کرپشن اساڈے نظام کو ں تباہی دے دھانے تے پجا ڈتے ، ایں ناسور توں ملک دی جان چھڑاونڑ میڈا مشن ہے، صنعتکار ملکی معیشت اچ اہم ترین کردار ادا کریندن، حکومت کاروبار اچ آسانیاں پیدا کریسی وزیراعظم عمران خان د ی معروف صنعتکاراں اتے کاروباری شخصیات دے وفد نال گالھ مہاڑ

اسلام آباد ۔ 3 اکتوبر (اے پی پی) وزیراعظم عمران خان آکھیے جو کرپشن اساڈے نظام کو ں تباہی دے دھانے تے پجا ڈتے ، ایں ناسور توں ملک دی جان چھڑاونڑ میڈا مشن ہے، صنعتکار ملکی معیشت اچ اہم ترین کردار ادا کریندن، حکومت کاروبار اچ آسانیاں پیدا کریسی۔خمیس کوں معروف صنعتکاراں اتے کاروباری شخصیات دے وفد نال وزیراعظم ملاقات کیتی۔ وفد اچ میاں منشا، بشیر علی محمّد، خلیل ستار، خالد محمود، شاہد عبداللہ، عارف حبیب، مصدق ذوالقرنین، عثمان خالد وحید، سکندر مصطفیٰ، خاور انور خواجہ، علی حبیب اتے جاوید آفریدی شامل ہن۔ ایں موقع تے وفاقی وزیر حماد اظہر، سید علی زیدی، مخدوم خسرو بختیار، مشیر خزانہ ڈاکٹر عبدالحفیظ شیخ، مشیر تجارت عبدالرزاق داود، ڈاکٹر عشرت حسین، چیئرمین ایف بی آر سید شبرزیدی اتے سینئر افسران وی موجود ہن۔ ملاقات اچ ٹیکس امور، ڈیوٹیز اتے برآمدات ودھاونڑ بارے تجویزاں ڈتیاں گئیاں۔ وفد وزیر اعظم کو ں اقوام متحدہ اچ مظلوم کشمیریاں دی آواز چنگے طریقے نال بلند کرنڑ تے انہاں کوں مبارخباد ڈتی۔ ایں موقع تے وزیراعظم آکھیا جو صنعتکار ملکی معیشت اچ اہم ترین کردار ادا کریندن، حکومت دا کم کاروبار کرنڑ نی بلکہ کاروبار اچ آسانیاں پیدا کرنڑ ہے، ترقی دا پہیہ صرف کاروبار اچ آسانیاں پیدا کرنڑ نال ہی چلسی۔عمران خان آکھیا جوکرپشن اساڈے نظام کو ں تباہی دے دھانے تے پجا ڈتے ، ایں ناسور توں ملک دی جان چھڑاونڑ میڈا مشن ہے۔انہاں آکھیا جو صنعتکار ملکی معیشت اچ اہم ترین کردار ادا کریندن، حکومت کاروبار اچ آسانیاں پیدا کریسی ۔انہاں آکھیا جوقبائلی ضلع ہنڑ قومی دھارے اچ رل گن اتے اتھاں وی کاروبار اتے سرمایہ کاری کوں ودھیسوں ۔