی سی کرفیو چاونڑ دا مطالبہ کیتے۔ انہاں آکھیا جو انسانی حقوق دا معاملہ ڈو طرفہ کائنی ہے،ا یہ ضمیر دی آواز ہے، دنیا دا ایں بارے چپ رہونڑ مجرمانہ غفلت ہو سی ،پاکستان 370 آرٹیکل کوں کڈاہیں اہمیت نی ڈتی،اساڈے کیتے مستقل حل دی ضرورت ہے ،جیندا بھارت سیکورٹی کونسل دی قرارداداں مطابق پابند ہے۔ وزیر خارجہ آکھیا جو بھارت آبادی د اجیرھا تناسب بدلنڑ دی کوشش کریندا پئے ،ایندے کیتے اساڈے کنوں آپشنز موجود ہن۔ انہاں آکھیا جوپاکستان دے میڈیا دے کردار کوں خراج تحسین پیش کریندوں۔ انہاں آکھیا جو بھارت دا میڈیا سٹرٹیجک انٹرسٹ تے ہکو رائے رکھیندے پاکستانی میڈیا توں وی ایہو توقع ہے۔انہاں آکھیا جو قوم کو ںمیر جعفر اتے میر صادق توں ہوشیار رہونڑ دی ضرورت ہے۔ وزیر خارجہ آکھیا جو وزیر اعظم عمران خان ایں خصوصی کمیٹی کو ںصلاح مشورے دااختیار ڈتے ،تاں جو آئندہ دا لائحہ عمل بنڑایا ونج جا سگے ۔ شاہ محمود قریشی آکھیا جو مقبوضہ جموں وکشمیراچ جمعہ کوں وی کرفیو رہیا لیکن ایندے باوجود کشمیری جمعہ دی نماز کیتے باہر نکلے، مسیتاں اچ جندرے ہن اتے لوکیں کھلے میدان اچ نمازجمعہ پڑھی،ا یہ بھارت کیتے صرف ہک جھلکی ہائی۔وزیر خارجہ آکھیا جو وزارت خارجہ ولوں اعلان کریندا ہاں جو وزارت خارجہ اچ اساں ہک کشمیر سیل بنڑیندے پئے ہسے ،تاں جو مکمل ڈھانچہ بنڑایا ونجے،انہاں آکھیا جواساں فیصلہ کیتے جو اہم دارالحکومتاں اچ پاکستانی سفارت خاناں اچ کشمیر توں متعلق ہک فوکل پرسن مقررکریسن۔ انہاں آکھیا جواساں ساری صورتحال تے نظر رکھی ہوئی ہے، ایندا ہک سیاسی اتے ہک عسکری پہلو ہے،گزریل ڈینھاقوام متحدہ دی سلامتی کونسل اچ اتنی وڈی پیش رفت تھی ہے جینداکہیں کوں اندازہ کائنی ہے۔ ڈائریکٹر جنرل آئی ایس پی آر میجر جنرل آصف غفور آکھیا جو مقبوضہ کشمیر اچ ہر گھر کوں بھارت محصور کیتا ہوئے ، اساکوں خطرہ ہے جو بھارت توجہ ہٹاوڑ کیتے فالس آپریشن کر سگدے، پاکستانی مسلح افواج تیار ہن اتے ہندوستان کوں چنگا جواب ڈتا ویسی۔ انہاں آکھیا جو مقبوضہ کشمیر اچ 9لکھ بھارتی فوج موجود ہے ،بھارت انسانی حقوق دی سنگین خلاف ورزیاں کریندا پئے ،جینکوں پوری دنیا ڈیکھدی پی ہے۔ انہاں آکھیا جو پاکستان ، بھارت ولوں لائن آف کنٹرول دی خلاف ورزی دے الزاماں کوں مسترد کریندے ۔ انہاں آکھیا جو کشمیر دا مسئلہ پاکستان اتے بھارت وچال ہک متنازع جھیڑا ہے، دنیا کو ں ایں مسئلے تے دھیان ڈیونڑ پوسی،کینونجواگر ڈو ایٹمی طاقتاں وچال کشیدگی ودھسی تاں ایندے نقصانات سامنڑے آوسن ۔ڈی جی آئی ایس پی آر آکھیا جوقوم کوں اپنڑیں مسلح افواج دی صلاحیتاںتے پورا اعتماد ہونڑ چاہیدے۔ڈی جی آئی ایس پی آر آکھیا جو پاکستان دی مسلح افواج دی صلاحیتاں دا مظاہرہ قوم پہلے ڈٹھے ،قوم دی سپورٹ نال افواج پاکستان جواب ڈیونڑ دی ول وی اہلیت رکھیندن ۔انہاں آکھیا جوسوشل میڈیا کو ں ڈیکھدے پئے ہسے ،ایندا فیصلہ تساڈے تے چھوڑدے ہسے۔