اسلام آباد ۔ 18 ستمبر (اے پی پی) وزیراعظم عمران خان مقبوضہ کشمیر اچ بھارت دے غیر قنونی اتے یکطرفہ اقدامات نال بنڑن آلی سنگین صورتحال بارے آکھیے جو بین الاقوامی برادری بھارت تے بین الاقوامی انسانی حقوق معاہداں مطابق اپنڑیاں ذمہ داریاں پوری کرنڑ سانگے زورڈیوے۔ ایہ گالھ عمران خان سویڈن دے وزیراعظم اسٹیفن لوف ون نال ٹیلی فون تے گالھ مہاڑ کریندے ہوئیں آکھی ۔ وزیراعظم مقبوضہ کشمیر دی متنازعہ حیثیت اتے آبادیاتی ہیئت تبدیل کرنڑ سانگے بھارت ولوں کیتے گئے 5 اگست دے غیر قنونی اتے یکطرفہ اقدامات کوں اجاگر کیتا۔ عمران خان ایں گالھ تے زور ڈتا جو بھارتی اقدامات اقوام متحدہ دی سلامتی کونسل قرارداداں اتے بین الاقوامی قنون دی خلاف ورزی ہن۔ انسانی حقوق دی سنگین صورتحال کوں نمایاں کریندے ہوئیں آکھیا جو مقبوضہ کشمیر اچ 45ڈینھاں توں جاری لاک ڈاﺅن اتے کرفیو وختی ختم کیتا ونجے ، نقل و حرکت دیاں پابندیاں ہٹاونڑ، انسانی ہمدردی دی تنظیماں کوں رسائی ڈیونڑ اتے کشمیری عوام دے حقوق اتے آزادی دے احترام تے زور ڈتا۔ وزیراعظم آکھیا جو بین الاقوامی برادری بھارت تے زورڈیوے جو اوہ بین الاقوامی انسانی حقوق معاہداں مطابق اپنڑیاں ذمہ داریاں پوریاں کرے۔ سویڈن دے وزیراعظم انسانی حقوق دی صورتحال تے تشویش دا اظہار کریندے ہوئیں کشیدہ صورتحال اچ گھٹکی اتے گالھ مہاڑ نال مسئلیاں دے حل دی اہمیت تے زور ڈتا۔ ڈوہائیں رہنماواں خطے اچ امن و استحکام کیتے رل مل تے کم کرنڑ اتے رابطے اچ رہونڑ تے اتفاق کیتا۔
