جنگ نال مسئلیاں دے حل تے یقین نی رکھیندے، ایندے نال ہک مسئلہ حل تھیندے تاں کئی بئے مسئلے بنڑ ویندن، سفارتکاری دے ذریعے مسئلیاں کوں حل کرنڑ دے حق اچ ہاں، اقوام متحدہ اچ کشمیر دا مقدمہ گھن تے ویساں صدر ٹرمپ سمیت عالمی رہنماواں کوں مقبوضہ کشمیر توں کرفیوختم کروانڑ سانگے کردار ادا کرنڑ دا آکھساں، افغان امن عمل دوبارہ بحال کرنڑ کیتے صدر ٹرمپ کوں قائل کرنڑ دی پوری کوشش کریساں،بھارت اچ ہندو بالادستی دا نظریہ مہاتما گاندھی دے نظریے دا قتل ہے، اسلام صرف ہکو ہے اتے ا وہ محمد عربی دا اسلام ہے، جیندے اچ سارے انسان برابر حقوق رکھیندن، چین کڈاہیں پاکستان دی خارجہ یا داخلہ پالیسی اچ مداخلت نی کیتی وزیراعظم عمران خان دا نیویارک اچ فارن ریلیشن کونسل دے مباحثے اچ گالھ مہاڑ

نیویارک ۔ 23 ستمبر (اے پی پی)وزیراعظم عمران خان آکھیے جو جنگ نال مسئلیاں دے حل تے یقین نی رکھیندے، ایندے نال ہک مسئلہ حل تھیندے تاں کئی بئے مسئلے بنڑ ویندن، سفارتکاری دے ذریعے مسئلیاں کوں حل کرنڑ دے حق اچ ہاں، اقوام متحدہ اچ کشمیر دا مقدمہ گھن تے ویساں ،صدر ٹرمپ سمیت عالمی رہنماواں کوں مقبوضہ کشمیر توں کرفیوختم کروانڑ سانگے کردار ادا کرنڑ دا آکھساں، افغان امن عمل دوبارہ بحال کرنڑ کیتے صدر ٹرمپ کوں قائل کرنڑ دی پوری کوشش کریساں،بھارت اچ ہندو بالادستی دا نظریہ مہاتما گاندھی دے نظریے دا قتل ہے، اسلام صرف ہکو ہے اتے ا وہ محمد عربی دا اسلام ہے، جیندے اچ سارے انسان برابر حقوق رکھیندن، چین کڈاہیں پاکستان دی خارجہ یا داخلہ پالیسی اچ مداخلت نی کیتی۔ایہ گالھیں وزیراعظم سنوار کوں فارن ریلیشن کونسل دے مباحثے اچ گالھ مہاڑ کریندے ہوئیں آکھیاں۔ انہاں آکھیا جو جیمز مینڈس نی سمجھدے جوپاکستان اچ انتہا پسندی کیوں آئی؟ پاکستان روس دے خلاف امریکہ دے نال رل مل تے مزاحمت کیتی، روس جڈاں افغانستان تے حملہ کیتا تاں ساری دنیا توں مسلماناں روس دے خلاف افغانستان اچ آ تے جہاد کیتا، تڈاں ا یہ مجاہدین ہن لیکن بعد اچ نائن الیون دے واقعہ دے بعد انہاں کوں دہشت گرد آکھیا گیا، دہشت گردی دے خلاف جنگ اچ 70 ہزار پاکستانیاں اپنڑیاں جاناں دی قربانی ڈتی، افغانستان توں روس دے نکلنڑ دے بعد امریکہ پاکستان کوں کلھا چھوڑ ڈتا، نائن الیون دے بعد ول امریکہ کوں پاکستان دی ضرورت پئی، دہشت گردی دے خلاف جنگ اچ پاکستان کوں 200 ارب ڈالردا نقصان تھیا، پاکستان اچ مذہبی انتہاءپسندی دیاں جڑاں روس دے خلاف مزاحمت دے زمانے دیاں ہن، سابق صدر جنرل پرویز مشرف تے ڈو واری حملے کیتے گئے۔ ہک سوال دے جواب اچ انہاں آکھیا جو میڈا ہمشیہ موقف رہت جو مسئلہ افغانستان دا فوجی حل ممکن کائنی۔ میں افغان تریخ بارے جانڑداں ہاں، افغانستان اچ کڈاہیں باہرآلی طاقت قبضہ نی کر سگی، صدر ٹرمپ کو ں وی ایہو ڈسائے جو افغانستان دا فوجی حل ممکن کائنی، افغانستان اچ پائیدار امن سیاسی مذاکرات نال ہی ممکن ہے، افغانستان اچ سیاسی مذاکرات دی کامیابی وڈا مشکل مرحلہ ہے، میڈے خیال اچ طالبان پورے افغانستان تے کنٹرول کائناں رکھ سگسن، افغانستان اچ ہر روز بمب دھماکاں اچ بے گناہ لوک مردن،عقل رکھنڑ آلا ہر بندہ افغانستان اچ امن دی خواہش رکھیندے ۔ انہاں آکھیا جو مسئلہ کشمیر دی وجہ نال ڈو ایٹمی طاقتاں آمنڑے سامنڑے کھڑیاں ہن، اقوام متحدہ اچ کشمیر دا مقدمہ گھن تے ویساں، چاہندا ہاں جو یو این اپنڑاں کردار ادا کرے، قیدی بنڑائے گئے بھارتی پائلٹ کوں امن دی خاطر واپس کیتا، مقبوضہ کشمیر اچ 9 لکھ فوجی 50 ڈینھاں توں لکھاں کشمیریاں کوں محصور کیتے ہوئے ہن، عالمی برادری مقبوضہ کشمیراچ مسلسل کرفیو ختم کرانڑ سانگے کردار ادا کرے۔ انہاں آکھیاجواقوام متحدہ دی سلامتی کونسل اپنڑیاں قراراداداں اچ کشمیریاں کوں حق خود ارادیت دا حق ڈتا، توقع ہے جو عالمی برادری گھٹ و گھٹ مقبوضہ کشمیر توں کرفیو مکاونر سانگے اپنڑاں کردار ادا کریسی۔ ہک سوال دے جواب اچ وزیراعظم آکھیاجو اوہ جنگ تے یقین نی رکھیندے، ایندے نال ہک مسئلہ حل تھیندے تاں کئی بئے مسئلے بنڑ ویندن، اوہ سفارتکاری نال مسئلیاں دے حل دے حق اچ ہن۔ انہاں آکھیا جو میں اپنڑیں پوری کوشش کیتی جو افغان معاہدے تے دستخط تھیونڑم تاں جو دہشت گردی دے واقعہ دے بعد امریکی صدر ڈونلڈ ٹرمپ مذاکرات دا عمل معطل کر ڈتا، میں پوری کوشش کریساں جو صدر ٹرمپ کوں ا یہ مذاکراتی عمل بحال کرنڑ تے منا سگاں۔ انہاں آکھیا جو بھارت اچ میڈے کئی یار اتے چاہونڑ آلے ہن، میڈا انہاں دے نال احترام اتے محبت دارشتہ ہے ،تاں جوایں بارے میڈی کوئی ڈوجھی رائے کائنی جو بھارت سدھے پاسے نی ویندا پیا، ہندو بالادستی دا نظریہ گاندھی دے نظریے دا قتل ہے۔