احمد فراز کوں پاکستانی عوام توں بے مثال محبت ملی، امن، محبت اتے انسانیت انہاں دی ادبی خدمات اتے عملی زندگی دا محور رہیا وفاقی وزیر اطلاعات و نشریات سینیٹر شبلی فراز دی آپنڑے والد احمد فراز دے ورھینڑیں دے موقع تے انہاں دی قبر تے فاتحہ خوانی دے بعد میڈیا نال گال مہاڑ، اکادمی ادبیات پاکستان دے زیر اہتمام دعائیہ نشست توں خطاب

اسلام آباد ۔ 25 اگست (اے پی پی) وفاقی وزیر اطلاعات و نشریات سینیٹر شبلی فراز آکھیے جو میڈے والد احمد فراز کوں پاکستانی عوام توں بے مثال محبت ملی ،انہاں آپنڑے قول فعل اچ کوئی تضاد نہ رکھیا ، امن محبت تے انسانیت انہاں دی ادبی خدمات تے عملی زندگی دا محور رہیا ، میکوں ہمیشہ آپنڑے والد دی شاعری توں رہنمائی ملی اے، نینگراں کوں احمد فراز دی شاعری اتے تعلیمات توں فائدہ چاونڑاں چاہیدے ،لکھنڑ آلیں کوں معاشرے دی بہتری کیتے آپنڑیاں کوششاں جاری رکھنڑیاں ہوسن ، اوہے قوماں ترقی کریندن جیرھیاں آپنڑی رویت تے اقدار کوں یاد رکھیندن۔ اے گال انہاں منگل کوں شہرہ آفاق شاعر اتے ادیب احمد فراز دی 12 ویں برسی دے موقع تے انہاں دی قبر تے حاضری ڈتی ، فاتحہ خوانی دے بعد میڈیا نال گال مہاڑ اتے اکادمی ادبیات پاکستان وچ احمد فراز دی یاد اچ دعائیہ نشست توں خطاب کریندے ہوئیں آکھی اے ۔ایندے توں پہلے وفاقی وزیر اپنڑے والد اتے شہرہ آفاق شاعر، ادیب و دانشور احمد فراز دی قبر تے حاضری ڈتی ،فاتحہ پڑھی تے پھلاں دی چادر چڑھائی ۔ایں موقع تے اکادمی ادبیات پاکستان دے چیئرمین ڈاکٹر یوسف خشک اتے مختلف شعبہ ہائے زندگی نال تعلق رکھنڑ آلے لوکاں دی وڈی تعداد موجود ہن ۔ وزیر اطلاعات ایں موقع تے میڈیا نال گال مہاڑ کریندے ہوئیں آپنڑے والد دی 12برسی دے موقع تے فاتحہ خوانی کیتے ایچ ایٹ قبرستان آونڑ آلے سارے لوکاں دا شکریہ ادا کیتا تے آکھیا جو احمد فراز اپنڑے قول و فعل اچ کوئی تضاد نی رکھیا تے آپ دے نظریے تے قائم رہیے ۔انہاں آکھیے جو احمد فراز ہک منفرد انداز اچ اپنڑیاں صلاحیتاں کوں نہ صرف منوائے بلکہ اپنڑی شاعری دے ذریعے قوم و معاشرے کیتے ہک پیغام چھوڑیے جیں تے اج اساکوں عمل کرنڑ دی لوڑھ اے ۔ انہاں آکھیے جو احمد فراز کوں پاکستانی عوام توں ودھ ساری محبت ملی جیں دی کوئی مثال نی ملدی ۔انہاں فلسطین اتے کشمیر دی آزادی کیتے آواز چاتی تے پاکستان کوں مقدم رکھیا انہاں دی شاعری ہک پیغام ڈیندی اے جیں کوں پڑھ تے اج وی رہنمائی ملدی اے ۔انہاں پاکستان دی سول سوسائٹی، میڈیا اتے سارے مکاتب فکر دا شکریہ ادا کیتا جیرھے جو خراب موسم دے باوجود احمد فراز نال والہانہ عقیدت دے اظہار کیتے انہاں دی برسی دے موقع تے قبرستان اچ کٹھے تھئے ۔ اکادبی ادبیات دے چیئرمین ڈاکٹر محمد یوسف وی شرکا دا شکریہ ادا کیتا اتے احمد فرازکوں خراج عقیدت پیش کریندے ہوئیں آکھیے جو جتھاں وی اج ادب دا ناں آندے احمد فراز دا ناں شاعراں ، ادیباں اتے نینگراں دے سفیر دے طور تے جانڑیا ویندے۔